16
सामुएलम दाऊद कली पिप सेल्शो
1 परमप्रभु यावेमी सामुएल कली “गे सावल आ पर्बम गेना सम्म सुर्ता पा बाक्नेवे? गो मेको कली पिप दुम्तीक रे ग्रुंइताक्ङ। मुल गे नु बाक्शो ग्रोव़मी तेल कुर पा लतो। गो इ कली बेथलेहेम ङा येस्से आ बाक्तीक सोइक्नन। मारदे हना, गो मेको आ तौ का कली पिप सेल्चा कली योव़ता” देंमाक्त। १सामुएल १५:२३,३५ 2 मिनु सामुएलमी “गो दोपा लने चाप्नुङा? एको लोव़ सावलम नेंशा, आं कली साइक्ब” देंमाक्त। मिनु परमप्रभु यावेम “गे मगिक्शो बी का लतो। मिनु परमप्रभु यावे कली क्योरशा चढ़ेथ जाक्त, देनो। 3 येस्से कली यो मेको चढ़ेतीक चाडम ब्रेत्तो। मिनु गे मार पचा माल्नेवे गो शेंनन। गो सु कली कोंइनुङा मेको कली गे तेल लुक्तो” देंमाक्त। 4 मिनु सामुएलमी परमप्रभु यावे आ देंशो खोदेंशो पवा बाक्त। मेको बेथलेहेम लमाक्त। मिनु सहर ङा खूशोपुकी ख्रिंख्रि पा ग्रुम्थ जाक्शा, मेकोपुकीमी “गे मारदे जाक्नी? मार, नेल्ल रिम्शोन बाक्बा” देंमा बाक्त। 5 मिनु सामुएलमी “नेल्ल रिम्शोन बाक्ब। गो परमप्रभु यावे कली चढ़ेथ जाक्ती। गेपुकी आंम कली ठीक सेल्सीशा, चढ़ेतीकेम जाक्कीन” देंमाक्त। मिनु मेकोम चहिं येस्से नु आ तौ आन कली परमप्रभु यावे आ ङोंइती ठीक सेल्शा चढ़ेतीकेम ब्रेत्तीमी बाक्त।
6 मिनु मेको नेल्ल जाक्मा नोले सामुएलमी एलीआब कली तशा “परमप्रभु यावेम तेल लुक्चा देंशो मुर एकोन बाक्ब” दे मिम्ता बाक्त। 7 तन्न परमप्रभु यावेम मेको कली “मेको दारशो नु लाइश्शो बाक्त हना यो, मेको कली ममिम्तो। गो मेको कली पिप मसेल्नुङ। गो, परमप्रभु यावेम मुरुम खोदेंशो पा मकोव़नुङ। मुरुम रां दारशो कोव़शा मिम्नीम। गो मुर आ थुं कोव़नुङ” देंमाक्त। येरमीया १७:१०; प्रकाश २:२३; प्रेरित १०:३४ 8 मिनु येस्सेमी अबीनादाब कली ब्रेत्ता बाक्त। मिनु सामुएल आ ङोंइती गाक्पदा बाक्त। तन्न मेकोमी “ममाइ, परमप्रभु यावेम योव़शो एको ममाइ” देंमाक्त। 9 मिनु येस्सेमी शम्माह कली चाक्गा बाक्त। तन्न सामुएलमी “परमप्रभु यावेम एको कली यो मयोव़ङ” देंमाक्त। 10 मोपा येस्सेमी आ ७ जना तौ आन कली सामुएल आ ङोंइती चाक्मी बाक्त। तन्न सामुएलमी “एको तेकोइ आन कली परमप्रभु यावेम मयोव़मी” देंमाक्त। १इतिहास २:१३-१५; १सामुएल १७:१२ 11 मिनु सामुएलमी “मार इ तौ नेल्ल ओशोन नमी” देंमाक्त। मिनु येस्सेमी “मुल यो कान्छा का नु बाक्ब। तन्न मेको दा भेडा गोठला बाक्ब” देंमाक्त। मिनु सामुएलम येस्से कली “मेको कली ब्रेत्थ सोइक्तो। मेको मजाक्म सम्म गो मनित्थु बाक्नय” देंमाक्त। १सामुएल १७:१४ 12 मोपतीके मेकोमी मेको कली ब्रथ मुर सोइक्ता बाक्त। मेको लल चोव़चो पाइश्शो, दारशो मिक्च पाइश्शो नु दारशो ठिटा का बाक्माक्त। मिनु परमप्रभु यावेम सामुएल कली “बोक्शा, मेको कली तेल लुक्तो। एकोन बाक्ब” देंमाक्त। 13 मिनु सामुएलमी तेल बाक्शो ग्रोव़ ग्रुंइशा, आ लोक्ब आन ङोंइती तेल लुक्ता बाक्त। मिनु परमप्रभु यावे आ सोक्त दाऊद तार जुक्ता बाक्त। मिनु मेना रे मेको नुन बाक्माक्त। मिनु सामुएल रामाह ङा लां खोदा बाक्त। २सामुएल २:४; २सामुएल ५:३; भजन संग्रह ८९:२१
दाऊद सावल आ या कुरब दुम्शो
14 मिनु परमप्रभु यावे आ सोक्तीम सावल कली प्रोना बाक्त। परमप्रभु यावे रे मरिम्शो पाइब सोक्तीम मेको कली श्येत गेवा बाक्त। 15 मेको आ गेय पाइबपुकीम सावल कली “कोव़ङीन हजुर, परमप्रभुमी इन कली श्येत गेब सोक्त गेशो बाक्ब। 16 इन ङोंइती बाक्शो इन गेय पाइब आन कली इन पर्बम बीना ताप्ब का माल्शा चाक्कीन, दे मारदे मदेंनी? परमप्रभु रे मेको मरिम्शो पाइब सोक्तीम इन कली सुम्ब। मेना मेको मुरुम बीना ताप्ब। मिनु गे सानीनी” देंमा बाक्त। 17 मिनु सावलमी आ गेय पाइब आन कली “रिम्शो बीना ताप्ब मुर का मालीन। मिनु मेको कली आं बाक्तीक चाक्कीन” देंमाक्त। 18 मिनु मेको आ गेय पाइब आन दाते ङा काम “बेथलेहेम ङा येस्से आ तौ आन दातेमी, काम ताप्शो गो नेंशो बाक्नुङ। मेको बोल्यो मुर बाक्ब। मिनु रिम्शो लडाइ पाइब, निप्स खाप्शा ब्वाक्ब नु दारशो यो बाक्ब। परमप्रभु यावे मेको नु बाक्शो बाक्ब” देंमाक्त। 19 मोपतीके सावलमी लोव़ कुरब मुर कली येस्से आ बाक्तीक सोइक्ता बाक्त। मिनु मेकोम आ भेडा योव़ब तौ दाऊद कली सावल आ बाक्तीक सोइक्तीक हुकुम पवा बाक्त। 20 मिनु येस्सेमी कुशुल के थैलो का शांबु, पाठा का इच्का खोइ शोब्ले कुर पा नु आ तौ दाऊद कली सावल आ बाक्तीक सोइक्ता बाक्त। 21 मिनु दाऊद सावल आ बाक्तीक जाक्माक्त। मिनु मेको आ गेय पतीकेमी योव़से बाक्त। सावलम मेको कली थाम्पा दाक्चा गोवा बाक्त। मिनु मेको सावल आ या कुरब दुम्माक्त। 22 मोपतीके सावलम येस्से कली “दाऊद आं गेयमीन बाक्ल। मारदे हना गो मेको तशा ग्येरसाक्यी” दे लोव़ कुरब सोइक्ता बाक्त। 23 मिनु परमप्रभु रे मरिम्शो श्येत गेब सोक्त सावल तार जुक्तानु, दाऊदमी बीना ताप्बाक्माक्त। मिनु मरिम्शो पाइब सोक्तीम प्रोंइशा लमेनु, सावल साबाक्माक्त।