4
قَشَقٍ نُن بَلٌقٍ
1 ﭑ مَن بَرَ ﭑ شَشِلِ رَ سِفَ حَشَنكَتّ بِرِن مَ، نَشَن نَ رَبَقٍ يِ دُنِحَ مَ.
مِشِ حَشَنكَتَشِ نَ وَقٍ،
عٍ مَدُندُ مَ يٌ مُ نَ.
نْي نَ مِشِيٍ بّ نَشٍيٍ نَ عٍ حَشَنكَتَقٍ.
عٍ مَدُندُ مَ يٌ مُ نَ.
2 ﭑ بَرَ عَ مَحْشُن، مِشِ قَشَشِ نَن سّيوَشِ دَنفِقٍ مِشِ بَلٌشِ رَ.
3 مِشِ نَشَن مُ بَرِشِ سِندٍن،
نٍيٍ شَ هّيرِ دَنفِ مِشِ قَشَشِ نُن مِشِ بَلٌشِ رَ،
بَرِ مَ عٍ مُ حَشَنكَتّ كٌلٌن نَشَن نَ رَبَقٍ يِ دُنِحَ مَ.
4 ﭑ بَرَ عَ تٌ، مِشِ وَلِمَ عٍ شُننَكٍلِ قٍنمَ مِلّ كُي. يِ قَن قِندِشِ قٍ قُقَقُ نَن نَ، عَلْ بِرَقٍ قٌيٍ قْشْ رَ.
5 شَشِلِتَرٍ عَ بّلّشّيٍ قِندِفِلِنشِ عَ مَ، عَ مُ وَلِمَ،
هَن عَ شُن نَكَنَ.
6 بْحّسَ دٌندٌرٌنتِ قِسَ كَتّ فبٍفبٍ بّ.
نَ كَتّ لُشِ نّ عَلْ مِشِ نَشَن بِرَ مَ قٌيٍ قْشْ رَ.
7 ﭑ بَرَ قٍ قُقَقُ فبّتّ قَن تٌ يِ دُنِحَ مَ.
8 شّمّ ندٍ نُ نَ نَشَن نُ نَ عَ كٍرٍنيِ مَ،
مِشِ يٌ مُ نُ نَ عَ بّ.
عَ نُ وَلِمَ تّمُي بِرِن، كْنْ عَ مُ وَ سَ عَ شَ نَاقُلِ رَ.
عَ نَشَ عَ يّتّ مَشْرِن،
«ﭑ نَ وَلِقٍ تْورّ كُي ندٍ بّ؟»
يِ مْولِ قَن قِندِشِ قٍ قُقَقُ نَن نَ.
9 مِشِ قِرِن مَلَنشِ سْونّيَ دَنفِقٍ مِشِ رَ نَشَن لُمَ عَ كٍرٍن.
نَ قِرِنيِيٍ شَ وَلِ دَنفِ نَ مِشِ كٍرٍنيِ فبٍ رَ.
10 شَ عَ سَ لِ كٍرٍن بِرَ، عَ بٌورٍ عَ رَكٍلِمَ نّ.
كْنْ مِشِ نَشَن بِرَ مَ، عَ مَلِمَ مُ نَ،
نَ تْورْ مَ نّ عَ حَاشِ رَ.
11 نَ مَنِيَشِ مِشِ قِرِن نَن نَ،
نَشٍيٍ سَشِ عٍ بٌورٍ قّ مَ شِنبٍلِ تّمُي،
عٍ نُ وُيٍنيِ سْتْ عٍ بٌورٍ سَابُي رَ.
كْنْ مِشِ نَشَن نَ عَ كٍرٍنيِ مَ، نَ شِنبٍلِ بَمَ دِ؟
12 مِشِ حَاشِ نْمَ نّ مِشِ كٍرٍن نَ،
كْنْ مِشِ قِرِن تَن تِمَ نّ عَ كَنكٍ.
لُوتِ شْرِ سَشَن مَلَنشِ مُ بٌلٌنمَ مَقُرٍن.
13 مِسِكِينّ شَ دِ نَشَن شَشِلِ قَن، عَ سّنبّ فبٌ مَنفّ بّ نَشَن مُ قَتَ مَرَ سِ قَنيِ نُن عَ حَاشِ تَفِ رَ سَدٍ. 14 نَ مِشِ مْولِ نْمَ مِنِدٍ فٍيلِ كُي، عَ قِندِ مَنفّ رَ. عَ بَرِشِ سٍتَرٍحَ نَن كُي، عَ قَ مَنفّيَ سْتْ. 15 دُنِحَ مِشِ بِرِن سَشَنيِ نَن نَبَمَ، عِ نَ دَنفِ مِشِ فبّتّ قَ تِ عِ حْشْي رَ. 16 مِشِ وُيَشِ دَنفِشِ نّ بٍينُن نَ كَنيِ شَ بَرِ. مِشِ نَشٍيٍ قَمَ عَ شَنبِ رَ، عَ شَ قٍ مُ قَمَ رَقَندٍ عٍ مَ. نَ قَن قِندِشِ قٍ قُقَقُ نَن نَ، عَلْ مِشِ نَشَن بِرَقٍ قٌيٍ قْشْ رَ.
17 عِ نَ سِفَ سَلِدٍ عَلَ شَ بَنشِ، عِ شَ عِ يّتّ مَتٌ عَ قَنيِ رَ. عِ نَ سِفَ، عِ شَ عِ تُلِ مَتِ مَسٍنيِ رَ نَشَن تِمَ نَا. نَ تِدٍ فبٌ دَنفِقٍ سّرّشّ بَقٍ رَ نَشَن نَبَمَ شَشِلِتَرٍحَ كُي، بَرِ مَ شَشِلِتَرٍيٍ مُ عَ كٌلٌن، عَ عٍ نَ قٍ كٌبِ نَن شُن مَ نَ كِ.