1 بْشِمَسٍ نَن نُ كْوتَ مَرِفِ عَلَتَلَ شَ دَالِسٍ بِرِن بّ. عَ نَشَ فِنّ مَشْرِن، «عَلَ عَ قَلَ نّ وٌ بّ عَ وُرِ بٌفِ نَشَن بِرِن نَ عٍدٍن كُي، عَ وٌ نَشَ عَ سٍسٍ دٌن؟ نْندِ نَ عَ رَ؟» 2 فِنّ نَشَ عَ يَابِ، «وُرِ نَشٍيٍ نَ عٍدٍن كُي، مُشُ نْمَ عٍ بِرِن بٌفِ دٌندٍ، 3 كْنْ وُرِ نَشَن نَ عٍدٍن تَفِ، مُشُ مُ نْمَ نَ تَن بٌفِ دٌندٍ، مُشُ مُ نْمَ مَكْرّدٍ عَ رَ يّتّ يَتِ، شَ نَ مُ عَ رَ مُشُ قَشَمَ نّ.» 4 بْشِمَسٍ نَشَ عَ قَلَ فِنّ بّ، «عَدٍ، وٌ مُ قَشَمَ. 5 عَلَ عَ كٌلٌن، وٌ نَ عَ دٌن، وٌ يَ رَبِمَ نّ. وٌ قَمَ قٍ قَنيِ نُن قٍ حَاشِ كٌلٌندٍ عَلْ عَلَ يّتّ.»

6 فِنّ تٌ وُرِ بٌفِ تٌ، عَ تٌقَن، عَ قَن دٌنسٍ رَ، عَ قَن شَشِلِ سْتْسٍ رَ، عَ نَشَ كٍرٍن بَ، عَ دٌن، عَ ندٍ سٌ عَ شَ مْرِ يِ، عٍ نُن نَشَن نُ عَ رَ. نَ قَن نَشَ عَ دٌن. 7 نَ وَشَتِ عٍ يَيٍ نَشَ رَبِ. عٍ نَشَ عَ كٌلٌن، عٍ مَفٍلِ نَن نُ عَ رَ. عٍ نَشَ شْرّ بُرّشّيٍ دّنبّ عٍ بٌورٍ رَ، عٍ عٍ يّتّ سُتُرَ عَ رَ.

8 نَ شَنبِ، شّمّ نُن عَ شَ فِنّ نَشَ مَرِفِ عَلَتَلَ حّرّ شُي مّ نُنمَرٍ رَ. عٍ نَشَ عٍ نْشُن وُرِيٍ شَنبِ رَ. 9 مَرِفِ عَلَتَلَ نَشَ شِلِ تِ، «عَدَ مَ، عِ نَ مِندٍن؟» 10 عَدَ مَ نَشَ عَ يَابِ، «ﭑ بَرَ عِ شُي مّ عٍدٍن كُي، كْنْ ﭑ بَرَ فَاشُ، بَرِ مَ ﭑ مَفٍلِ نَ عَ رَ. نَ نَن عَ رَ، ﭑ نَن ﭑ نْشُنشِ.» 11 مَرِفِ عَلَتَلَ نَشَ عَ مَشْرِن، «ندٍ عَ مَسٍنشِ عِ بّ عِ مَفٍلِ نَ عَ رَ؟ كَ عِ بَرَ نَ وُرِ بٌفِ دٌن بَ، ﭑ نَشَن مَ قٍ قَلَ عِ بّ عِ نَشَ عَ دٌن؟» 12 عَدَ مَ نَشّ، «عِ فِنّ نَشَن قِشِ ﭑ مَ، نَ نَن يِ وُرِ بٌفِ سٌ ﭑ يِ رَ، ﭑ نَشَ عَ دٌن.»

13 نَ شَنبِ، مَرِفِ عَلَتَلَ نَشَ فِنّ مَشْرِن، «عِ يِ رَبَشِ مُنقٍ رَ؟» فِنّ نَشَ عَ يَابِ، «بْشِمَسٍ بَرَ ﭑ مَدَشُ هَن ﭑ بَرَ نَ وُرِ بٌفِ دٌن.»

14 عَوَ، مَرِفِ عَلَتَلَ نَشَ عَ قَلَ بْشِمَسٍ بّ، «عِ تٌ بَرَ يِ رَبَ، عَوَ، ﭑ قَن ﭑ بَرَ عِ دَنكَ شُرُ سٍ نُن بُورُنيِ سُبٍ بِرِن يَ مَ. عِ قِندِ مَ بُبُسٍ نَن نَ عِ قُرِ قَرِ. عِ شُبٍ نَن دٌنمَ عِ شَ دُنِحّءِفِرِ كُي. 15 ﭑ بَرَ دّحَاشُي رَ سٌ عِ تَن نُن فِنّ تَفِ. ﭑ بَرَ عَ رَ سٌ عِ شَ دِيٍ نُن عَ شَ دِيٍ تَفِ. فِنّ شَ دِ عِ شُنيِ بُتُشُنمَ نّ. عِ قَن عَ تِنفِلِنيِ شِنمَ نّ.»

16 مَرِفِ عَلَتَلَ نَشَ عَ قَلَ فِنّ بّ، «عِ قَن، ﭑ عِ تْورْ مَ نّ عِ شَ دِ بَرِ كُي. نَ تْورّ فبٌمَ نّ. عِ بِرَ مَ نّ عِ شَ مْرِ قْشْ رَ، عَ عِ يَمَرِ.»

17 مَرِفِ عَلَتَلَ نَشَ عَ قَلَ عَدَ مَ بّ، «عِ بَرَ بِرَ عِ شَ فِنّ قْشْ رَ. عِ بَرَ نَ وُرِ بٌفِ دٌن، ﭑ نَشَن مَ قٍ قَلَ عِ بّ، عِ نَشَ عَ دٌن. يَكْسِ ﭑ بَرَ بْشِ دَنكَ عِ شَ قٍ رَ. عِ تْورْ مَ نّ بَلٌي سْتْدٍ عِ شَ دُنِحّءِفِرِ كُي. 18 ﭑ تُنبٍ نُن بَافِ رَ مِنِمَ نّ بْشِ مَ، عِ بَلٌي سْتْمَ شّ نَن مَ. 19 عِ بَلٌي سْتْمَ عِ يِلٍنقُرٍ نَن نَ هَن عِ فبِلٍنمَ بّندّ تّمُي نَشّ عِ رَقَلَشِ نَشَن نَ. بّندّ نَن عِ رَ، عِ مَن فبِلٍنمَ نَ بّندّ نّ.»

20 عَدَ مَ نَشَ عَ شَ فِنّ شِلِ سَ «مَهَوَ،» بَرِ مَ عَ قِندِ مَ نّ مِشِ بِرِن نفَ رَ.

21 مَرِفِ عَلَتَلَ نَشَ دُفِ كِرِ دَاشِيٍ دّفّ عَدَ مَ نُن عَ شَ فِنّ بّ، عَ نَشَ عٍ رَفٌرٌ عٍ مَ.

22 مَرِفِ عَلَتَلَ نَشَ عَ مَسٍن، «عَدَ مَ بَرَ قٍ قَنيِ نُن قٍ حَاشِ تَفِ رَبَ كٌلٌن عَلْ وٌن تَن. عَ مُ دَشَ عَ شَ سِمَيَ وُرِ بٌفِ دٌن، شَ نَ مُ عَ رَ عَ مُ قَشَمَ.» 23 مَرِفِ عَلَتَلَ نَشَ عَ رَ مِنِ عٍدٍن، عَ شَ بْشِ رَوَلِ عَلَ عَ دَاشِ نَشَن نَ. 24 عَ عَدَ مَ كٍرِ شَنبِ، مَرِفِ عَلَتَلَ نَشَ مَلٍكّيٍ يَامَرِ، عٍ شَ تِ عٍدٍن سٌفٍتٍدٍ بِرِ رَ. عٍ شَ نُ سَنتِدّفّمَ تّ دَاشِ مَلِنتَن، نَ سِمَيَ وُرِ كَنتَدٍ.