१ थिस्‍सलोनिकी
ब्रेक्‍ब मुर: एको चिठी पावल थिस्‍सलोनिकी आन कली आ ङोंइती ब्रेक्‍शो चिठी बाक्‍ब।
गेना ब्रेक्‍शो: पावल निक्‍शी खेयप रागी रागी लशा, कोरिन्‍थ सहरम बाक्‍शा, एको चिठी ५३ ए. डी. मेको बर्स ङा ङोंइती ङा महिनाम ब्रेक्‍शो बाक्‍ब।
मार ब्रेक्‍शो:
१. पावलमी श्‍येत जाइब नक थमा सुइक्‍ब आन थुं बारपाइक्‍तु।
२. पावलमी थमा सुइक्‍ब आन कली प्रभु कली शिरशो गेय पचा आ पर्बम अरेब।
३. पावलमी येसु ख्रीस्‍त दोपा लेश्‍शा जाक्‍बा, मेको शेंब। मारदे हना दूली शेंब ग्रुम्‍तीकेम जाक्‍शा, मुर आन थुं क्‍याल्‍तेक्‍म।
1
ङोंइती ङा लोव़
गो पावल नङ। सिल्‍वानस नु तिमोथी यो गो नु बाक्‍नीस। गो इं आफ परमप्रभु यावे नु इं प्रभु येसु ख्रीस्‍त कली थमा सुइक्‍ब थिस्‍सलोनिकी सहर ङा इन कली चिठी ब्रेक्‍ताक्‍ङ। येसु ख्रीस्‍तमी इन कली शिशी पा इन थुं नाइक्‍चा गेवल। प्रेरित १५:४०; प्रेरित १६:१-३,१९; प्रेरित १७:१-९; २थिस्‍सलोनिकी १:१
थिस्‍सलोनिकी ङा थमा सुइक्‍ब
गोपुकी प्रार्थना पकानु, परमप्रभु यावे कली “गे थिस्‍सलोनिकी सहर ङा थमा सुइक्‍ब नेल्‍ल आन रिम्‍शो पाइतीनी” दे गेना हना यो देंनीकी। गोपुकी इं आफ परमप्रभु यावे आ ङोंइती इन थमा सुइक्‍तीके ङा गेय, दाक्‍चा ङा गेय नु इं प्रभु येसु ख्रीस्‍त कली आस पतीके मिम्‍ना मिम्‍न बाक्‍नीकी। १कोरिन्‍थी १३:१३ आंइ थमा सुइक्‍ब लोक्‍बपुकी, परमप्रभु यावेमी इन कली दाक्‍शा योव़तु, दे तुइक्‍नीकी। मारदे हना इन कली शेंशो ग्‍येरपाइक्‍ब लोव़ पचा ला मशेंदक, सक्ति यो ताइतीनी। परमप्रभु यावे आ सोक्‍तीमी आंइ कली शुश तुइक्‍तीक थुं गेशा प्रिंताक्‍व। गोपुकी दोदेंशो मुर बाक्‍नीकी, दे गेपुकी नु बाक्‍शा कोंइताक्‍क। मिनु गे तुइक्‍ताक्‍नी। १कोरिन्‍थी २:५ गेपुकी आंइ खोदेंशो नु प्रभु खोदेंशो पाइब दुम्‍तीनी। मारदे हना गेपुकी शुश श्‍येत जशा, परमप्रभु यावे आ लोव़ नेंतीनी। मिनु परमप्रभु यावे आ सोक्‍तीमी इन थुं ग्‍येरपाइक्‍तु। २थिस्‍सलोनिकी ३:७ मोपा गेपुकी मासीडोनीया नु आकाया रागी ङा थमा सुइक्‍ब आन कली रिम्‍शो कोंइतीक दुम्‍तीनी। ङोंइती गेपुकी प्रभु आ लोव़ मासीडोनीया नु आकाया रागी ङा मुर आन कली शेंताक्‍नी। मेको आन कली ला ममाइ, नेल्‍ल अर्को रागी ङा मुरपुकीमी यो इन परमप्रभु यावे थमा सुइक्‍तीके तुइक्‍ताक्‍म। मोपतीके गो मेकेर शेंचा ममाल्‍नीकी। रोमी १:८ मेकोपुकीमी इं पर्बम लोव़ पाम्‍तेक्‍म। मार लोव़ पाम्‍तेक्‍म देंशा हना, थिस्‍सलोनिकी सहर ङा मुरपुकीमी आंइ कली मिश रिम्‍शो ब्राम्‍तेक्‍म। मिनु गेपुकी इन मूर्ति कली प्रोंइशा, परमप्रभु यावे कली थमा सुइक्‍ब दुम्‍शा, ब्रोंइशा बाक्‍ब, थमा परमप्रभु यावे आ गेय पाइब दुम्‍तीनी। प्रेरित १४:१५; १कोरिन्‍थी १२:२ 10 मिनु बेक्‍शो रे सेंशो परमप्रभु यावे आ तौ लेंशा सरीङ रे यीब, दे रिम्‍शा बाक्‍तीनी। येसुमी इं कली परमप्रभु यावे आ गाइक्‍चा रे प्रोंइब। तीतस २:१३