1 A ghan Pool kǝrem nDaa Naan, kǝ laalep mǝ Daa Jesu Kristi, ran wasika ɗesǝ nǝ. A Jesu wur bilip ghan, mbǝkǝ nghan ɓam nen ɗe Naan wur kǝ ten bilip mo, mbǝkǝ shinzeen mo wurang ɗe nɗǝǝn Naan, kǝzak, mbǝkǝ mo man zeen nǝ ɗe jir nkaa ar kǝ Naan. 2 Kǝ mo leyit fur mo ɗe nkaa seen ɗe nǝ azeen, ɗe ngha-ngha. Naan ɗe baa wur cìn ɗung kas, wur kǝ ten sat nǝ, wur shin seen mǝnǝ ngurum mo. 3 Nciit-nciit kǝgam pee nǝ, ɓe wur nwoo seen ɗesǝ nǝ agaak shi pwoo wur, ɗewur kǝ ten le nǝ nsar fen. A Naan ɗewur ɓam mun, a wur a ngwe ɗewur ten lep nghan, mbǝkǝ ghan satpwoo wur ɗe ngurum mo. 4 Wen nkaa ran wasika ɗesǝ nghan Titus, làa fen ɗe azeen-nzeen nɗǝǝn shinzeen, ɗe mun kǝ nǝ vǝl. Ɗeret, kǝ ryang pee Naan puun nJesu Kristi Nguɓam fun, mo tong ashak kǝ waa.

5 Mbii ɗe nǝ le kǝ nghan yit waa nyil nKrit, a mbǝkǝ gha sǝǝt a ɗak mbii mo ɗe ndǝre-ndǝre, kǝ gha bilip nennan mo ɗe mbee jir lu nNaan ɗeɗang ghi, ɗe nǝ nɗǝǝn nyil nKrit. Taji a mundǝr mbii ɗe dǝ nsat nghan kas. 6 Jir we ɗe a bilip kaa ngunan sǝ, ɓe nǝ a tǝng kǝ gwar mǝnǝ kǝ mǝse ɗeret, ngwe ɗewur kǝ mat a mǝndong ɓejee ɗak. Kǝ jep wur mo zak, nǝ a tǝng kǝ mo ɗen a nen ɗe mo shinzeen. Ngwe ɗe mǝse wur nǝ mak le kǝ gurum mo naa nǝ, baa wur a ngucìn mbii ɗebish kas, kǝzak, baa a ngukáaɓál kas. 7 Jir a wii ɗewur a ɗeɗes nɗǝǝn nendǝm ndang Naan mo, ɓe wur naa a mbii ɗe mo a mǝ Naan. Mbǝmǝnǝ, ɓe mǝse wur nǝ a tǝng kǝ nǝ ɗee a ɗeret. Baa wur nɗee a nguroop, jir a ngwe ɗe mbii kǝkǝlak làa wur mɓut kas. Baa wur nshwaa am anab (filip) kǝ nǝ yuur wur ɗe kas, baa wur a nguɓwanbish kas. Baa wur a ngurǝɓet mbii mbee kat lǝɓet ɗebuu kas. 8 Ni ret kǝ wur ɗee a ngula gurum mo nɗǝǝn tulu wur. Nǝ a tǝng kǝ wur wal mbii ɗeret mo. Nǝ ret kǝ wur ɗee a ngwe ɗe mwaan wur nǝ a ndǝre-ndǝre, kǝ mǝse wur nǝ ɗee a ɗe nǝ shang nNaan zak. Nguyaashin. 9 A ngwe ɗewur ɗar ɓalɓal nɗǝǝn shinzeen ɗe mu kám nǝ, mbǝkǝ wur mak kám ɗe ngurum mo zak. Mɓe kǝ mo katɓal ɗe nɗǝǝn pǝtuup fur mo, kǝzak, mbǝkǝ wur man mbii ɗewur nkám ɗe nen ɗe moo satpwoo ɗebuu mo, kǝ wur kám ɗe mmo, pee ɗe mo taa ɗel ɗe. 10 Gurum mo ɗǝɗes, ɗe mo a nen tǝkook kǝ pee met jir, ɓe a pak nen Yahudi ɗe mo ɗee a nendǝm nɗang Kristi. Mo sat nǝ, jir nen ɗe mo ɗee a nendǝm nɗang Daa Jesu, ɓe tǝng mo can mo akuɗang, kaaɗi nen Yahudi moo cìn sǝ zak. Mo a nen satpwoo ɗebuu moo, cìn ɗung ɗe ngurum mo zak. 11 A le kǝ mo ɗok tǝtǝk, mbǝɗe moo kám a mbii ɗe baa nǝ ret kǝ mo kám kas, mbǝkǝ mo kat lǝɓet ɗebuu ɗe nɗǝǝn cìn mbii ɗebish. Mo nkaa dǝm ntul mo ɗes nɗǝǝn ar ɗebish. 12 Mee gurum wur ɗe mɓut nen Krit nǝ mo, ɗewur leshin a kaa ngusatpwoo Naan sǝ, wur sat nǝ, <<Nen Krit mo a nenɗung mo, a kaa luwayil mo sǝ, nenrǝɓet mbii mo, kǝ seer zak.>> 13 Pwoo ɗesǝ nǝ azeen. 14 Taji mo lekom mbee kǝlǝng pwoo ɗebuu mǝ nen Yahudi mo, kǝ Wàar gurum mo, ɗe mo cii zeen zak kas. 15 Katɗang pǝtuup gurum mo a ɗeɓang, ɓe mbii mo jir, mon nɗee a ɗeɓang pee nen mǝnǝ mo ɗe zak. Ɗang nen ɗe pǝtuup mo a ɗebish kǝ ɗe baa mo kǝ shinzeen kas, ɓe baa mee mbii ɗe nǝ a ɗeɓang pee mo ɗe kas, mbǝɗe pan mo a ɗebish, baa mo man mbii ɗeret kas. 16 Mo lekáa fur mo, a kaa nen ɗe mo man Naan sǝ, ɗangɓe mbii ɗe moo cìn nǝ, nǝ kám ngurum mo nǝnee, baa mo man Naan kas jir dǝɓen. Mo a nencii gurum mo, nencii kǝlǝngpee mo, baa mo mak cìn mee mbii ɗe nǝ ret kas jir dǝɓen.