13
सावल पलिस्ती नु लडाइ पशो
1 सावल पिप दुम्मेनु, ३० बर्स खोदेंशो दुम्शो बाक्माक्त। मेकोमी इस्राएल कली ४२ बर्स क्येङा शुश सासन पवा बाक्त। एको लोव़ मतुंइसीब। मारदे हना माइत हिब्रू किताबमी क्याम्सीशो बाक्माक्त। 2 सावलमी इस्राएल ङा हजार सां मुर आन कली योव़मी बाक्त। मिनु हजार निक्शी आं नु मिकमाशम नु बेथेल ङा पहाडीम बाक्मा बाक्त। मिनु हजार का मुर योनाथन नु बेन्यामीन ङा गिबाम बाक्मा बाक्त। लीशो मुर आन कली चहिं आन खिं सोइक्तीमी बाक्त। 3 मिनु योनाथनम गेबा ङा पलिस्ती आन ठेयब मुर कली सदा बाक्त। मिनु मेको लोव़ पलिस्ती आन दातेमी ब्रमाक्त। मिनु सावलमी “हिब्रू नेल्लेम नेंन्मेक्ल” दे रागी नेल्लेमी तुराही ताप्पदा बाक्त। १सामुएल १४:४९ 4 मिनु सावलम पलिस्ती आन ठेयब मुर साइक्तीके, पलिस्तीपुकीम इस्राएली आन नें थिचा ग्रांग्रा दीनीम देंशो नेंन्मे बाक्त। मिनु सावल कली वारच पा लडाइ पचा कली मुर नेल्ल गिल्गालमी ब्रेत्मे बाक्त।
5 मिनु पलिस्तीपुकी इस्राएली नु लडाइ पचा कली बुक्मा बाक्त। मेकोपुकी नु ३० हजार बग्गी, ६ हजार शारा ङोइक्बपुकी नु समुन्द्र ङा बाल्वा खोदेंशो पा हिक्ने मचाप्चा ङा पा खोइलीम गाक्ब लडाइ पाइब मुर बाक्मा बाक्त। मेकोपुकी इर ग्रूशा, बेथ-आवेन आ पूर्ब गे मिकमाशम आन बाक्तीके सेल्मे बाक्त। 6 मिनु इस्राएलीपुकीमी थम श्येत जामे बाक्त। मारदे हना लडाइ पाइबपुकी थाम्पा आइक्च सेल्चा पुंइसमा बाक्त। मोपतीके मेकोपुकी पुक्खी, काक्पे, सेरथे फुल्लु आन दातेम, बेक्शो मुर वोइक्तीके नु इनार आगाम ख्रुंइसमा बाक्त। 7 का निक्शी हिब्रू यर्दन खोला शोक्शा, गाद आन रागी गिलाद जाक्दीम्मा बाक्त। तन्न सावल चहिं गिल्गाल उइ बाक्माक्त। मेको आ नोले खोइक्ब नेल्ले थाम्पा हिंशा ख्रिंख्रि पामे बाक्त।
8 मिनु सावलमी सामुएल कली ७ नाक्त सम्म रिम्दा बाक्त। तन्न सामुएल गिल्गालमी मजाक्माक्त। मोपतीके मुरपुकी सावल आ बाक्तीक रे नोले शोंइसीमा बाक्त। १सामुएल १०:८ 9 मिनु सावलमी “चोशा चढ़ेतीक नु दुशा बाक्चा आ पर्बम चढ़ेतीक एक आं बाक्तीक चाक्कीन” देंमाक्त। मिनु आंमान चोशा चढ़ेतीक चढ़ेवा बाक्त। 10 सावलम चोशा चढ़ेतीक चढ़ेने थुमा नोले सामुएल जाक्माक्त। मिनु सावल मेको कली ग्रुम्थ लमाक्त। 11 मिनु सामुएलमी “एको मार पवी” देंमाक्त। मिनु सावलमी “मुरपुकीम आं कली प्रोंइशा, लशो तातामी। इन जाक्नुङ देंशो ना मजाक्नी। पलिस्तीपुकी मिकमाशम बुक्तेक्म। 12 पलिस्तीपुकी गो नु लडाइ पथ गिल्गालम जाक्नीम, दे मिम्ताक्ङ। गो परमप्रभु यावेम शिशी पवल, दे मपुनु। मोपतीके गो आंमान एको चोशा चढ़ेतीक चढ़ेचा माल्ताक्यी” देंमाक्त। 13 मिनु सामुएलमी सावल कली “गे मूर्ख गेय पाप्तीवी। परमप्रभु यावे, इ परमप्रभुमी शेंशो लोव़ मटिवी। गे टिशो नवे हना, परमप्रभु यावेमी इ राज्य इस्राएलमी गेना हना यो लीपद वा। 14 तन्न मुल इ राज्य मली। परमप्रभु यावेम आ दाक्शो मुर का योव़तु। परमप्रभु यावेमी मेको कली आ मुर आन पिप सेल्ब। मारदे हना, गे परमप्रभु यावे आ लोव़ मटिवी” देंमाक्त। १सामुएल १६:१; प्रेरित १३:२२
15 मिनु सामुएल बोक्शा, गिल्गाल प्रोंइशा, बेन्यामीन आ गिबा गे खोदा बाक्त। लीशो मुरपुकी चहिं सावल आ नोले लडाइ पाइब दुम्चा कली खोदमे बाक्त। मिनु सावलमी मेको मुर आन कली हिक्गानु, मेको नेल्ल पा ६ सहे मुर बाक्मा बाक्त। 16 सावल, मेको आ तौ योनाथन नु मेको नु बाक्शो मुरपुकी नु बेन्यामीन आ रागी गेबाम लीमा बाक्त। पलिस्तीपुकी चहिं मिकमाशम आन बाक्तीक सेल्शा बाक्मा बाक्त। 17 मिनु पलिस्ती आन बाक्तीक रे रोइक्बपुकी हुल सां ग्रूमा बाक्त। हुल का शुआल आ रागीम बाक्शो ओफ्रा गे लमा बाक्त। 18 अर्को हुल बेथ-होरोन गे लमा बाक्त। मिनु लीशो हुल चहिं डांडा गे लमा बाक्त। मेको डांडा रे सेबोयीम ङा बेंसी गोरशो रागी तांइसीबाक्माक्त।
19 मेना इस्राएल रागीमी तुप्तील का यो मथिंसीबाक्माक्त। मारदे हना पलिस्तीपुकीम हिब्रू आन कली तरवार नु तूतीक सेल्चा मगेशो बाक्मा बाक्त। न्यायाधीस ५:८ 20 इस्राएलीपुकी आंम फाली, कोदाली, खा नु गुये शेप्थी यो पलिस्ती आन खिं लचा माल्बाक्मा बाक्त। 21 फाली का नु कोदाली का शेप्चा कली शेकेल का के भाग सांमी भाग निक्शी थाप्चा माल्बाक्मा बाक्त। खा नु ब्यफ खुल्तीक कोक्के शेप्चा कली शेकेल का के भाग सांमी भाग का थाप्चा माल्बाक्मा बाक्त। शेकेल का ११.५ ग्राम बाक्ब। मेको शेप्तीक गेय कली का का कली ३.५ ग्राम चांदी थाप्शो बाक्तेक्म। 22 मोपतीके लडाइ दुम्मेनु, सावल नु योनाथन नु बाक्शो लडाइ पाइब आन के तरवार नु तूतीक का यो मबाक्माक्त। तन्न सावल नु योनाथन आस के ला बाक्माक्त।
23 पलिस्तीपुकी मिकमाश ङा लां मेर लमा बाक्त।