1 عَلَتَلَ نَشَ عَ مَسٍن عِبُرَ مَ بّ، «عِ شَ بْشِ بّحِن، عِ شَ مِشِيٍ بّحِن، عِ شَبِلّ بّحِن. عِ شَ سِفَ بْشِ مَ ﭑ دّننَشّ مَسٍنمَ عِ بّ. 2 ﭑ عِ قِندِ مَ نّ سِ بٍلٍبٍلٍ رَ. ﭑ بَرَكّ سَمَ نّ عِ شَ قٍ. ﭑ عِ شِلِ فبٌمَ نّ. مِشِيٍ قَن بَرَكّ سْتْمَ عِ تَن نَن سَابُي رَ. 3 مِشِ نَشَن دُبَمَ عِ بّ، ﭑ قَن بَرَكّ سَمَ نّ نَ كَنيِ مَ. مِشِ نَشَن عِ دَنكَمَ، ﭑ قَن نَ كَنيِ دَنكَمَ نّ. دُنِحَ بِرِن بَرَكّ سْتْمَ عِ تَن نَن سَابُي رَ.»

4 نَ تّمُي عِبُرَ مَ نَشَ كٍلِ شَرَنِ عَلْ عَلَتَلَ عَ مَسٍنشِ عَ بّ كِ نَشّ. لٌتِ قَن نَشَ بِرَ عَ قْشْ رَ. 5 عِبُرَ مَ تٌ كٍلِ شَرَنِ، عَ شَ سِمَيَ نُ بَرَ حّ تٌنفٌ سٌلٌقٍرٍ نُن سُولِ لِ. عَ نَشَ عَ شَ فِنّ سَرَيِ، عَ شُنيَ شَ دِ لٌتِ، عَ هَرِفٍ بِرِن، نُن مِشِيٍ عَ نَشٍيٍ سْتْ شَرَنِ، عَ نَشَ عٍ بِرِن شَنِن كَنَان بْشِ مَ.

6 عِبُرَ مَ نَشَ حّرّ هَن عَ نَشَ وُرِ بِلِ بٍلٍبٍلٍ ندٍ لِ دّننَشّ شِلِ مٌرٍ، سِكٍمِ مَبِرِ. كَنَانكَيٍ نُ سَبَتِشِ مّننِ نّ. 7 عَلَتَلَ نَشَ عَ يّتّ مَسٍن عِبُرَ مَ بّ. عَ نَشَ عَ قَلَ، «ﭑ يِ بْشِ نَن قِمَ عِ بْنسْي مَ.» نَ كُي عِبُرَ مَ نَشَ سّرّشّبَدٍ يَءِلَن عَلَتَلَ بّ نَشَن مِنِشِ عَ مَ. 8 عَ نَشَ سِفَ فٍيَ مَ بٍتٍلِ قُفٍ رَ. عَ نَشَ كِرِ بَنشِ تِ مّننِ، بٍتٍلِ نَ عَ سٌفٍفٌرٌدٍ، عَيِ نَ عَ سٌفٍتٍدٍ. عَ نَشَ سّرّشّبَدٍ يَءِلَن عَلَتَلَ بّ، عَ قَ عَ مَشَندِ عَ شِلِ رَ. 9 نَ شَنبِ عَ نَشَ سِفَ نٍفٍوِ فبٍنفبٍرٍن يِرٍ بِرِ.

10 نَ تّمُي، كَامّ نُ بَرَ دِن كَنَان بْشِ رَ. عِبُرَ مَ نَشَ سِفَ مِسِرَ. 11 بٍينُ عٍ شَ سٌ مِسِرَ بْشِ مَ، عِبُرَ مَ نَشَ عَ قَلَ عَ شَ فِنّ سَرَيِ بّ، «ﭑ عَ كٌلٌن، فِنّ تٌقَنيِ نَن عِ رَ. 12 مِسِرَكَيٍ نَ عِ تٌ يَ، عٍ عَ قَلَمَ نّ ﭑ مَ فِنّ نَن عِ رَ. نَ شَنبِ، عٍ ﭑ قَشَمَ نّ، عَلَكٌ عٍ شَ عِ تٌنفٌ. 13 عِ شَ عَ قَلَ عٍ بّ ﭑ شُنيَ نَن لَنشِ عِ مَ، عَلَكٌ عٍ شَ مّينِ ﭑ مَ عِ شَ قٍ رَ. نَ كُي، ﭑ مُ قَشَمَ عِ تَن سَابُي رَ.»

14 عِبُرَ مَ تٌ مِسِرَ لِ، مِسِرَكَيٍ نَشَ عَ تٌ، سَرَيِ فِنّ تٌقَنيِ نَن عَ رَ. 15 مِسِرَ مَنفّ شَ سَنسَلَيٍ تٌ سَرَيِ مَتْشْ عَ بّ، عَ نَشَ عَ شَنِن عَ شْنيِ. 16 مَنفّ نَشَ مّينِ عِبُرَ مَ مَ سَرَيِ سَابُي رَ. عَ نَشَ شُرُ سٍ لَنمَيٍ، شُرُ سٍ شُنفبٍيٍ، سٌقَلٍيٍ، كٌنيِيٍ، نُن حْشْمّيٍ قِ عَ مَ.

17 كْنْ عَلَتَلَ نَشَ قُرٍ حَاشِ سَ مِسِرَ مَنفّ نُن عَ شَ دٍنبَيَ مَ، عِبُرَ مَ شَ فِنّ سَرَيِ شَ قٍ رَ. 18 مِسِرَ مَنفّ نَشَ عِبُرَ مَ شِلِ. عَ نَشَ عَ قَلَ عَ بّ، «عِ مُنسٍ رَبَشِ ﭑ نَ؟ مُنقٍ رَ عِ مُ عَ قَلَ ﭑ بّ عِ شَ فِنّ نَن عَ رَ. 19 مُنقٍ رَ عِ عَ قَلَشِ عِ شُنيَ نَ عَ رَ، هَن ﭑ تَن بَرَ عَ قِندِ ﭑ مَ فِنّ رَ؟ عَوَ، ﭑ كٌ، عِ شَ فِنّ نَن يَ. وٌ سِفَ!» 20 نَ شَنبِ، مِسِرَ مَنفّ نَشَ عِبُرَ مَ شَ قٍ قَلَ عَ شَ كٌرٌفبَيٍ بّ. عٍ نَشَ عَ رَفبّنفبّن، عَ تَن، عَ شَ فِنّ، نُن عَ هَرِفٍ بِرِن.