Og Sulat dia sog gotow
Hibruanan
Og Piuna Taluꞌ paꞌali sog Sulat diasog gotow Hibruanan
Og sulat koni posunguꞌ dia sog gotow Hibruanan nog poktanudanan ilan na dia ni Isukristu. Tibua, sabap sog kopokokunut nilan dia ni Isus, migdungag og sinsaan nilan bu og pokposakit dianilan nog boyaꞌan posunguꞌ ombagla og tanud nilan. Dadi, saꞌan ituꞌ og sulat koni pinoit dianilan poꞌ bagun kopondoloꞌisogan ilan moglogaga bu mongandol. Og sinumulat koni, pindoloꞌisogan non ilan bianan sog kopokpotantu non dianilan nog si Isukristu og motud nog Diwata, bu ion og kotontuan nog glam non sog pigdotuꞌan nog Mikpongon. Og gustalan non dun bianan sog tolu ginis nog motud paꞌali dia ni Isus: 1) Si Isus og Bataꞌ nog Mikpongon tidu sog donsamaꞌ asta sog daꞌ kopus non. Ion motas pa dia sog polomolatasanan kituꞌ kobon nituꞌ, bu dia sog moloikatanan kituꞌ, bu minsan pa dia ni Muses. Poꞌ ion og doksuꞌan nog pokpotampal paꞌali dia sog Mikpongon. 2) Si Isus, tinoluꞌan ion nog Mikpongon nog ion mogbolian asta sog daꞌ kopus non. Ion motas pa dia sog glam nog duma boliananan. 3) Bu bianan dia ni Isus, ain tumud dianon, motabang ilan tidu dia sog bayaꞌ nog dusa, bu dia sog gondok, bu dia sog pigboyaꞌan nog patoy. Poꞌ si Isus og motas nog bolian sog glam non, og migbogoy nog tantu tabang bagun og gotow mogawon tidu sog bayaꞌ nog dusa. Og piginang nog bansa Hibru sog kopoktanud nilan nog kopomalas nilan nog duguꞌ nog potubuꞌon, sagya da ituꞌ solianlian poꞌ si Isus og kotumanan bu og kotontuan non.
Bu bianan dia sog pononggiꞌan paꞌali sog kopongandol nog mokogulanganan nog bansa Israel kobon nituꞌ, og sinumulat koni, pingoningoni non dia sog ain tinumabuk na dia ni Isukristu nog popogonon nilan og tud nilan asta sog doksuꞌan. Bu si Isus og pogbontayan nilan bu poglogilingan nilan. Bu sumboy gogaan nilan minsan olo og sinsaan bu og posakit matong dianilan. Sog doksuꞌan nog libru koni, og pomali bu og pidonsamaꞌ tumaluꞌ.
1. Dia ni Kristu kotongow og Mikpongon, 1:1-3.
2. Si Kristu labi pa kotas dia sog moloikatanan, 1:4–2:18.
3. Si Kristu labi pa kotas dia ni Muses bu dia ni Josua, 3:1–4:13.
4. Ondiꞌ kolobian og bayaꞌ nog kopogbolian ni Kristu, 4:14–7:28.
5. Ondiꞌ kolobian og bayaꞌ nog koposadan ni Kristu, 8:1–9:28.
6. Ondiꞌ kolobian og kopomalas ni Kristu, 10:1-31.
7. Og kopongandol og bololagaꞌ sog glam non, 11:1–12:25.
8. Og gluksadan nog gustalan, 13:1-25.
1
Og taluꞌ nog Mikpongon pilatas bianan dia sog Bataꞌ non
1 Og Mikpongon, tatap non na polotason og taluꞌ non dia sog munaotowanan ta kobon nituꞌ bu miglologinis og bianan non mokpolatas dun bianan sog polomolatasanan non. 2 Tibua, og tang koni nog gimpusan na nog gondow, pilatas non na og taluꞌ non dianita pibian dia sog Bataꞌ non. Poꞌ bianan sog Bataꞌ non, piongon non og pigloban nog glangit bu glupaꞌan. Bu ion og tinonduꞌ nog Mikpongon nog ion makod nog glam non. 3 Bu motongow dianon og silow nog kotas nog Mikpongon poꞌ migbatuk ilan nog gasal. Bu ion og mikpopagon nog piongon bianan sog sagya taluꞌ non. Bu dangan midoksuꞌ ion imungoy nog gugas nog dusaanan nog gotow, minangoy ion sog glangit bu miningkud ion dia sog dapit sog glintu nog Mikpongon nog ion og Pogbayaꞌ sog glam non.
Og kotas nog Bataꞌ non
4 Dadi, og Bataꞌ nog Mikpongon, inimung ion nog motas pa dia sog moloikatanan poꞌ motas pa dianilan og ngalan koyon nog binogoy nog Mikpongon dianon. 5 Poꞌ og Mikpongon, daꞌ poktaluꞌ dia sog moloikatanan non minsan sog sala kotow siꞌoy dianilan, nog ilan og gombataꞌ non. Tibua, og Bataꞌ non tinoluꞌan non nog,
“Ika og Bataꞌ u.
Bu gondow koni miimung u nog Gamaꞌ mu.”*1:5 Salmu 2:7
Bu miktaluꞌ dosop ion maꞌ nini,
“Akon, miimung u nog Gamaꞌ non
bu ion miimung nog Bataꞌ u.”†1:5 2 Samuel 7:14
6 Bu bila popongoyon non mokpuliꞌ dini og Bataꞌ non sog glupaꞌan koni, nog ion mikuna sog glam nog gombataꞌanan non, mikpodonsamaꞌ tumaluꞌ og Mikpongon nog,
“Sumboy ion og poktomuyon nog glam nog moloikatanan nog Mikpongon.”‡1:6 Deuteronomy 32:43
7 Tibua, paꞌali sog moloikatanan koyon, misulat dia sog Kitab og taluꞌ nog Mikpongon nog,
“Og moloikatanan non mokodaliꞌ domikian da mamaꞌ nog galuꞌ. Og dodondagonanan non mokodasig domikian da mamaꞌ nog gligaꞌ nog gapuy.”§1:7 Salmu 104:4
8 Tibua, paꞌali sog Bataꞌ non, misulat dosop dia sog Kitab og taluꞌ nog Mikpongon nog,
“O Diwata, og kopogdatuꞌ mu kobon non, asta sog daꞌ kopus non. Bu og kopogokbit mu sog pigotowan mu modulus. 9 Bu ombaꞌis mu ain modulus nog polomotadon bu molaton mu ain diꞌ kituꞌ pia. Dadi, og Mikpongon nog ion og poktomuyon mu, bianan sog kolana non dianika nog glana nog gloliag, piotas non pa ika nog labi a pa dia sog dumaanan mu.”*1:9 Salmu 45:6-7
10 Bu miktaluꞌ dosop ion nog,
“Ika og Pogbayaꞌ. Bu tidu pa sog tolipunan, ika og mikpongon nog pigloban nog glangit bu glupaꞌan. 11 Bu ngon gondow non og glam non koyon mimung mondaꞌ na, tibua, ika ondiꞌ a moksop. Bu og glam non koyon omputak da mamaꞌ nog ponopoton. 12 Bu lupiꞌon mu dosop mamaꞌ nog glogdoy. Bu suklian mu dosop mamaꞌ nog ponopoton. Tibua ika, ondiꞌ a nododaꞌ moksop poꞌ ika da kobon non asta sog daꞌ kopus non.”†1:12 Salmu 102:25-27
13 Bu og Mikpongon, daꞌ ion poktaluꞌ sog minsan sala buk siꞌoy nog moloikatanan non nog maꞌ nog tinaluꞌ non kituꞌ dia sog Bataꞌ non nog,
“Ika, ingkud a dini sog glintu u asta imungon ku og glam nog bantaanan mu nog gindogan nog botis mu.”‡1:13 Salmu 110:1
14 Dadi, bila maꞌ nituꞌ nog og Bataꞌ non motas pa sog moloikatanan, olo gidoy buan og polosukuꞌan nog moloikatanan koyon? Maꞌ nini. Ilan koyon og sosoligananan nog Mikpongon bu dodondagonanan non nog diꞌ ta motongow nog tumabang sog ain bogayan nog kotubuꞌ nog daꞌ kopus non.