Og koduaꞌ Sulat ni
Jan
Og Piuna Taluꞌ paꞌali sog koduaꞌ Sulat ni Jan
Og koduaꞌ sulat ni Jan koni posunguꞌ dia sog poktanudanan dia ni Kristu. Og timpu nog kosulat non nini, ompihit tokodoy og kibonaꞌbonaꞌan nog ain tinumud dia ni Isukristu. Dadi, dinalil non og posunguꞌan nog sulat koni. Og maꞌana nog pigolong nog koyon nog glibun nog kololaman non bu og gombataꞌanan non, ion non ion og glumpuk nog poktanudanan bu og sakupanan nog glumpuk koyon. Og pigustal dini paꞌali sog kopokilolamuy nilan bu og podonsamaꞌ dianilan paꞌali sog polopanadanan kituꞌ nog diꞌ motud bu og pikpanad nilan.
1. Og bokna nog sulat koni, 1-3.
2. Og bololagaꞌ og glolat, 4-6.
3. Og pidonsamaꞌ paꞌali sog pikpanad kituꞌ nog diꞌ motud, 7-11.
4. Og doksuꞌan nog sulat koni, 12-14.
1
1 Akon, og mogulang nog bogolal niu sog tanud, sinumulat u nog sulat koni.
Og sulat u koni posunguꞌ dia sog glibun kituꞌ nog piniliꞌ nog Mikpongon, bu asta sog gombataꞌanan non kituꞌ nog kololaman ku bianan sog kopoksolabuk ta sog motud. Konaꞌ tibua nakon og molalam dianiu, sugaꞌid non, og glam nog mikosun kituꞌ nog motud. 2 Poꞌ og motud kituꞌ kobon non dianita, bu diꞌ ituꞌ mokulog dianita asta sog daꞌ kopus non.
3 Og tulung, glolat, bu og kotiknaꞌ nog pomikilan mongon dianita tidu sog Gamaꞌ ta nog Mikpongon, bu sog Bataꞌ non nog si Isukristu bianan sog tud ta sog motud paꞌali dia ni Kristu, bu sog glolaman non dianita.
Og motud bu og glolat
4 Landuꞌ og daꞌdaꞌan ku nog dangan kisunan ku nog, og duma gombataꞌanan mu, mikokunut ilan sog motud nog gustalan. Poꞌ maꞌ nion koyon og dondagan dianita nog Gamaꞌ ta nog Mikpongon. 5 Amoyamoy dianika, ika og kololaman ku, nog moglinolatoy ita glam ta. Konaꞌ ini bogu og dondagan koni nog sinulat u dianika. Poꞌ ion non ini og dondagan kituꞌ nog midongog ta tidu pa sog tolipunan. 6 Poꞌ maꞌ nini og kopokpotongow ta nog glolaman ta dia sog Mikpongon, bila og polomotadon ta dumalan dia sog dondagananan non. Bu midongog niu tidu pa sog tolipunan og dondagan non kituꞌ nog sumboy og glam non, inangon ta bianan dia sog glolat.
7 Modakol og polopanadanan nog momali ilan nog diꞌ motud nog minawaꞌ ilan na dianiu, bu migulit ilan dini sog dunya koni. Ilan koyon, ondiꞌ ilan tumud nog si Isukristu, miktimaluy ion og gotow. Og maꞌ nilan koyon og bolobigyakan, bu minanta ilan dia ni Kristu. 8 Pokpotubud amu dianilan bagun amu ondiꞌ kobolongan nog pogopasan ta kituꞌ, bu bagun niu motabuk og glam nog tumbas kituꞌ dianiu bianan sog kosolabuk niu dia sog Mikpongon. 9 Simasima sumop nog pianad ni Kristu, daꞌ dianon og Mikpongon. Tibua, ain og gotow nog daꞌ kosuoy og tud non dia sog pianad ni Kristu, dianon og Gamaꞌ ta nog Mikpongon bu og Bataꞌ non nog si Isukristu. 10 Bila ngon gotow tumuaꞌ dion niu nog saka ondiꞌ maꞌ nini og pokponadon non, naꞌ niu ion soginaon, bu naꞌ niu ion tolimaꞌon sog baloy niu. 11 Poꞌ simasima og gotow nog tumolimaꞌ dianon, mosunuꞌ ilan dosop dia sog kohinangan non koyon nog molaton.
12 Modakol pa bosia og poktoluꞌon ku dianiu, tibua, ondiꞌ u na sulaton. Sugaꞌid non, dodomaan ku dun nog mokangoy u da dion niu bagun ita niu mokopoktabuk babaꞌ, bu bagun da motoktub og daꞌdaꞌan ta.
13 Og gombataꞌanan nog gilug mu dini nog piniliꞌ dosop nog Mikpongon, minogina ilan dianika dion.