1 टायर ङा पिप हीराममी सोलोमन आ आफ आ पा ङा पिप दुम्‍शो बाक्‍ब देंशो लोव़ नेना बाक्‍त। मिनु मेकोमी आ गेय पाइब आन कली सोलोमन आ बाक्‍तीक सोइक्‍ता बाक्‍त। मारदे हना मेको गेना हना यो दाऊद आ वारच दुम्‍शा बाक्‍शो बाक्‍माक्‍त। २सामुएल ५:११ 2 मिनु सोलोमनम हीराम कली लोव़ सोइक्‍ता बाक्‍त। 3 मार लोव़ सोइक्‍ता बाक्‍त देंशा हना “परमप्रभु यावे, आं आफ दाऊदम आ परमप्रभु आ नें कली मान पा खिं का सेल्‍चा थुं पशा यो सेल्‍ने मच‍ब। मारदे हना मेको आ एर ओंथ नेल्‍ल ङा जोरी सत्रु नु लडाइ दुम्‍‍तीके नु परमप्रभु यावेमी मग्रापदा सम्‍म मोदेंशो दुम्‍शो बाक्‍‍त। गे मेको लोव़ नेल्‍ल तुइक्‍नीनी। 4 तन्‍न मुल परमप्रभु यावे, आं परमप्रभुमी आं कली सुइ नु लडाइ मपपाइक्‍थु, थुं नाइश्‍शा बाक्‍चा गेती। आं कली लडाइ तोशा श्‍येत गेब सुइ मबाक्‍नीम। 5 मोपतीके मुल परमप्रभु यावेमी आं आफ दाऊद कली देंशो खोदेंशो पा, गो परमप्रभु यावे, आं परमप्रभु आ नें कली मान पा, खिं का सेलु दें‍ती। परमप्रभु यावेमी आं आफ दाऊद कली ‘गे इ पा ङा पिप दुम्‍‍ब इ तौमी आं कली मान पा खिं का सेल्‍ब’ देंशो बाक्‍त। २सामुएल ७:१३ 6 मोपतीके गे आं कली लेबानोन रे लाइश्‍शो रवा क्‍योरशा चाक्‍चा हुकुम गेयीनी। आं गेय पाइबपुकी, इन गेय पाइबपुकी नु गारशा गेय पाइनीम। मिनु गे इन गेय पाइब आन कली दोशो गाल्‍च गेचा देंनीनी, गो मेको गेनुङमी। सीदोनी खोदेंशो पा शी क्‍योरस जोक्‍ब एक आंइ दातेमी सुइ मबाक्‍नीम” दे लोव़ कुरब मुर सोइक्‍ता बाक्‍त।

7 मिनु हीरामम सोलोमन आ लोव़ नेंशा थाम्‍पा ग्‍येरसीशा “परमप्रभु यावे ठेयब बाक्‍ब। मारदे हना मेकोम दाऊद कली इश्‍का मुर आन कली सासन पाइब जोक्‍ब तुइक्‍ब तौ का गेप्‍तु” देंमाक्‍त। १राजा १०:९ 8 मिनु हीरामम सोलोमन कली “गो इन सोइश्‍शो लोव़ नेंता। इन माल्‍शो नेल्‍ल गेनुङ। लेबानोन ङा लाइश्‍शो रवा नु अरु रवा आन शी खाप्‍शा गेनुङ। 9 आं गेय पाइबपुकीम मेको रवा लेबानोन रे समुन्‍द्र सम्‍म चाक्‍नीम। मिनु गो मेको शी फ्रेंपाइश्‍शा, इन देंतीक सम्‍म समुन्‍द्रम योल्‍पाइश्‍शा सोइक्‍पाइक्‍नुङमी। गो मेको आन कली इन दें‍तीकेम प्राक्‍पाइक्‍नुङमी। मिनु गे मेको लाइक्‍ने चाप्‍नीनी। मिनु गे आं खिं कली जचा थोव़क सोइश्‍शा आं मिम्‍शो ख‍पीन” दे लोव़ कुरब मुर सोइक्‍ता बाक्‍त। 10 मोपा हीरामम सोलोमन कली माल्‍शो लेबानोन ङा लाइश्‍शो रवा आ शी नु अरु शी नेल्‍ले सोइक्‍ता बाक्‍त। 11 मिनु सोलोमनम चहिं मेको आ पा ङा हीराम आ खिं कली २० हजार कोर चेरब नु २० कोर रिम्‍शो तेल सोइक्‍ता बाक्‍त। मोपा सोलोमनम बर्स बर्सम मेको सोइक्‍ता बाक्‍त। कोर का २२० लिटर बाक्‍ब। १राजा ५:२ 12 मिनु परमप्रभु यावेमी कबल पा देंशो खोदेंशो पा सोलोमन कली जोक्‍तीक तुइक्‍तीक थुं गेवा बाक्‍त। मिनु हीराम नु सोलोमन आस दातेमी दुशा बाक्‍तीक दुम्‍माक्‍त। मिनु मेको निम्‍फा गारशा बाक्‍स, दे सल्‍ला पमु‍सा बाक्‍त।

13 मिनु पिप सोलोमनम इस्राएल नेल्‍ल रे मोशा गेय पाइब ३० हजार मुर आन कली खुप्‍ती‍मी बाक्‍त। 14 मिनु मेकोमी मेको आन कली महिना महिनाम १०, १० हजार पा लेबानोनम सोइक्‍ती‍मी बाक्‍त। मोपा मुरपुकी महिना का लेबानोनम नु महिना निक्‍शी आन खिंम बाक्‍मा बाक्‍त। मेको गेय पाइब आन कली कोव़ब अदोनीराम बाक्‍माक्‍त। १राजा ४:६ 15 सोलोमन के ७० हजार कुरब नु ८० हजार फुल्‍लु ख्रोइक्‍ब मुर पहाडम बाक्‍मा बाक्‍त। 16 सोलोमन आ गेय पाइब आन कली कोव़ब ३३ सहे ठेयब मुर बाक्‍मा बाक्‍त। 17 मिनु पिप आ अरेशो खोदेंशो पा, परमप्रभु यावे आ खिंम जग वोइक्‍चा कली रिम्‍शो पा फुल्‍लु ख्रोइश्‍शा ग्रुंइद‍मे बाक्‍त। 18 मोपा सोलोमन नु हीराम आस मुरपुकी नु गेबाल ङा मुरपुकीम खिं सेल्‍चा कली फुल्‍लु ख्रोइश्‍शा शी ठीक सेल्‍मे बाक्‍त। यहोसु १३:५; इजीकीएल २७:९