1 سْلُ نَشَ عَ قَلَ عَ شَ دِ يٌنَتَن نُن عَ شَ مِشِيٍ بّ، عَ عٍ شَ دَوُدَ قَشَ. كْنْ دَوُدَ نُ رَقَن يٌنَتَن مَ كِ قَنيِ. 2 نَ نَن عَ رَ، يٌنَتَن نَشَ سَ نَ قٍ يَبَ دَوُدَ بّ، «ﭑ بَبَ وَ مَ عِ قَشَقٍ. عِ شَ مّينِ عِ يّتّ مَ تِنَ فّيسّفّ. عِ شَ عِ نْشُن. 3 تِنَ ﭑ نَن ﭑ بَبَ مَتِمَ دَاشَ عِ عِ نْشُنمَ دّننَشّ. ﭑ عِ شَ قٍ قَلَمَ عَ بّ، ﭑ شَ عَ نَتّ كٌلٌن، عَلَكٌ ﭑ شَ نَ قَلَ عِ بّ.» 4 يٌنَتَن نَشَ دَوُدَ شُن مَقَلَ عَ بَبَ سْلُ بّ، عَ قَلَقٍ رَ، «مَنفّ، عِ نَشَ يُنُبِ سْتْ عِ شَ كٌنيِ دَوُدَ شَ قٍ رَ، بَرِ مَ عَ مُ قٍ حَاشِ يٌ رَبَشِ عِ رَ. عَ هِننّشِ نّ عِ رَ تُن. 5 عَ مُ فَاشُ قَشّ يَ رَ، عَلَكٌ عَ شَ نَ قِلِسِتَكَ قَشَ. نَ كُي عَلَتَلَ نَشَ عِسِرَيِلَ شُن نَكٍلِ. عِ قَن بَرَ نَ تٌ، عِ قَن بَرَ حّلّشِن نَ شَ قٍ رَ. مُنقٍ رَ يَكْسِ عِ وَ مَ يُنُبِ رَبَقٍ، مِشِ نِي بَقٍ رَ تْوحّفّ كُي؟ مُنقٍ رَ عِ وَ مَ دَوُدَ قَشَقٍ نَ كِ تُن؟» 6 سْلُ نَشَ عَ شَ دِ يٌنَتَن شُي رَ مّ عَ قَنيِ رَ. عَ نَشَ عَ كَلِ عَلَتَلَ رَ، عَ دَوُدَ مُ قَشَمَ. 7 يٌنَتَن نَشَ دَوُدَ شِلِ، عَ نَ بِرِن تَفِ رَبَ عَ بّ. عَ نَشَ دَوُدَ شَنِن سْلُ يِرٍ، دَوُدَ مَن نَشَ وَلِ سْلُ بّ عَلْ عَ دَرِشِ عَ رَ كِ نَشّ.

8 فٍرٍ مَن نَشَ بِرَ عِسِرَيِلَ نُن قِلِسِتَ تَفِ. دَوُدَ نَشَ مِنِ قِلِسِتَكَيٍ فٍرٍدٍ، عَ نَشَ عٍ بْنبْ عَ قَنيِ رَ، عٍ قَ عٍ فِ. 9 لْشْي ندٍ عَلَ نَشَ عَ نِيَ حِننّ شَ بِرَ سْلُ قْشْ رَ. عَ نُ دْشْشِ عَ شْنيِ، تَنبّ سُشُشِ عَ يِ رَ. دَوُدَ نُ نَ كْرَ رَبٍرٍقٍ. 10 سْلُ نَشَ عَ شَ شَلِ وٌلِ دَوُدَ مَ، عَ شَ عَ سْشْ بَنشِ كَنكٍ. دَوُدَ نَشَ تَنبّ دّ مَبَ، تَنبّ نَشَ سْرْن بَنشِ كَنكٍ. دَوُدَ نَشَ عَ فِ، عَ عَ نْشُن نَ كْي رَ.

11 سْلُ نَشَ مِشِيٍ شّي دَوُدَ شْنيِ، عٍ شَ عَ شَ قٍ كٌلٌن، عَلَكٌ عٍ شَ عَ قَشَ فّيسّفّ. كْنْ عَ شَ فِنّ نَشَ عَ قَلَ عَ بّ، «شَ عِ مُ عِ فِ، عٍ عِ قَشَمَ نّ.» 12 عَ شَ فِنّ نَشَ عَ رَفٌرٌ وُندّرِ رَ، عَ نَشَ عَ فِ. عَ رَتَنفَشِ نَ كِ نّ. 13 نَ دَنفِ شَنبِ، مِكَلِ نَشَ وُرِ مَسٌلِشِ سَ دَوُدَ شَ سَدٍ مَ، عَ دُفِ قٍلٍن عَ شُن مَ، عَ سِ كِرِ سَ عَ شُنسَسٍ قَرِ. 14 سْلُ تٌ مِشِيٍ شّي دَوُدَ سُشُدٍ، عَ شَ فِنّ نَشَ عَ قَلَ عٍ بّ، «عَ مُ يَلَنشِ.» 15 سْلُ مَن نَشَ عٍ شّي عَلَكٌ عٍ شَ دَوُدَ فُندِ تٌ. عَ نَشَ عَ قَلَ عٍ بّ، «وٌ شَ قَ عَ رَ عَ شَ سَدٍ مَ.» 16 شّيرَيٍ تٌ قَ، عٍ نَشَ عَ لِ وُرِ مَسٌلِشِ نَن نَ سَدٍ مَ، سِ كِرِ سَشِ شُنسَسٍ قَرِ. 17 سْلُ نَشَ عَ شَ دِ مِكَلِ مَشْرِن، «عِ ﭑ يَنقَشِ يِ كِ مُنقٍ رَ؟ عِ عَ نِيَشِ مُنقٍ رَ ﭑ يَشُي شَ عَ فِ؟» مِكَلِ نَشَ عَ يَابِ، «عَ عَ قَلَ نّ ﭑ بّ، شَ عِ مُ عَ لُ ﭑ شَ سِفَ، ﭑ عِ قَشَمَ نّ.»

18 دَوُدَ عَ فِ نَ كِ نّ، عَ سِفَ سَمُوٍلِ يِرٍ رَ مَ. عَ نَشَ دّنتّفّ سَ عَ بّ سْلُ نَشَن نَبَشِ عَ رَ. نَ دَنفِ شَنبِ، دَوُدَ نُن سَمُوٍلِ نَشَ سِفَ، عٍ سَ لُ نَيٌتِ. 19 مِشِ ندٍ نَشَ سْلُ رَكٌلٌن عَ دَوُدَ سَ نَ نَيٌتِ، رَ مَ مَبِرِ. 20 سْلُ نَشَ مِشِيٍ شّي دَوُدَ سُشُدٍ، كْنْ عٍ نَشَ نَمِحْنمّيٍ تٌ كِرَ رَ سَمُوٍلِ قْشْ رَ. شّيرَيٍ تٌ مِشِيٍ تٌ مَسٍنيِ تِقٍ عَلَ شِلِ رَ، عَلَ شَشِلِ نَشَ فٌرٌ عٍ قَن مَ، عٍ قَن نَشَ سٌ نَ مَسٍنيِ مْولِ تِدٍ. 21 عٍ تٌ نَ دّنتّفّ سْلُ بّ، عَ نَشَ مِشِ فبّتّيٍ شّي، كْنْ نٍيٍ قَن نَشَ سٌ مَسٍنيِ تِقٍ عَلَ شِلِ رَ. عَ نَشَ مِشِيٍ شّي عَ سَشَن ندٍ، كْنْ نٍيٍ قَن نَشَ سٌ مَسٍنيِ تِقٍ عَلَ شِلِ رَ.

22 نَ دَنفِ شَنبِ سْلُ يّتّ يَتِ نَشَ سِفَ رَ مَ. عَ تٌ كْلْنيِ لِ سٍكُ تَا كُي، عَ نَشَ مِشِيٍ مَشْرِن، «دَوُدَ نُن سَمُوٍلِ نَ مِندٍن؟» عٍ نَشَ عَ يَابِ، عَ عٍ سَ نَ نَيٌتِ، رَ مَ مَبِرِ. 23 عَ نَشَ نَيٌتِ كِرَ سُشُ رَ مَ مَبِرِ، كْنْ عَلَ شَشِلِ نَشَ فٌرٌ عَ مَ كِرَ شْن. عَ نَشَ مَسٍنيِ تِ عَلَ شِلِ رَ هَن نَيٌتِ، رَ مَ مَبِرِ. 24 عَ قَن نَشَ دٌنمَ رَتٍ عَ مَ، عَ قَ مَسٍنيِ تِ عَلَ شِلِ رَ سَمُوٍلِ يَ شْرِ. عَ نَشَ عَ قٍلٍن بْشِ مَ دٌنمَ مُ عَ مَ. عَ نَشَ لُ نَ كِ نَ يَنيِ نُن نَ كْي بِرِن. يِ تَالِ مِنِشِ نَ قٍ نَن كُي، «سْلُ قَن بَرَ قِندِ نَمِحْنمّيٍ رَ بَ؟»