17
Sondonyi sɛniyɛntare
Alatala xa masenyi
1 «Yudaya xa yunubi sɛbɛxi wure sɛbɛli ti se xɔrɔxɔɛ nan na.
A sɛbɛxi e sondonyi ma,
a sɛbɛxi e xa sɛrɛxɛbade ferie ma,
alɔ sɛbɛli tima walaxɛ ma ki naxɛ.
2 E xa die fan natuma e xa sɛrɛxɛbadee ma na ki nɛ,
a nun e xa Aseri wuri masolixie ma
naxee luxi sansi bun ma geyae fari.
3 N ma geya naxan na wo xa bɔxi ma,
a nun wo harige, nun wo xa naafuli birin,
nun wo xa kuye batude naxee na geyae fari,
n na birin soma nɛ wo yaxuie yi ra wo xa yunubi xa fe ra,
wo naxan nabaxi wo xa bɔxi birin ma.
4 Wo yɛtɛ yati fama nɛ wo kɛ bɛɲinde,
n naxan fixi wo ma.
N wo findima nɛ wo yaxui xa konyie ra bɔxi nde ma,
wo mu naxan kolon,
barima wo bara n naxɔnɔ a ɲaaxi ra,
n ma xɔnɛ luxi nɛ alɔ tɛ xubentare.»
5 Alatala bara a masen,
«Dankɛ na mixi bɛ naxan xaxili tixi adamadi ra,
naxan a yɛtɛ taxuma mixi nde ra,
naxan bɔɲɛ bara Alatala bɛɲin.
6 A luma nɛ alɔ kunsi naxan tixi gbengberenyi ma.
A xa fe mu sɔɔnɛyama na bɔxi xare ma,
mixi mu sabatixi dɛnnaxɛ.
7 Ɲɛlɛxinyi na mixi bɛ naxan xaxili tixi Alatala ra,
naxan a yɛtɛ taxuma Ala ra.
8 A tan luxi nɛ alɔ sansi naxan sixi xure fɛ ma,
naxan sanke ye sɔtɔma a fanyi ra.
Wuyenyi mu a lima mɛnni,
a burɛxɛ fanma nɛ tun.
Hali sogofure tɛmui, a burɛxɛ mu lisima,
a bogima nɛ tɛmui birin.»
9 «Adama xa tinxintareya kobi fe birin bɛ.
A mu nɔma matinxinde.
Nde na fahaamuma?
10 N tan Alatala, n mixi bɔɲɛ nan matoma,
n adama sondonyi kui nan fenma,
alako n xa kankan xa fe rabaxi sare ragbilen a ma.
11 Naafuli tinxintare kanyi luxi nɛ
alɔ dɔnmɛ naxan xɛlɛe rasɛgɛma a gbe mu na naxee ra.
A xa naafuli lɔɛma a xa duniɲɛigiri nan kui,
a faxa tɛmui a fa kolonde a lɔnnitare nan a ra.»
Annabi Yeremi xa masenyi
12 «Won Marigi Alatala xa kibanyi na nɔrɛ kui,
a xa hɔrɔmɔlingira itexi na na kabi fɔlɛ.
13 Alatala, Isirayila xaxili tixi i tan nan na.
Mixi naxan i bɛɲinma, e luma yaagi nan kui.»
Alatala xa masenyi
«Mixi naxan n bɛɲinma, e lɔɛma nɛ bɛndɛ fuɲi fari,
barima e bara tondi Alatala ra,
naxan maniyaxi ye ra mixi baloma naxan na.»
Annabi Yeremi xa masenyi Alatala bɛ
14 «Alatala, n nayalan, n nakisi.
N lama nɛ i ra, tantui na i bɛ.
15 Alatala a falama n bɛ,
‹Alatala xa masenyi mu kamalima xɛ? A xa kamali.›
16 N mu tondima findide ɲama yarerati ra.
I a kolon n mu wama gbaloe xa muxu li.
I n ma masenyi birin kolon.
17 I naxa n magaaxu,
barima n ma kantari nan i ra gbaloe kui.
18 I xa n yaxuie rayaagi,
kɔnɔ i naxa n tan lu yaagi kui.
I xa n yaxuie rasɛrɛn,
kɔnɔ i naxa n lu gaaxui kui.
I xa gbaloe rasanba e ma,
i xa e halaki a ɲaaxi ra.»
19 Alatala bara a masen n bɛ, «Siga, i sa ti naadɛ sɛɛti ma naxan xili falama, ‹Ɲama xa naadɛ,› Yudaya mangɛe soma dɛnnaxɛ, e minima dɛnnaxɛ ra. I man xa siga Darisalamu sode dɛ birin na, 20 a fala ɲama bɛ, ‹Yudaya mangɛ, Yudayakae, nun Darisalamukae, wo tan naxee birin soma yi naadɛe ra, wo wo tuli mati Alatala xa masenyi ra.›»
21 Alatala bara a masen,
«Wo xa a mato a fanyi ra,
wo naxa kote xanin malabui lɔxɔɛ,
wo naxa kote raso Darisalamu taa kui.
22 Wo naxa kote ramini wo xa banxi kui malabui lɔxɔɛ,
wo naxa wali yo raba na lɔxɔɛ.
Wo xa malabui lɔxɔɛ binya
alɔ n wo babae yamarixi ki naxɛ.
23 E mu n xui ramɛxi, e mu e tuli matixi n na.
E e kobe rasoxi n na, e tondi n ma sɛriyɛ ra.»
24 Alatala xa masenyi nan ya,
«Xa wo wo tuli mati n na,
xa wo mu kote yo raso taa kui malabui lɔxɔɛ,
xa wo malabui lɔxɔɛ binya,
xa wo mu wali yo raba na lɔxɔɛ,
25 mangɛe nun mangɛdie soma nɛ taa sode dɛe kui soe nun sɔɔri ragisee fari,
e fa dɔxɔ Dawuda xa kibanyi kui.
Yudayakae nun Darisalamukae fan soma nɛ taa kui,
Darisalamu fa sabati abadan.
26 Mixi fama nɛ kelife Yudaya taae kui,
kelife Darisalamu rabilinyi,
kelife Bunyamin bɔxi ma,
kelife Sefela bɔxi ma,
kelife geyae nun Negewi gbengberenyi ma.
E fama nɛ alako e xa sɛrɛxɛ mɔɔli birin ba Alatala xa hɔrɔmɔbanxi kui,
alɔ sɛrɛxɛ gan daaxi, xanunteya sɛrɛxɛ,
surayi sɛrɛxɛ, nun tantui sɛrɛxɛ.
27 Kɔnɔ xa wo mu wo tuli mati n na,
xa wo tondi malabui lɔxɔɛ binyade,
xa wo kote xanin na lɔxɔɛ,
wo e raso Darisalamu taa kui malabui lɔxɔɛ,
n wo xa taa sode dɛe ganma nɛ tɛ ra naxan mu xubenma,
a fa Darisalamu yire makantaxi birin kana.»