1 عَلَتَلَ نَشَ نَتَن شّي دَوُدَ شْن مَ. نَتَن نَشَ عَ قَلَ عَ بّ، «مِشِ قِرِن نُ نَ تَا ندٍ كُي، كٍرٍن نُ قِندِشِ بَننَ نَن نَ، بٌورٍ سٍتَرٍ. 2 شُرُ سٍ فبٍفبٍ نُ نَ نَ بَننَ يِ رَ، 3 كْنْ يّشّي فِنّ كٍرٍن ثٍتِ نَن نُ نَ سٍتَرٍ تَن يِ رَ. عَ نَ سَرَ نّ، عَ نُ عَ بَلٌ عَ شْنيِ عَ شَ دِيٍ يَ مَ. عَ نُ دٌنسٍ شُنتُنيِيٍ قِمَ عَ مَ، عَ نُ يٍ قِ عَ مَ عَ يّتّ شَ تْنبِلِ رَ. كْي رَ يّشّي نُ شِمَ عَ كَنكٍ نَن مَ. عَ نُ لُشِ نّ عَ بّ عَلْ عَ شَ دِ. 4 لْشْي ندٍ شْحّ نَشَ قَ نَ بَننَ شْنيِ. نَ بَننَ تٌ مُ تِن شُرُ سٍ بَدٍ عَ يّتّ شَ فْورّ كُي، عَ نَشَ سِفَ عَ سَ نَ سٍتَرٍ شَ يّشّي كٍرٍنيِ تٌنفٌ، عَ عَ قَشَ، عَ عَ رَقَلَ عَ شَ شْحّ بّ.»

5 دَوُدَ تٌ نَ مّ، عَ نَشَ شْنْ كِ قَنيِ رَ نَ بَننَ مَ، عَ نَشَ عَ قَلَ نَتَن بّ، «ﭑ بَرَ ﭑ كَلِ عَلَتَلَ شِلِ رَ، نَ بَننَ لَن نّ عَ شَ قَشَ. 6 عَ مَن شَ نَ يّشّي حْشْي نَانِ رَفبِلٍن نَ سٍتَرٍ مَ، بَرِ مَ عَ بَرَ قٍ كٌبِ رَبَ، عَ مُ كِنِكِنِ.»

7 نَ تّمُي نَتَن نَشَ عَ قَلَ دَوُدَ بّ، عَ نَشّ، «عِ تَن نَن نَ نَ بَننَ رَ! عِسِرَيِلَ مَرِفِ عَلَتَلَ يِ نَن مَسٍنشِ، عَ نَشّ، ‹ﭑ بَرَ عِ سُفَندِ عِسِرَيِلَ مَنفّ رَ، ﭑ بَرَ عِ رَتَنفَ سْلُ مَ، 8 ﭑ قَ عَ شَ بَنشِ سٌ عِ يِ رَ، عَ نُن عَ شَ فِنّيٍ، عَ نُن عِسِرَيِلَ نُن يُدَيَ بِرِن. شَ نَ مُ عِ وَسَ نُ، ﭑ نُ نْمَ ندٍ سَدٍ نَ شُن مَ. 9 مُنقٍ رَ عِ عَلَتَلَ شُي مَبٍرٍشِ، عِ وَلِ حَاشِ رَبَ؟ عِ بَرَ عُرِ شِتِكَ قَشَ عَمٌنِكَيٍ سَابُي رَ، عِ بَرَ عُرِ شَ فِنّ تٌنفٌ، عِ عَ قِندِ عِ فبٍ رَ. 10 يَكْسِ، فٍرٍ مُ مَكُيَمَ عِ بْنسْي رَ سْنْن، بَرِ مَ عِ بَرَ ﭑ شُي مَبٍرٍ، عِ عُرِ شِتِكَ شَ فِنّ قِندِ عِ فبٍ رَ. 11 ﭑ شَ عَ قَلَ عِ بّ، ﭑ تَن عَلَتَلَ قَمَ عِ تْورْدٍ عِ بْنسْي تَفِ. ﭑ قَمَ عِ شَ فِنّيٍ بَدٍ عِ يِ رَ، ﭑ عٍ سٌ عِ شَ مِشِ ندٍ يِ رَ، عٍ نُن نٍيٍ قَ كَقُ كّنّ مَ. 12 عِ تَن قٍ حَاشِ رَبَشِ عَ فُندٌ دَاشِ نّ، كْنْ ﭑ عِ سَرٍ رَفبِلٍنمَ عَ كّنّ مَ دَاشِ نّ عِسِرَيِلَ حَمَ يَ شْرِ.›»

13 دَوُدَ نَشَ عَ قَلَ نَتَن بّ، «ﭑ بَرَ يُنُبِ رَبَ عَلَتَلَ رَ!» نَتَن نَشَ عَ يَابِ، «عَلَتَلَ بَرَ دِحّ عِ شَ يُنُبِ مَ، عِ مُ قَشَمَ. 14 كْنْ عِ تٌ عَ نِيَشِ عَلَتَلَ يَشُييٍ شَ نْ عَ مَبٍرٍدٍ يِ قٍ كُي، عِ شَ دِ نَشَن قَمَ بَرِدٍ، نَ تَن قَشَمَ نّ.» 15 نَتَن نَشَ فبِلٍن عَ شْنيِ.

عَلَتَلَ نَشَ قُرٍ رَدِن دِيْرّ مَ، عُرِ شَ فِنّ نَشَن بَرِ دَوُدَ بّ. 16 دَوُدَ نَشَ عَلَ مَشَندِ دِيْرّ بّ، عَ مَن سُنيِ سُشُ عَ شَ قٍ رَ. عَ تٌ سٌ عَ شْنيِ، عَ نَشَ عَ سَ بْشِ مَ. 17 عَ شَ قٌرِيٍ نَشَ قٍ بِرِن نَبَ عَلَكٌ عَ شَ كٍلِ بْشِ مَ، عَ شَ عَ دّفٍ، كْنْ عَ مُ تِن قٍوٌ. 18 عَ شِ سٌلٌقٍرٍ ندٍ دِيْرّ نَشَ قَشَ. دَوُدَ شَ وَلِكّيٍ مُ نُ وَ مَ نَ قَلَقٍ عَ بّ، بَرِ مَ عٍ نُ عَ قَلَمَ عٍ بٌورٍ تَفِ، «دِيْرّ تٌ مُ نُ قَشَشِ، مُشُ نُ وْيّن نّ عَ بّ، عَ مُ مُشُ دَنشُن. يَكْسِ مُشُ قَمَ عَ شَ دِيْرّ شَ قَشّ قَلَدٍ عَ بّ دِ؟ عَ قَمَ قٍ شْنّ نَن نَبَدٍ!»

19 دَوُدَ نَشَ سٌفِ عَ شَ وَلِكّيٍ مَ، عٍ نَ قٍ ندٍ مَدُكُقٍ عٍ شُي عِفٌرٌشِ رَ عٍ بٌورٍ تَفِ. نَ كُي عَ نَشَ عَ كٌلٌن عَ شَ دِيْرّ بَرَ قَشَ. عَ نَشَ عَ شَ وَلِكّيٍ مَشْرِن، «دِيْرّ بَرَ قَشَ؟» عٍ نَشَ، «عِيٌ، عَ بَرَ قَشَ.» 20 دَوُدَ نَشَ كٍلِ بْشِ، عَ عَ مَشَ، عَ لَبُندّ سَ عَ مَ، عَ دُفِيٍ مَسَرَ، عَ قَ سِفَ عَلَتَلَ شَ بَنشِ كُي سُيِدِدٍ عَلَ بّ. عَ تٌ كٍلِ مّننِ، عَ نَشَ سِفَ عَ شْنيِ، عَ دٌنسٍ مَشْرِن، عَ عَ دّفٍ. 21 عَ شَ وَلِكّيٍ نَشَ عَ مَشْرِن، عٍ نَشّ، «مُنقٍ رَ دِيْرّ نُ بَلٌشِ تّمُي نَشّ، عِ نُ سُنمَ، عِ نُ وَ مَ، كْنْ دِيْرّ تٌ قَشَشِ قَ، عِ بَرَ كٍلِ، عِ عِ دّفٍ؟» 22 عَ نَشَ عٍ يَابِ، «دِيْرّ تٌ نُ بَلٌشِ، ﭑ نُ سُنمَ، ﭑ نُ وَ مَ، بَرِ مَ ﭑ حْشْ عَ مَ عَ تّمُندٍ عَلَتَلَ دِحّمَ ﭑ مَ، عَ ﭑ مَ دِيْرّ رَكِسِ. 23 عَ تٌ بَرَ قَشَ، ﭑ قَ سُنمَ مُنقٍ رَ؟ ﭑ نْمَ عَ رَفبِلٍندٍ دُنِحَ مَ قَ؟ ﭑ تَن عَ لِمَ نّ نَا، كْنْ عَ تَن مُ فبِلٍنمَ ﭑ تَن مَ سْنْن.»

24 نَ تّمُي دَوُدَ نَشَ عَ شَ فِنّ بَتِسٍبَ مَدُندُ. عٍ نَشَ لُ يِرٍ كٍرٍن، عَ نَشَ تّيفّ، عَ دِ شّمّ بَرِ. عٍ نَشَ عَ شِلِ سَ سُلٍمَنِ. عَلَتَلَ تٌ عَ شَنُ، 25 عَ نَشَ عَننَبِ نَتَن شّي دَوُدَ يِرٍ، عَ قَلَقٍ رَ، يٍدِدٍيَ شِلِ قَن شَ سَ عَ شُن، نَشَن وَ مَ عَ قَلَقٍ عَلَتَلَ شَنُنتٍنيِ.

26 يٌوَبَ نَشَ عَمٌنِكَيٍ شَ مَنفَتَا رَابَ فٍرٍ، عَ نَ مَنفّ بَنشِ سُشُ. 27 عَ نَشَ مِشِيٍ شّي عَ قَلَقٍ رَ دَوُدَ بّ، «ﭑ بَرَ رَابَ فٍرٍ، ﭑ مَن بَرَ عٍ شَ يٍ يِرٍ سُشُ. 28 يَكْسِ عِ شَ سْورِيٍ مَلَن، وٌ شَ تٍ تَا سُشُدٍ. عَ مُ لَنمَ ﭑ تَن شَ نَ بِنيّ سْتْ.»

29 دَوُدَ تٌ سْورِيٍ مَلَن، عٍ نَشَ سِفَ رَابَ. عَ نَشَ دِن تَا رَ، عَ عَ سُشُ. 30 عَ نَشَ عَمٌنِ مَنفّ شَ مَنفّ تْنشُمَ بَ عَ شُن مَ، عَ قَ عَ سَ عَ يّتّ شُن مَ. عَ بِنيَ كِلٌ تٌنفٌ سَشَن، عَ يَءِلَنشِ شّيمَ نَن نَ. فّمّ تٌقَنيِ قَن نُ نَ عَ مَ. دَوُدَ نَشَ سٍ فبٍفبٍ سْتْ نَ تَا كُي. 31 عَ نَشَ نَ تَاكَيٍ قِندِ كٌنيِيٍ رَ، نَشٍيٍ نُ وُرِ شَبَمَ عَ نُن بِرِكِ بْنبْمَ. عَ عَ رَبَ نَ كِ نّ عَمٌنِكَيٍ شَ تَا بِرِن كُي. نَ دَنفِ شَنبِ دَوُدَ نُن عَ شَ سْورِيٍ نَشَ فبِلٍن دَرِ سَلَمُ.