81
تُلِ مَتِقٍ عَلَ مَ
عَلَ مَشَندِ
1 عَسَقِ شَ بّيتِ بّيتِبَيٍ شَ مَنفّ بّ. عَ شَ بَ مَشَسٍ لُوتِ دَاشِ شُي رَ.
2 وٌ شَ سّيوَ شُي رَتٍ عَلَ مَ،
نَشَن قِندِشِ وٌن سّنبّ رَ.
وٌ وٌ شُي رَ سِفَ يَشُبَ مَرِفِ عَلَ مَ.
3 وٌ شَ بّيتِ بَ مَشَسٍ نُن كْرَ شُي رَ.
4 وٌ شَ قٍرِ قٍ كِكٍ نّينّ تٍ تّمُي،
وٌن مَ سَلِ لْشْي نَ عَ رَ.
5 نَ قِندِشِ عَلَ شَ سّرِيّ نَن نَ عِسِرَيِلَ بّ،
يَشُبَ مَرِفِ عَلَ شَ يَامَرِ نَ عَ رَ.
6 يَامَرِ نَ عَ رَ عَلَ نَشَن سٌ يُسُقُ بْنسْي يِ رَ،
عَ تٌ مِنِ مِسِرَ بْشِ شِلِ مَ.
ﭑ نَشَ شُي ندٍ مّ ﭑ مُ نَشَن كٌلٌن، عَ نَشّ،
7 «ﭑ بَرَ كٌتٍ بَ عٍ شُن مَ،
ﭑ بَرَ دٍبٍ بِنيٍ بَ عٍ بّلّشّيٍ.
8 وٌ تٌ ﭑ شِلِ وٌ شَ حَشَنكَتّ كُي،
ﭑ نَشَ وٌ رَكِسِ، ﭑ نَشَ وٌ يَابِ كٍلِقٍ سٍسَرِنيِ يِرٍ،
ﭑ نَشَ وٌ مَتٌ مٍرِبَ يٍ يِرٍ.
9 ﭑ مَ حَمَ عِسِرَيِلَ، وٌ وٌ تُلِ مَتِ ﭑ مَ مَرَ سِ رَ.
10 وٌ نَشَ عَلَ فبّتّ بَتُ،
وٌ نَشَ وٌ شِنبِ سِن عَلَ فبّتّ مَ.
11 ﭑ تَن نَن نَ وٌ مَرِفِ عَلَ رَ،
نَشَن وٌ رَ مِنِ مِسِرَ بْشِ رَ.
وٌ وٌ دّ رَبِ عَ بٍلٍبٍلٍ رَ، ﭑ عَ رَقٍمَ نّ.»
12 «كْنْ ﭑ مَ حَمَ مُ عَ تُلِ مَتِشِ ﭑ نَ،
عِسِرَيِلَ مُ ﭑ شُي رَتِنمّ.
13 نَ كُي ﭑ نَشَ عٍ لُ عٍ شَ بْحّ شْرْشْيَ كُي،
عٍ شَ حّرّ عٍ يّتّ شَشِلِ مَ.
14 شَ عَ سَ لِ نُ ﭑ مَ حَمَ نَشَ عَ تُلِ مَتِ ﭑ نَ،
شَ عِسِرَيِلَ سَ تِن ﭑ مَ كِرَ رَ نُ،
15 ﭑ قَمَ نّ عَ يَشُي بِرِن نَيَافِدٍ كٍرٍن نَ،
ﭑ عٍ رَفٌرٌ تّمُي بِرِن.
16 عَلَتَلَ يَشُييٍ قَمَ فَاشُدٍ عَ يَ رَ،
عٍ هَلَكِ عَبَدَن.
17 كْنْ ﭑ وٌ تَن بَلٌمَ نّ دٌنسٍ قَنيِ رَ،
ﭑ كُمِ رَ مِنِمَ نّ فّمّ كُي وٌ بّ.»