9
X̱ana' Dios, dot ḻaža'a wká'n ẕena' Le'.
Wzenla' benne' ka' ka nak da' ẕente da' beno'.
Yebekzla', na' goḻkza' ka nak chio'.
Goḻa' che La la'y chio' Le', nako' Dios ẕente.
Bẕonnjgak benne' ka' bi ẕḻé'egekle' neda' chawe'.
Bejchégwgake', na' wnítgekle' ḻawo' Le',
dan' ẕzoa chawo'o da' chawe' da' žona'.
Ži'o latje blo chio', na' cháwe'do' ẕchi'a ḻažo'o.
Bdiḻo' benne' yež ka', na' bchinnjo' yo'o chegak benne' wen da' ẕinnj ka'.
Bsoḻo' lagak benne' ka' to chi'ize.
Wžía yi'gak benne' ka' bi ẕḻé'egekle' neda' chawe'.
To chi'ize zej nbia yi' latje chegak benne' ka',
na' yež chégake' ka', da' ka' bchinnjo' Le'.
Nitó benne' chejsá' ḻaže'e benne' ka'.
 
X̱anžo Dios zoakze' to chi'ize.
Bkweze' latje blo chie' gan wchi'a ḻaže'e benne' ka'.
Ḻo da' chawe' wchi'a ḻaže'e benne' ka' dot yežlyó,
na' benne' yógo'te yež ka' ḻo da' nak ḻi ḻaže'.
X̱anžo Dios nake' ka to gan chejnníta'gak chawe' benne' yache' ka',
kate' žin ža che da' wžía yin' benne' wen da' ẕinnj ka'.
 
10 Benne' ka' zej nónbi'e Le', X̱anto' Dios, wx̱én ḻáže'gake' Le',
dan' bi wléj yichjo' benne' ka' žíljgake' Le', X̱anto' Dios.
 
11 Le goḻ che X̱anžon', Bennen' zoe' yež Sión.
Le wzenle benne' yež ka' ka nak da' bene',
12 dan' žejsá' ḻaže'e chegak benne' ka' ẕzáka'gake',
na' yezi'e wzón che benne' wetw benách ka'.
Bi gaḻ ḻaže'e da' žḻižgak benne' yache' ka' Le'.
 
13 Beyache' ḻaže'l neda', X̱ana' Dios.
Bwia da' ẕzaka'a ḻo na'gak benne' ka' bi ẕḻé'egekle' neda' chawe'.
Le' bekó'o neda' ḻo na' yeḻa' got
14 nich wzenla' benne' ka' da' ẕka'n ẕena' Le' gan ẕdóbgake' ḻo yež Sión,
na' yebéḻe'ela' dan' besló' neda'.
 
15 Chejchazgak benne' yež ka' ḻo yežw da' bché'ngake'.
Chejcházgake' ḻo do yeḻj da' bdíx̱jgake'.
16 X̱anžo Dios bḻoe'ele' kan ẕchi'a ḻaže'e,
dan' wbága'gak ẕia benne' ka' bi zej nake' chawe' ni'a che da' béngakkze'.
17 Benne' bi zej nake' chawe' ka' cházgake' ḻo yi' gabíl,
yógo'te benne' ka' žaḻ ḻáže'gake' X̱anžo Dios.
18 Kege to chi'ize gaḻ ḻaže' Dios benne' yache' ka',
na' kege to chi'ize nitle da' žx̱en ḻáže'gake'.
 
19 Wzó ža', X̱ana' Dios. Bi go'o latje benne' ka' wká'n ẕen kwíngake'.
Ḻa'gak benne' yež ka' ḻawo' Le' nich wchi'a ḻažo'o ḻégake'.
20 X̱ana' Dios, ben ga žébegak benne' ka' Le'.
Yeyónbia'gak benne' yež ka' zej nake' benachze.