3
Paw tei kaa cung letah donah a hnuipaw heh zetlua tamaw a lai! Ma rawng taco Khazing sawtei sahlo tatah y kaa cang hi. Taico ma cawh kaa cangnahpaw cawh a cang. Khazaw tei a ma hnilynah a rawng cawh Ama a za hni lynah rawng tah a cang. Dopaw vesaw sahlo, atoheh kaaning sahlo cawh Khazing sawtei cang he peh ka, zemaw kaa va lo tae a tah duitei cawh a hnih balang be. Canghrasala Khri a lang tihtah Ama hratah ka cang tae peh tah cawh kaa hni, zecawtamaw tatah Ama cawh a cangnah ningtei hratah kaa hmuh a cawtah. Ama letei, ma hnabeisuinah a hnuipaw maikaw taco, Zisu Khri a pathaipaw hratah a pathai teitah aa ung.
A suapaw maikaw taco phungbia khah aa ro; A hmuisui teico, sua tahpaw cawh phungbia hratei ung ly khah a cang. Canghrasala Khri cawh kaa suanah lah pah hly rua pawtah a vongpaw a cang takhah naa hni. Taico Ama a chung leco suanah ung be. Ama a chung letah a ungpaw cawngsaw cawh sua leimei bei he. Suanah a tua leimei thlangpaw cawngsaw taco Ama khah hmuh be ca ka, hnih hrah be.
Dopaw sawtei sahlo, ahohmai a dungkheisah khe lo. A dingpaw hming a tuapaw cawngsaw cawh Khri a dingpaw hratah a ding hrah. A suapaw hming a tuapaw cawngsaw cawh Setan tei a cang, zecawtamaw tatah Setan cawh a hrangthoning taitah a sua leimeipaw a cang. Khazing Sawcapaw a vongnah a rawng cawh Setan a rai ro rua pawtah a cang. Khazing chung taitah a chuhpaw cawngsaw taco suanah khah tua paria thlang be, zecawtamaw tatah a chung lekhei Khazing thleci a ung; suanah letah sei leimei khy be, zecawtamaw tatah Khazing taitah a chuhpaw a cangnah cawtah a cang. 10 Ma heh Khazing sawtei sahlo le Setan sawtei sahlo kaa binah pawhe cawh a cang: Adingpaw hming a tua lypaw cawngsaw a cang ly leh a uny a do lypaw cawngsaw cawh Khazing sawtei cang be.
Pakheh le pakheh a do my lo
11 Ma heh a hrangthoning taitei naa za thuipaw bia khah a cang: Pakheh le pakheh ka do he peh tahpaw heh. 12 Mehchaw lypaw Setan a tei cang katei, a uny a thehpaw Kain hratah cang khe lo. Taico zecawtamaw ama cawh a thaw? Zecawtamaw tatah ama a tuasanah cawh a suapaw cang ka, a unypaw a tuasanah cawh a dingpaw a cangnah cawtah a cang. 13 Ka uny sahlo, khazaw tah a ca hua caco he, naa khuarawh chia kheh seh. 14 Thihnah taitah hringnah lang kaa pange myca tah cawh kaa hni, zecawtamaw tatah kaa uny sahlo khah kaa donah caw he tah a cang. A uny a do lypaw cawngsaw cawh thihnah letah a ungpaw a cang. 15 A uny a huapaw cawngsaw cawh lee a nongpaw cang ka; lee a nongpaw cawh a chung letah chaizaw hringnah hnui be takhah naa hni.
16 Khri tah kaa cawtah a hringnah a peh cawtah donah hmuisui cawh zemaw a cang tah cawh kaa hni. Ma hraco kaa uny sahlo cawtah kaaning zong kaa hringnah kaa peh hrápaw a cang. 17 Cawngsaw pakheh cawh hming le bo hnui ngetei ka, a unypaw a byhia khah a hmuh tihtah a cung letah ningdonah a hnui ly caco, Khazing donah a chung letah zekhatamaw a ung thai a? 18 Dopaw sawtei sahlo, ka donah he peh cawh rei le kaw tah cang lytah biahmuisui le tuasená tah a cang hri ruapaw a cang. 19 Ma cawh kaa tua tihtah biahmuisui letah kaa ung tah hnih peh ka, kaa lungthing tah sua a ma phosah tahmai tah a hmekaw letah lung khaitlawng teitah kaa ung. 20 Zecawtamaw tatah Khazing cawh kaa lungthing navy tah lai vy ka, zezongpui khah a hni.
21 Dopaw vesaw sahlo, kaa lungthing tah sua a ma phosah ly caco, Khazing hme letah raechahnah hnui peh ka, 22 kaa haepaw maikaw cawh Ama taitah kaa hmuh. Zecawtamaw tatah a biapeh sahlo nge he peh ka, Ama a lawng sahpaw hming kaa tua cawtah a cang. 23 Taico, ma heh a bia pehpaw cawh a cang. A Sawcapaw Zisu Khri a ming zing le Ama tei bia a ma pehpaw hratah pakheh le pakheh a do khah a cang. 24 A biapeh a ngepaw sahlo cawh a chung letah ung he ka, Ama zong aa chung letah a ung hrah. Taico ma heh kaa chung letah a hring tah kaa hninahpaw cawh a cang. Ama tei a ma pehpaw Thlawpaw thongtah kaa hnipaw a cang.