1 <<A ran shi dǝm lep-Naan ɗe Ekǝlisya ɗi Sarduis wur ɗen Ekǝlisya ɗe nǝn nyil Afisus nǝnee, << Lep ɗesǝ nǝ, a pwoo ɗe nǝ put mpwoo kǝ gwar ɗe wur kǝ zar mo pwoovǝl nsarse wur sǝ, ɗe wur mwaan nnaar kǝ peele ngyem ɗe pwoovǝl sǝ mo, ɗe mo ɗak mo a shi zinariya sǝ. 2 Wen man ɗak ɗe wun kǝ ten cin nǝ, kǝ jeel fuu, kǝ gung fuu zak. Baa wuu shaar kǝ nenɗebish mo kas. Wuu cam shiimwaan kǝ nen ɗe mo sat nǝnee, << wuɗun a jeplep Jesu mo, mɓe baa mo a jeplep Kristi kas. Wuu ten wu man ne, moo cin a ɗung. 3 Wu gung, koo ɗe wun nkaa shwaajeel mbǝ sǝm fen, ɓe taji wu baa mɓwoon kas. 4 Amma an ɗe kǝ mee mbii mǝndong nkaa wun ɗe an kǝn rǝɓet sat nǝ nwun. Baa wu kuɗi wuu wal nghan kaa ɗe gyet wuu wal an nshee sǝ kas. 5 Taji wu mander nshiimwaan fuu ɗe gyet yam, akuɗang wuu táa wu pal sǝ kas. Wu tuwap, mbǝkǝ wu baa wu mwaan ɗe ndǝǝn ar nǝ, kaa gyet yam sǝ. Katɗang baa wu tuwap kas, ɓe an mbǝ jì, kǝ an mang peele ngyem nǝ ɗe a peeɗar ni. 6 Ɗangbe mbǝ mbii mǝndong ɗe an kǝ kwoop wun mbǝ nǝ a nɗǝsi, baa ɗyeen wun mbǝ ɗak nen Nikolaitan mo kas, kaaɗǝ baa nǝ a ɗyeen fen kas sǝ.

7 Ngwe ɗe wur kǝ kom, mbǝ kǝlǝngpee ɓe wur kǝlǝng mbǝɗe Riin nǝ nkaa sat nǝ nendǝm ɗangnaan mo, <<Ngwe ɗe wur se koorong, ɓe an ncin pee nwur se laatǝng ɗe nǝ a mǝ seen, ɗe nǝ kàa ndǝǝn bong kǝ Naan.>>

8 <<A ran lep dǝm pee ngulep Naan ɗe wur ɗǝǝn Ekǝlisya ɗe nǝn nyil nSimena nǝnee, <<Lep ɗesǝ nǝ a pwoo ɗe nǝ put mpwoo kǝ gwar ɗe wur a ɗinshee, kǝ a wur a kyes kǝ mbǝ mo jir, ɗe gyet wur kǝ muut, mɓe yaksǝ wur kǝ seen.

9 Wen man shwa jeel fuu mo kǝ jeel fuu, kǝ zak, nghan man nǝnee, << Jir kǝ sǝ wun a nenlong mo. Wen man pwoo ɗebish mǝ nen ɗe moo lesut a nen Yahudi mo, ɓe baa mo a nen Yahudi mo kas. Mo a nen kǝ ngujwaan mo. 10 Taji wu kat mee kǝǝrmuut nkaa jeel ɗe wun mbǝ shwaa nǝ kas. A kǝleng, nGujwaan wur cam wun. Wur nle pak fuu mo ndǝǝn lushoot, wun nshwaajeel mbǝ teer mo kaapaat. Mbe wu gung, taji wu cii an kas, koo ɗe mo ntǝtwe wun, ɓe wu gung, mbǝkǝ an cin biikaa koorong mǝ seen ɗeɗes nwun.

11 Ngwe ɗe wur kǝ kom, ɓe wur kǝlǝng mbǝɗe Riin wur nkaa sat nǝ (Ekǝlisya) nendǝm ndang Naan mo. Ngwe ɗe wur se koorong, ɓe baa muut ɗe vǝl nǝn ntung wur kas.>>

12 <<A ran lep dǝm pee ngulep Naan ɗe wur Ekǝlisya ɗe nen nyil Pagamum nǝ, Lep ɗesǝ nǝ put a mpwoo kǝ gwar ɗe wur kǝ kwai ɗe nǝ se koop vǝl sǝ. 13 Wen man, npee ɗe wuu tong ɗe nǝ, ɓe ngujwaan wur kǝ le mpeetong fǝn a pee mǝ nǝ. jir kǝsǝ ɓe wuu yaa sǝm fǝn ɓalɓal. Baa wu nyan shin zeenpwoo fǝn kas, kaaɗǝ gyet ɗǝǝn teer mǝ Antipas mo ngucìn langteng fǝn mɓǝ mo tu wur nɗǝǝn yilkaam fu peeɗe shetaan kǝ tong.

14 Mbe an kǝ rep pak mbǝ mo lee nkaa wun. Wun kǝ pak gurum mo nnaar fuu, ɗe moo dǝm a nɗang kám mǝ Balaam. Gyet a Balaam wur kám mBalak, kǝ wur gangkwak nen Izrel mo, mbe gyet mo shin shikbish mbǝ se mbiise ɗe gyet mo kǝ ten cin nkùm, kǝ cin mbǝ ɗebish mo kaa ngaa sǝ. 15 Kǝzak, wun kǝ nen ɗe moo dǝm nɗang kám nǝn Nikolaus mo. 16 Wu tuwap, kas ɓe an kus kǝ jì, kun cin lek ɗe kǝ wun, shi kwai fǝn ɗe nǝ jì put mpwoo fǝn sǝ.

17 Ngwe ɗe wur kǝ kom, mbǝ kǝlǝngpee, ɓe wur kǝlǝng mbǝɗe Riin Naan wur nkaa sat nǝ Ekǝlisya nendǝm ndang Naan mo.>>

Ngwe ɗe wur se koorong, ɓe nghan ncin pak man ɗe nǝ a sǝsok nwur. Kǝ zak, an ncin jwak ɗepiyaa ngwar nǝ, kǝ sǝm ɗepwoo a rǝran ɗi kǝ nkaa jwak nǝ. Gwar ɗe wur nlap jwak nǝ, ɓe a wur man mbǝɗe mo ran nkaa nǝ ɓejee ɗak.

18 <<A ran lep dǝm pee ngulep Naan ɗe wur tap kǝ Ekǝlisya ɗe nǝn nyil nTayatǝra nǝ, Lep ɗesǝ nǝ put a mpwoo kǝ Làa kǝ Naan ɗe yit wur moo lapwus kaa mbǝlem kǝ wus sǝ, ɗe shii wur moo mǝlep kaa shool ɗe mo tap ɗak nǝ sǝ. 19 Wen man ɗak fuu mo, kǝ wal fuu, kǝ cinzeen fuu, kǝ ɗak ɓam ɗe wu cin mo, kǝ gung fuu, kǝ zak, yaksǝ ɓe wun nkaa cin ɗak nǝ met ɗe gyet wu cin mo nshee. 20 Mbǝ jir kǝsǝ, ɓe an kǝ mbǝ ɗesǝ mo nkaa ɗel ɗekǝ ɗǝsǝ moo nkaa wun. Mɓeɗe wu tap wu kiyee mat ɗe moo pet war a Jezebel sǝ, ɗe war pet set a mat satpwoo kǝ Naan. A shi ar kám war, ɓe war le kǝ kǝrem fǝn mo cin mbǝ ɗebish mo kaa cin ngaa, kǝ se mbiise ɗe mo kǝ ten cin nkùm. 21 Wen kǝn shin pee nwar, mbǝkǝ war tuwap ɗǝ, ɓe war cii tuwap mbǝ shikbish war, ɗe nǝ a mǝ ngaa. 22 Wen nle kǝ shwal yaa war ɗǝ, kǝ nen ɗe moo cin ngaa ashak kǝ war, katɗang baa mo tuwap kas, kǝ mo nook cin mbii ɗebish mǝnǝ mo kas, ɓe nghan shin jeel mo. 23 Wen nle kǝ jep war mo murep kǝ shwal, mbǝkǝ Ekǝlisya mo jir mo man ɗi nǝnee, << an a ngwe ɗe an kǝn man pan ɗe nǝ nɗǝǝn pǝtuup gurum mo, kǝ zak, an kǝn leng pǝtuup mo mo. Wen nkwat koo a weye nciit kǝ ɗak ɗe ngwe nǝ kǝ ten cin.

24 Yaksǝ kǝn nsat wun koor nen Tayatǝra, ɗe baa wu lap kám nǝ kas, baa wu man mbii ɗebish, ɗe gurum moo pet nǝ a ɗe sǝsok ndǝr mǝ Shetan kas, baa an le teng kaa wun kǝ mee leeton kas. 25 Wu ɗar ɓalɓal nɗǝǝn mbiiɗe wuu ten wu kám, ɗang mbaa njì.

26 mbe gwar ɗe wur se koorong, ɗang wur cin ɗyen fǝn, dǝm sul, an shin ɓal nkaa yil nǝ mo. 27 Mo ncìn mulki nkaa yil nǝ mo, a shi kám shool, ɗang mo mpyan mo, a kaa tuulwan ɗe gurum kǝ piin nǝ sǝ, kaaɗe wen kǝn kat ɓal nsar puun fen sǝ 28 ɓe an nshin zar mangɓit ngwar mǝnǝ. 29 Ngwe ɗe wur kǝ kom, mbǝ kǝlǝngpee, ɓe wur kǝlǝng mbǝɗe Riin Naan nǝ sat luu Naan nǝ mo>>