Og Gombaꞌis nog Guksugan paꞌali dia ni Isukristu nog sinulat ni
Matiu
Og Piuna Taluꞌ paꞌali sog Gombaꞌis nog Guksugan nog Sinulat ni Matiu
Og libru koni nog sinulat ni Matiu, iningolanan og Gombaꞌis nog Guksugan. Ion non ini og mokposun nog molongas nog guksugan nog si Isus, ion og pinasad kituꞌ nog Polonabang, bu bianan dianon, tinuman nog Mikpongon og pasadanan non kituꞌ nog pinasad non dia sog pigotowan non sog masa pa nog kobon nituꞌ. Si Isus, ion og Kristu. Og maꞌana non, ion donsamaꞌ na Pipangoy nog Mikpongon Mogdatuꞌ dini sog dunya. Og pogolongon ta koni nog Gombaꞌis nog Guksugan, konaꞌ tibua ini dia podongogoy sog bansa Hudyu, sugaꞌid non, pulonagon ini dia sog gliwag nog dunya koni.
Og sinulat ni Matiu koni, pigusoyusoyan non mokpaꞌatpaꞌat. Tinolipunan non moguksug paꞌali sog kobataꞌ dia ni Isus, mangoy sog kobunyag bu kopongyubaꞌ kituꞌ dianon, bu og gininang non kituꞌ nog mogustal, mokpanad, bu mokpokodag nog ain og diꞌ mokokodag dituꞌ sog Galili. Tubus nituꞌ, sinulat non dosop paꞌali sog piginang ni Isus sog kangoy non kituꞌ tidu dituꞌ sog Galili mangoy sog Jerusalem, bu kibianbianan non kituꞌ sog gimpusan nog simana non, tiduan sog kolansang dianon sog kudus asta sog kopotubuꞌ dianon tidu sog patoy.
Dini kotongow sog sulat koni, nog si Isus dodaꞌ og motas nog Polopanad nog togo bayaꞌ mongmaꞌana nog botad kituꞌ nog miktidu sog Mikpongon. Bu ion og mokpanad paꞌali dia sog pigdotuꞌan nog Mikpongon. Kodokolan nog pikponadan non kinumpung sog lima ginis nog pogonadan. Og tiganaꞌ, motongow sog kopituluanan 5-7 og gustalan non sog gotowanan dituꞌ sog bulud, paꞌali sog polomotadon, sog polosukuꞌan, sog kopogbayaꞌ, bu sog posunguꞌan nog ain og misakup na sog pigdotuꞌan nog Mikpongon. Og koduaꞌ non, motongow sog kopitulu 10 og pomali non dia sog sopuluꞌ bu duaꞌ sulangguꞌanan non paꞌali dia sog ginang nilan sog ain kongayan nilan mogustal. Og kotolu non, motongow dia sog kopitulu 15 og pononggiꞌan paꞌali dia sog pigdotuꞌan nog Mikpongon. Og kopat non, motongow dia sog kopitulu 18 og pianad non paꞌali sog maꞌana nog kopoksulangguꞌ. Og kolima non motongow dia sog kopituluanan nog 24-25 nog, ion non ion og pianad paꞌali sog doksuꞌan nog numun koni, bu og posunguꞌ kituꞌ matong nog pigdotuꞌan nog Mikpongon.
1. Og gusulan nog munaotowanan kituꞌ bu og kobataꞌ dia ni Isukristu, 1:1–2:23.
2. Og piginang ni Jan nog Polomunyag, 3:1-12.
3. Og kopogbunyag bu og kopongyubaꞌ dia ni Isus, 3:13–4:11.
4. Og piginang ni Isus sog kodokolan nog gotowanan dituꞌ sog Galili, 4:12–18:35.
5. Og piginang ni Isus sog kopanow non kituꞌ tidu sog Galili mangoy dituꞌ sog Jerusalem, 19:1–20:34.
6. Og gimpusan nog simana non dituꞌ sog Jerusalem bu sog glumibut nog gimbolayan koyon dion, 21:1–27:66.
7. Og kopotubuꞌ dianon tidu sog patoy bu og kopokpotongow non sog gotowanan, 28:1-20
1
Pikpongkatan ni Isus
Luk 3:23-38
1 Ion non ini og sinulat paꞌali sog pikpongkatan ni Isukristu, nog ion tidu sog pangkat ni Datuꞌ Dabid. Bu si Datuꞌ Dabid tidu dosop sog pangkat ni Abraham. 2 Si Abraham og gamaꞌ ni Isak. Si Isak og gamaꞌ ni Jakub. Si Jakub og gamaꞌ ni loꞌ Juda bu pigilugananan non. 3 Si Juda og gamaꞌ ni loꞌ Peres bu Sera, bu og ginaꞌ nilan si Tamar. Si Peres og gamaꞌ ni Hesron. Bu si Hesron og gamaꞌ ni Ram. 4 Si Ram og gamaꞌ ni Aminadab. Si Aminadab og gamaꞌ ni Nason bu si Nason og gamaꞌ ni Salmun. 5 Si Salmun og gamaꞌ ni Buas. Og ginaꞌ ni Buas ion non si Rahab. Si Buas og gamaꞌ ni Obed bu og ginaꞌ ni Obed si Rut. Si Obed og gamaꞌ ni Jese. 6 Si Jese og gamaꞌ ni Datuꞌ Dabid. Si Datuꞌ Dabid og gamaꞌ ni Solomon. Og ginaꞌ ni Solomon og kiboluan ni Urias. 7 Si Solomon og gamaꞌ ni Rehobuam. Si Rehobuam og gamaꞌ ni Abidya bu si Abidya og gamaꞌ ni Asa. 8 Si Asa og gamaꞌ ni Jehosapat. Si Jehosapat og gamaꞌ ni Joram bu si Joram og gamaꞌ ni Usia. 9 Si Usia og gamaꞌ ni Jotam. Si Jotam og gamaꞌ ni Ahas bu si Ahas og gamaꞌ ni Hesekaya. 10 Si Hesekaya og gamaꞌ ni Manase. Si Manase og gamaꞌ ni Amon bu si Amon og gamaꞌ ni Josia. 11 Si Josia og gamaꞌ ni loꞌ Jekonia bu pigilugananan non. Ion non ituꞌ og masa nog kobihag dia sog gotow Israelanan nog pinitang ilan dituꞌ sog bonua nog Babilon.
12 Dangan mitubus bihagoy og gotow Israelanan sog Babilon, si Jekonia og gamaꞌ ni Salatiel bu si Salatiel ion og gamaꞌ ni Serubabel. 13 Si Serubabel og gamaꞌ ni Abiud. Si Abiud ion non og gamaꞌ ni Eliakim bu si Eliakim og gamaꞌ ni Asur. 14 Si Asur og gamaꞌ ni Saduk. Si Saduk og gamaꞌ ni Akim bu si Akim og gamaꞌ ni Eliud. 15 Si Eliud og gamaꞌ ni Eliesar bu si Eliesar og gamaꞌ ni Matan bu si Matan og gamaꞌ ni Jakub. 16 Si Jakub og gamaꞌ ni Jusep, og duoy ni Jusep si Maria og ginaꞌ ni Isus. Si Isus, ion non ion og iningolanan kituꞌ nog Kristu.*1:16 Og Kristu koni og Ginirik. Og maꞌana non og Pipangoy nog Mikpongon Mogdatuꞌ dini sog dunya.
17 Dadi, ongon sopuluꞌ bu pat pangkat tidu dia ni Abraham mangoy dia ni Dabid. Bu ongon sop sopuluꞌ bu pat pangkat tidu dia ni Dabid mangoy dia sog kobihag kituꞌ dia sog gotow Israelanan sog Babilon. Bu ongon dosop sopuluꞌ bu pat pangkat tidu dituꞌ mangoy sog kobataꞌ dia sog Kristu.
Og kobataꞌ dia ni Isukristu
Luk 2:1-7
18 Maꞌ nini og bianbian paꞌali sog kobataꞌ dia ni Isukristu. Si Maria, og ginaꞌ ni Isus, pigbayal ilan na ni Jusep. Tibua, sog daꞌ ilan pa pogampuꞌ ni Jusep, kisunan non na nog ion pogbogat bianan sog Bolakat nog Mikpongon. 19 Sabap nog si Jusep koni midulus, dangan kisunan non nog migbogat na si Maria, mipikil non nog diꞌ non na ion pogduoyon. Sugaꞌid non, pogudasan non na si Maria nog ilanilan da poꞌ ompok ion nog kosipogan si Maria.
20 Dadi, sintak non mokpikilpikil dun, mikotulug ion. Sog solian non koyon motulug, tinumuaꞌ dianon bianan sog toginopon og moloikat nog Mikpongon mangka poktaluꞌ nog, “Ika, Jusep, og pangkat a ni Dabid, naꞌ a mogalangalang mogduoy dia ni Maria. Poꞌ saꞌan ion migbogat poꞌ bianan sog Bolakat nog Mikpongon. 21 Mogbataꞌ ion nog glaki bu ingolanoy mu ion nog Isus poꞌ tobangon non og pigotowanan non tidu sog dusaanan nilan.”
22 Og glam nog bianbian koni, ion non og kotumanan nog tinaluꞌ kituꞌ nog Mikpongon bianan sog polomolatas nog taluꞌ non nog si Isaya nog, 23 “Ongon og sala kotow dolaga nog daꞌ sibon kotuyok, mogbodos mangka pogbataꞌ nog glaki. Og bataꞌ non koyon ingolanan nog Emanuel.”†1:23 Isaya 7:14 Somoꞌ ita da, og Mikpongon dia na nita.
24 Dangan mitanud si Jusep, inunut non og tinaluꞌ nog moloikat kituꞌ nog Mikpongon dianon. Dadi, pigduoy non si Maria. 25 Tibua, daꞌ non tuyokoy si Maria taman da daꞌ non botaꞌoy og bataꞌ non koyon nog glaki. Dadi, iningolanan non og bataꞌ koyon nog Isus.