1 Dadi, sabap sog kopongandol ta dianon, mawaꞌ na og dusaanan ta dianon bu moglogomigus ita na nog Mikpongon bianan sog Kounutan ta nog si Isukristu. 2 Poꞌ bianan dianon, tinulung ita na nog Mikpongon sabap sog kopongandol ta dianon. Bu og tulung nog Mikpongon mimung og pagon nog kotubuꞌ ta dianon. Bu migdaꞌdaꞌ ita sabap sog dodomaan ta nog ngon gondow non, moksolabuk ita dia sog glongas nog Mikpongon. 3 Bu mogdaꞌdaꞌ ita dosop numun kituꞌ poꞌ mikobian ita sog sinsaan. Poꞌ kosunan ta da nog bianan sog sinsaan, mimung mipagon og tud ta. 4 Bu bianan dosop sog kopagon nog tud ta, mimung dosop og polomotadon ta nog kosuꞌatan og Mikpongon dun. Bu bianan sog polomotadon koyon nog kisuꞌatan og Mikpongon dun, mimung dosop nog ngon dodomaan ta dianon. 5 Bu og dodomaan ta kituꞌ dianon, kosunan ta nog tumanon non nododaꞌ poꞌ og Mikpongon, binunag non og glolaman non sog dialom pusung ta bianan sog Bolakat non nog binogoy non dianita.

6 Poꞌ kobon nog pigboyaꞌan ita pa nog dusa, minatong tang nog mosuꞌat sog Mikpongon nog soliuan ni Kristu sog patoy og bolodusaon. 7 Kosunan ta nog moliang sog gotow og sumoliu matoy sog pakasiotow non nog daꞌidun tokodoy salaꞌ non. Tibua, bila sopolati non ngon gotow molongas bolotabat non, tingala ngon bayuꞌ og gotow nog moktigolow sumoliu matoy dianon. 8 Tibua, og Mikpongon, sabap sog landuꞌ glolaman non dianita, minsan siꞌoy dia ita sog dialom nog dusa, sinoliuan ita da ni Kristu sog patoy. 9 Dadi, og maꞌana non, kotoluꞌan ita nog daꞌ na og dusa ta bianan sog duguꞌ non nog miglayas. Bu konaꞌ tibua nituꞌ poꞌ migawon ita dosop tidu sog polihalaꞌ bosia nog Mikpongon dia sog gotowanan. 10 Poꞌ kobon nog banta ita pa nog Mikpongon, tiniguliꞌ non ita bianan sog kopatoy nog Bataꞌ non, labi na numun koni tobangon non dosop ita bianan sog kotubuꞌ non tidu sog patoy, poꞌ donsamaꞌ ita na tiniguliꞌ dianon. 11 Bu konaꞌ tibua nituꞌ, sugaꞌid non, mikpogdaꞌdaꞌ ita na sabap sog glam nog miinang nog Mikpongon dianita bianan dia sog Kounutan ta nog si Isukristu. Poꞌ bianan sog kopatoy non, mitiguliꞌ ita na dia sog Mikpongon.

12 Og dusa nog migulit sog glam nog gotow dini sog glupaꞌan, sabap da sog sala kotow gotow nog mikodusa. Bu sabap sog dusa, matoy og gotow dun. Dadi, saꞌan matoy og glam nog gotow poꞌ sabap sog glam nog gotow mikodusa. 13 Poꞌ minsan sog masa nog daꞌ pa bogoyoy og Botad kituꞌ, og gotowanan mikodusa na. Tibua, somoꞌ daꞌidun Botad kituꞌ, daꞌidun dosop og tontongan nog dusa. 14 Tibua, minsan siꞌoy maꞌ nituꞌ, tidu sog masa ni Apuꞌ Adan mangoy sog masa ni Apuꞌ Muses, og gotowanan mikpomatoy da minsan siꞌoy og dusa nilan sog Mikpongon, ondiꞌ maꞌ nog dusa ni Apuꞌ Adan kituꞌ nog kopongantu non dia sog Mikpongon.

Si Apuꞌ Adan kituꞌ, domikian mamaꞌ nog glogyawan poꞌ ngon dosop sala kotow gotow tumoluyuk dianon. 15 Tibua, daꞌ ilan da pogbatuk poꞌ daꞌ pogbatuk og doksuꞌan nog dusa ni Apuꞌ Adan kituꞌ bu og glolat nog Mikpongon sog gotowanan. Poꞌ modakol nog gotow minatoy kobal nog dusa nog sala kotow nog si Apuꞌ Adan. Tibua, og dusa ondiꞌ mokantu sog tulung nog Mikpongon bu og binogoy non kituꞌ dia sog gotowanan bianan sog glolat bu glolaman nog sala kotow nog si Isukristu. 16 Poꞌ ngon dodaꞌ og piktingkaan nog doksuꞌan nog miktidu sog duaꞌ kotow koyon. Poꞌ tidu sog solabuk da og dusa ni Apuꞌ Adan kituꞌ, miimung poliholaꞌon glam nog gotow dun. Poꞌ glam nog gotow bolodusaon. Tibua, sabap sog glolat nog Mikpongon nog binogoy non sog gotowanan, og gotow kotoluꞌan nog Mikpongon nog daꞌ na og dusa non. 17 Poꞌ sabap sog dusa nog sala kotow kituꞌ, og patoy migbayaꞌ dia sog gotowanan. Golom pa og doksuꞌan nog miinang nog sala kotow kituꞌ nog si Isukristu. Poꞌ simasima gotow tumabuk nog mosolag koni nog tulung, bu og kodulusan nog binogoy nog Mikpongon sog gotowanan, kobogayan ion nog bayaꞌ mogbayaꞌ dia sog kotubuꞌ non bianan sog sala kotow kituꞌ nog si Isukristu.

18 Dadi, og doksuꞌan nog sala kotow nog mikodusa kituꞌ, miimung glam nog gotow poliholaꞌon nog Mikpongon. Bigyaꞌ non, og doksuꞌan nog ginang nog sala kotow kituꞌ nog kodulusan, miimung mogawon glam nog gotow dun tidu sog dusaanan nilan bu mimung dosop nog kotubuꞌ nilan. 19 Bu sabap sog kopongantu nog sala kotow kituꞌ dia sog Mikpongon, miimung bolodusaon og glam nog gotow. Saka, sabap sog kopokokunut nog sala kotow kituꞌ dia sog glegan nog Mikpongon, mimung modakol og gotowanan nog midulus dun.

20 Poꞌ dangan binogoy og Botad kituꞌ, miimung migdungag og dusaanan dun. Tibua, minsan siꞌoy migdungag og dusaanan nog gotow, labi pa dituꞌ og tulung nog Mikpongon. 21 Dadi, sabap sog patoy, motongow og bayaꞌ nog dusa. Domikian dosop nog bianan sog kodulusan, motongow og bayaꞌ nog tulung nog Mikpongon nog boyaꞌan ombokbit ita dia sog kotubuꞌ nog daꞌ kopus non bianan sog Kounutan ta nog si Isukristu.