1 Glokoleanan ku nog kololaman ku, naꞌ amu mogdodaliꞌ tumud sog gotowanan koyon nog moktaluꞌ ilan nog ngon og bolakat nilan nog miktidu dia sog Mikpongon. Sugaꞌid non, pokilaila niu pa poguna bog dia taꞌ dodaꞌ miktidu sog Mikpongon. Poꞌ modakol og polopanadanan nog momali ilan nog diꞌ motud nog mikponuaꞌ dini sog dunya koni. 2 Bu og gindanan niu dun nog og bolakat koyon nog miktidu dia sog Mikpongon, maꞌ nini. Simasima og gotow nog mokpanad nog si Isukristu miktimaluy gotow, ion non ion og gindanan niu dun nog, og bolakat non koyon ion non nion og miktidu sog Mikpongon. 3 Tibua, ain ondiꞌ maꞌ nituꞌ og gustalan non dun nog si Isus miktimaluy gotow, og pikpanad non koyon, ion non ion og gindanan nog og bolakat non kituꞌ daꞌ dia miktidu sog Mikpongon. Sugaꞌid non, og bolakat koyon nog dion non, miktidu ion dia sog minanta kituꞌ dia ni Kristu. Ion non ion og midongog niu kituꞌ nog posunguꞌ pa matong saka, numun koni dini na.

4 Tibua amu, og gombataꞌanan ku, og sakup amu na nog Mikpongon. Saꞌan dinag na dianiu og polopanadanan koyon nog diꞌ motud, poꞌ og Bolakat nog Mikpongon og migonong dianiu. Bu og kopogbayaꞌ non labi pa dia sog kopogbayaꞌ nog bolakat nilan koyon dini sog dunya. 5 Og polopanadanan koyon nog diꞌ motud, sakup ilan nog dunya. Saꞌan ituꞌ og pogustalon nilan ain da og dini sog dunya. Bu og gotowanan dini sog dunya koni, mokinongog dianilan. 6 Tibua ita, og sakup ita na nog Mikpongon. Dadi, ain og kisunan non na og Mikpongon, mokinongog ion dianita. Tibua, ain og konaꞌ sakup nog Mikpongon, ondiꞌ ion mokinongog dianita. Dadi, maꞌ nituꞌ og kiindanoy ta dun og bolakat koyon nog motud bu og bolakat koyon nog diꞌ motud.

7 Glokoleanan ku nog kololaman ku, sumboy kobon non moglinolatoy ita. Poꞌ og Mikpongon, ion og poktiduan nog glolat. Og gotow nog milolat sog pakasiotow non, ion binataꞌ nog Mikpongon bu kosunan non na og Mikpongon. 8 Simasima ondiꞌ mololat, diꞌ non kosunan og Mikpongon. Poꞌ og Mikpongon og poktiduan nog glolat. 9 Og kopokpotongow nog Mikpongon nog glolaman non dianita maꞌ nini. Dinondag non og Bataꞌ non nog boktung mangoy dini sog dunya bagun ita kongonan nog kotubuꞌ nog daꞌ kopus non bianan dianon. 10 Og glolat kituꞌ nog pogolongon ku, konaꞌ og glolaman ta sog Mikpongon, sugaꞌid non, og glolaman nog Mikpongon dianita nog boyaꞌan lamig non tanan binogoy og Bataꞌ non mimung nog pomalas bagun ita kompunan sog dusaanan ta.

11 Glokoleanan ku nog kololaman ku, bila maꞌ nituꞌ ma og glolaman nog Mikpongon dianita, ita siꞌoy, sumboy moglinolatoy ita. 12 Poꞌ daꞌidun og gotow nog mikotongow nog Mikpongon. Tibua, bila moglinolatoy ita, og Mikpongon kobon non mogonong dianita. Dadi bila maꞌ nituꞌ, og glolaman nog Mikpongon, mituman na dianita.

13 Kisunan ta nog dia ita na sog Mikpongon bu ion siꞌoy dia na nita poꞌ sabap sog Bolakat non nog binogoy non dianita. 14 Bu ami, mitongow nami ion bu pigustal nami sog gotowanan nog, og Gamaꞌ ta nog Mikpongon, dinondag non og Bataꞌ non mangoy dini bagun ion mimung nog Polonabang nog gotowanan dini sog dunya. 15 Og gotow nog mogustal nog si Isus og Bataꞌ nog Mikpongon, kobon non og Mikpongon mogonong dianon. Bu ion siꞌoy, kobon non dia dosop sog Mikpongon. 16 Dadi, sumalig ita dia sog glolaman nog Mikpongon poꞌ kibianan ta na.

Og Mikpongon og poktiduan nog glolat. Dadi, simasima og pigboyaꞌan nog glolat, maꞌana non, dia ion kobon non sog Mikpongon bu og Mikpongon siꞌoy kobon non mogonong dianon. 17 Dadi bila maꞌ nituꞌ, dia noma nita og glolat, mituman na ituꞌ dianita. Saꞌan ondiꞌ ita na mondok bila matong na og gondow kituꞌ nog ukumon og glam nog gotow. Poꞌ minsan siꞌoy dini ita pa sog dunya koni, piglogilingan ta da og polomotadon ni Kristu. 18 Bila dia ita sog glolat, ondiꞌ ita mondok. Poꞌ og glolat koyon nog mituman, og mokawaꞌ nog gondok ta. Bila mondok ita, og maꞌana non, ondaꞌ pa kotuman og glolat kituꞌ dianita. Poꞌ saꞌan og gotow mondok poꞌ og dodomaan non poliholaꞌon ion.

19 Saꞌan mololat ita poꞌ og Mikpongon milolat poguna dianita. 20 Bila ngon gotow moktaluꞌ nog ion molalam sog Mikpongon saka mangit ion sog gilug non, og gotow koyon moloput. Poꞌ bila ondiꞌ ion mololat dia sog gilug non nog saka kobon non motongow non, olo ma og mogandun kolalam non dia sog Mikpongon nog saka ondiꞌ non motongow? 21 Dadi, koni og dondagan nog binogoy non dianita, simasima og gotow nog molalam sog Mikpongon, sumboy molalam dosop dia sog gilug non.