1 ثْلُ نَشَ عَ يَ تِ يُوِقِ كِيتِسَيٍ رَ. عَ نَشَ عَ مَسٍن، «ﭑ نفَشَكٍرٍنيِيٍ، ﭑ نَشَن نَبَشِ هَن تٌ، ﭑ عَ رَبَشِ ﭑ بْحّ قِيشّ نَن نَ عَلَ يَ شْرِ» 2 سّرّشّدُبّ كُنتِفِ، عَنَنِيَسِ نَشَ مِشِيٍ يَامَرِ، نَشٍيٍ نُ نَ عَ قّ مَ، عٍ شَ عَ دّ رَفَرِن. 3 عَوَ، ثْلُ نَشَ عَ قَلَ عَ بّ، «عَلَ نَن قَمَ عِ تَن بْنبْدٍ. عِ لُشِ نّ عَلْ بَنشِ نَشَن قَرِ قِيشّ كْنْ عَ كُي نْشْشِ. عِ بَرَ وَ ﭑ مَكِيتِقٍ كِيتِ سّرِيّ رَ، كْنْ عِ تٌ يَامَرِ قِشِ عٍ شَ ﭑ بْنبْ، عِ بَرَ سّرِيّ مَتَندِ.» 4 نَشٍيٍ نُ نَ عَ قّ مَ، عٍ نَشَ عَ قَلَ عَ بّ، «عِ عَلَ شَ سّرّشّدُبّ كُنتِفِ نَن كٌنبِمَ يِ كِ!» 5 ثْلُ نَشَ عَ قَلَ، «ﭑ نفَشَكٍرٍنيِيٍ، ﭑ مُ نُ عَ كٌلٌن شَ سّرّشّدُبّ كُنتِفِ نَ عَ رَ، بَرِ مَ عَ سّبّشِ، ‹عِ نَشَ وْيّن كٌبِ قَلَ حَمَ مَنفّ بّ.›»

6 ثْلُ تٌ عَ كٌلٌن سَدُ سٍنِيٍ نُن قَرِ سّنِيٍ نُ نَ يُوِقِ كِيتِسَيٍ شَ مَلَنيِ كُي، عَ نَشَ عَ قَلَ عَ شُي عِتٍشِ رَ، «ﭑ نفَشَكٍرٍنيِيٍ، قَرِ سّنِ نَن ﭑ نَ. ﭑ بَبَ قَن قَرِ سّنِ نَن نُ عَ رَ. تٌ ﭑ نَ كِيتِ بَنشِ بَرِ مَ ﭑ لَشِ عَ رَ عَلَ قَمَ وٌن نَكٍلِدٍ قَشّ مَ كِيتِ لْشْي.» 7 عَ تٌ نَ قَلَ، بٌورٍ مَتَندِ نَشَ لُ قَرِ سّنِيٍ نُن سَدُ سٍنِيٍ تَفِ. حَمَ نَشَ عِتَشُن. 8 سَدُ سٍنِيٍ تَن بّ، مِشِ مُ كٍلِمَ قَشّ مَ. عٍ مَن مُ لَشِ مَلٍكّيٍ نُن حِننّيٍ شَ قٍ رَ. كْنْ قَرِ سّنِيٍ تَن لَ نٍيٍ بِرِن شَ قٍ رَ. 9 سْنشْي شُنفبٍ نَشَ مِنِ. سّرِيّ كَرَ مْشْ ندٍيٍ قَرِ سّنِيٍ تَفِ عٍ نَشَ وْيّن شْرْشْي قَلَ. عٍ نَشّ، «مُشُ مُ قٍقٍ حَاشِ يٌ رَكْرْ سِشِ يِ شّمّ مَ. تّمُندٍ حِننّ ندٍ، شَ نَ مُ عَ رَ مَلٍكّ ندٍ، نَن وْيّنشِ عَ رَ.» 10 سْنشْي تٌ نُ سِفَمَ فبٌ رَ، سْورِ مَنفّ نَشَ فَاشُ عٍ قَ ثْلُ قَشَقٍ. عَ نَشَ سْورِيٍ رَفٌرٌ عٍ شَ ثْلُ تٌنفٌ عٍ تَفِ، عٍ شَ عَ شَنِن سْورِ بَنشِ كُي.

11 نَ كْي رَ، مَرِفِ نَشَ مِنِ ثْلُ مَ. عَ نَشَ عَ قَلَ عَ بّ، «عِ شَ لِمَنِيَ بَرِ مَ عِ قِندِ مَ ﭑ مَ سٍيدٍ نَن نَ رْ مَ عَلْ عِ عَ رَبَشِ دَرِ سَلَمُ كِ نَشّ.»

12 كُيٍ تٌ عِبَ، يُوِقِيٍ نَشَ لَنيِ شِرِ كَلِ رَ، عٍ نَشَ عٍ دّفٍ، عٍ نَشَ عٍ مِن سِندٍن، عَ قٌ عٍ شَ ثْلُ قَشَ. 13 نَشٍيٍ نَ لَنيِ شِرِ، عٍ نُ دَنفِ مِشِ تٌنفٌ نَانِ رَ. 14 عٍ نَشَ عَ مَسٍن سّرّشّدُبّ كُنتِفِيٍ نُن قٌرِيٍ بّ، «مُشُ بَرَ مُشُ كَلِ عَلَ رَ، مُشُ مُ سٍسٍ دٌنمَ سِندٍن قٌ مُشُ شَ ثْلُ قَشَ. 15 عَوَ، يَكْسِ، وٌ تَن نُن يُوِقِ كِيتِسَيٍ شَ مَنفّ مَيَندِ عَ شَ قَ عَ رَ عَلَكٌ وٌ شَ عَ شَ قٍ مَتٌ عَ قَنيِ رَ. نَ كُي، مُشُ تَن عَ قَشَمَ كِرَ رَ.»

16 ثْلُ مَافِنّ شَ دِ نَشَ نَ يَنقّ كٌلٌن. عَ نَشَ سِفَ سْورِ بَنشِ كُي، عَ نَشَ نَ بِرِن مَسٍن ثْلُ بّ. 17 ثْلُ نَشَ سْورِ مِشِ كّمّ شُنمَتِ ندٍ شِلِ، عَ نَشّ، «يِ سّفّتَلَ شَنِن سْورِ مَنفّ شْن مَ، عَلَكٌ عَ شَ قٍ ندٍ قَلَ عَ بّ.» 18 سْورِ كّمّ شُنمَتِ نَشَ سّفّتَلَ تٌنفٌ، عَ نَشَ عَ شَنِن سْورِ مَنفّ شْن مَ. عَ نَشّ، «ثْلُ، فٍيلِمَنِ نَن ﭑ شِلِشِ، عَ نَشَ ﭑ مَيَندِ عَ ﭑ شَ قَ يِ سّفّتَلَ رَ عِ شْن مَ، عَ شَ قٍ ندٍ مَسٍن عِ بّ.» 19 سْورِ مَنفّ نَشَ سّفّتَلَ تٌنفٌ، عٍ نَشَ عٍ مَمِنِ. مَنفّ نَشّ، «عِ وَ مَ مُنسٍ قَلَقٍ ﭑ بّ؟» 20 عَ نَشَ عَ يَابِ، «يُوِقِيٍ بَرَ لَن عَ مَ، عٍ شَ عِ مَشَندِ عِ شَ ثْلُ شَنِن يُوِقِ كِيتِسَيٍ يِرٍ، عَلَكٌ عٍ مَن شَ مَشْرِنيِ ندٍ تِ عَ مَ. 21 عِ نَشَ عِ تُلِ مَتِ عٍ رَ، بَرِ مَ مِشِ تٌنفٌ نَانِ نُن ندٍ بَرَ يَنقّ شِرِ عَ شُن عٍ يَ مَ. عٍ بَرَ عٍ كَلِ عَ عٍ مُ سٍسٍ دٌنمَ، عٍ مُ سٍسٍ مِنمَ عَ قٌ عٍ نَ ثْلُ قَشَ تّمُي نَشّ. يَكْسِ عٍ بَرَ فّ عٍ يَءِلَندٍ، عٍ قَ عِ سَفٌ نَن مَمّقٍ.» 22 سْورِ مَنفّ نَشَ سّفّتَلَ رَبٌلٌ، عَ نَشَ تْنيِ دْشْ عَ مَ، قَ قَلَ، عَ قٍ نَشَن قَلَشِ عَ بّ، عَ نَشَ نَ قَلَ مِشِ يٌ بّ.

23 عَ نَشَ سْورِ مِشِ كّمّ شُنمَتِ قِرِن شِلِ، عَ نَشَ عَ قَلَ عٍ بّ، «وٌ سْورِ كّمّ قِرِن يَءِلَن، سْورِ سٌي رَفِيٍ تٌنفٌ سٌلٌقٍرٍ، نُن شَلِ وٌلِ كّمّ قِرِن. وٌ شَ عٍ يَءِلَن سِفَقٍ رَ سٍسَرٍ تٌ كْي رَ. 24 وٌ شَ سٌي ندٍ يَءِلَن ثْلُ بّ، عَلَكٌ عَ شَ مَنفّ قٍلِسِ لِ هّيرِ كُي.»

25 سْورِ مَنفّ نَشَ يِ قٍ سّبّ بَتَاشّ رَ. 26 «ﭑ تَن كِلْدِ لِسِيَ، عِ تَن مَنفّ قٍلِسِ مَقَنشِ، ﭑ بَرَ عِ شّيبُ. 27 يِ شّمّ يُوِقِيٍ نَن عَ سُشُشِ. عٍ نَشَ وَ عَ قَشَقٍ. ﭑ تٌ عَ كٌلٌن عَ رْ مَكَ نَ عَ رَ، ﭑ نُن سْورِيٍ نَشَ قَ، مُشُ نَشَ عَ بَ عٍ يِ. 28 ﭑ تٌ وَ عَ كٌلٌنقٍ عٍ عَ سُشُشِ نَشَن مَ، ﭑ نَشَ سِفَ عَ رَ عٍ شَ كِيتِسَيٍ يِرٍ. 29 ﭑ نَشَ عَ لِ عٍ عَ كَلَمُشِ عٍ شَ سّرِيّ شَ قٍ نَن مَ، كْنْ عَ مُ قٍ كٌبِ يٌ رَبَشِ عَ لَنمَ عَ شَ قَشَ نَشَن مَ، شَ نَ مُ عَ رَ عَ شَ سَ فٍيلِ كُي. 30 ﭑ تٌ بَرَ عَ مّ عَ يُوِقِيٍ بَرَ فَلِ مَلَن عَ شِلِ مَ، ﭑ نَشَ عَ رَ سَنبَ عِ مَ كٍرٍن نَ. ﭑ عَ كَلَمُمَيٍ رَكٌلٌنمَ عٍ يّتّ كَن شَ سَ عَ كَلَمُ عِ شْن عَ شَ قٍ رَ. وٌ سَلَمُ.»

31 سْورِيٍ نَشَ ثْلُ تٌنفٌ عَلْ عٍ يَمَرِشِ كِ نَشّ. عٍ نَشَ عَ شَنِن كْي رَ هَن عَنتِثَتِرِ. 32 نَ كُيٍ عِبَ، سْورِيٍ نَشَ فبِلٍن سْورِ بَنشِ. سٌي رَفِيٍ نَشَ ثْلُ تٌنفٌ. 33 عٍ تٌ سٌ سٍسَرٍ، سٌي رَفِيٍ نَشَ بَتَاشّ نُن ثْلُ سٌ مَنفّ يِ رَ. 34 مَنفّ تٌ فّ بَتَاشّ شَرَندٍ، عَ نَشَ ثْلُ مَشْرِن عَ كٍلِ دّننَشّ. عَ تٌ بَرَ عَ مّ عَ سِلِسِكَ نَ عَ رَ، عَ نَشَ عَ قَلَ، 35 «ﭑ قَمَ نّ عِ مَكِيتِدٍ عِ تْوحّفّلَيٍ نَ قَ تّمُي نَشّ.» عَ نَشَ يَامَرِ قِ عٍ شَ ثْلُ شَنِن فٍيلِ بَنشِ هٍرٌدٍ نَشَن تِشِ.