२ पत्रुस
ब्रेक्‍ब मुर: पत्रुसमी एको चिठी थमा सुइक्‍ब आन कली नोले ब्रेक्‍शो बाक्‍त।
गेना ब्रेक्‍शो: एको चिठी ङोंइती ङा क्‍येङा इच्‍का नोले ६४-६५ ए. डी.मी मेर ब्रेक्‍शो बाक्‍त।
मार ब्रेक्‍शो: पत्रुसमी थमा सुइक्‍ब आन कली परमप्रभु यावे आ लोव़ पाइब आन ब्रेक्‍शो लोव़ तुइश्‍शा नु होस पा बाक्‍कीन, दे अरेशो बाक्‍त। मारदे हना मेको आन दाते रे दूली शेंब बोक्‍तेक्‍म। मेको दूली शेंबपुकी दोदेंशो बाक्‍नीमदेंशा हना,
१. प्रभु येसु ख्रीस्‍त परमप्रभु यावे आ तौ मबाक्‍ब।
२. क्‍येट शुश दाक्‍ब बाक्‍नीम।
३. मरिम्‍शो पचा मुने मपाइनीम।
४. नक नु बोल्‍यो मदुम्‍शो थमा सुइक्‍ब आन कली हेंथे लां कोंइनीम।
1
ङोंइती ङा लोव़
गो येसु ख्रीस्‍त आ वाइल नु आ सोइश्‍शो, सिमोन पत्रुस नङ। इं परमप्रभु यावे नु पाप रे प्रोंइब येसु ख्रीस्‍त रे पा ठीक दुम्‍तय, दे थमा सुइश्‍शा, थुं का दुम्‍तय। मोपतीके इन कली एको चिठी ब्रेक्‍ताक्‍ङ। परमप्रभु यावे नु प्रभु येसु कली तुइक्‍तीकेमी शिशी नु इन थुं नाइक्‍तीके बारना बारन लल।
थमा सुइक्‍चा नु गेय गारचा माल्‍ब
परमप्रभु यावे आ सक्तिमी ब्रोंइचा नु परमप्रभु यावे आ ङोंइती बाक्‍चा कली मार मार माल्‍या, मेको नेल्‍ल इं कली मो गेप्‍तु। दोपा गेप्‍तु देंशा हना, मेको कली तुइक्‍तीके गेप्‍तु। आ छेङछेङमी बाक्‍चा नु आ पतीके नेल्‍ल पचा कली योव़तु। १पत्रुस २:४ मोपा आ नेल्‍ल क्‍येङा ठेयब थोक्‍शा पशो लोव़ गेप्‍तु। मेको तुइश्‍शा, गेपुकी रागी ङा मुर आन दला दाक्‍स पतीके रे ब्रोंइशा, प्रोक्‍ने चाप्‍नीनी। मोपा गेपुकी परमप्रभु यावे आ पशो खोदेंशो पाइब दुम्‍नीनी। मोपतीके गे इन थमा सुइक्‍तीके नु इन पशो गेय गारचा माल्‍ब। इन पशो गेय नु “परमप्रभु यावे आ दाक्‍शो मार बाक्‍मे?” दे तुइक्‍चा माल्‍नीनी। गलाती ५:६,२२ इन तुइक्‍तीकेमी आंमा अरेसीचा माल्‍नीनी। आंमा कली अरेसीतीके, पपाइक्‍तीके नु थमा सुइक्‍तीके मप्रोंइनुङ, दे खोइली थेक्‍शा बाक्‍चा माल्‍नीनी। इन खोइली थेक्‍शा बाक्‍तीकेमी परमप्रभु यावे खोदेंशो पा गेय पने। परमप्रभु यावे खोदेंशो पा गेय पशा, थमा सुइक्‍ब आन कली आंम इन लोक्‍ब खोदेंशो पचा माल्‍नीनी। लोक्‍ब खोदेंशो पा दाक्‍चा माल्‍नीनी। गलाती ६:१० गेपुकी मोदेंशो शुश पाइतीनी हना, इं प्रभु येसु ख्रीस्‍त कली तुइक्‍तीकेमी रिम्‍शो पा शुश फल सिश्‍शो खोदेंशो दुम्‍ब। सुम मोदेंशो मपाइबा, मेको ब्रा ब्रा पा ताइब बाक्‍ब। मेको मुर आ ङोंइती पशो पाप क्‍याम्‍शो बाक्‍ब, दे प्रेंशो बाक्‍ब। १यूहन्‍ना २:९,११ 10 मोपतीके आं लोक्‍बपुकी, गेपुकीमी “गो ब्रेश्‍शो नु योव़शो मुर बाक्‍नीकी” दे गेना हना यो मिम्‍चा माल्‍नीनी। मो पाइतीनी हना, गे गेनायो नोले मशोंइ‍‍सीनीनी। 11 मिनु नोले पाप रे प्रोंइब इं प्रभु येसु ख्रीस्‍तमी इन कली आ गेना हना यो लीब राज्‍यमी रिम्‍शो पा ओव़चा गेब।
12 मोपतीके गो इन कली नेल्‍ल नाक्‍ती मोदेंशो मिम्‍पाइक्‍नुङ। गेपुकी मेको तुइश्‍शा नु थमा शेंतीके पाइब दुम्‍तीनी हना यो, गो इन कली मिम्‍पाइक्‍नुङ। 13 गो ब्रोंइङा सम्‍म इन कली मिम्‍पाइक्‍चा रिम्‍शो बाक्‍ब, दे मिम्‍नुङ। २कोरिन्‍थी ५:१ 14 इं प्रभु येसु ख्रीस्‍तमी “गे शुश नाक्‍त मलीनेवे” दे कोंइताक्‍यी। यूहन्‍ना २१:१८-१९ 15 मिनु आं लचा नोले गे नेल्‍ल नाक्‍ती आं शेंशो मिम्‍ने चाप्‍नीनी, दे शुश गेय पना पन बाक्‍नुङ।
छिङछिङम ब्रशो बत्ती
16 गोपुकीमी इन कली इं प्रभु येसु ख्रीस्‍त आ सक्ति नु आ रागीम जाक्‍शो आ पर्बम मुर आन सेल्‍शो कथा मशेंदक। तन्‍न गोपुकीमी “येसु ख्रीस्‍त नेल्‍ल क्‍येङा ठेयब बाक्‍ब” दे आंम आंइ मिक्‍चीम ताइतक। 17 इं आफ परमप्रभु यावेमी मेको कली मान पशा, आ छेङछेङ तपाइश्‍शा “मेको आं दाक्‍शो तौ बाक्‍ब। मेको कली तशा, गो ग्‍येरसाक्‍यी” देंशो सेंदा छेङछेङ रे ग्रूत। मत्ती १७:५ 18 गोपुकीमी मेको सेंदा सरीङ रे नेंतक। मारदे हना गोपुकी मेको नु परमप्रभु यावे आ डांडाम बाक्‍शो नकी। 19 मिनु गोपुकीमी साइ ङा परमप्रभु यावे आ लोव़ पाइब आन पशो लोव़ मुल रिम्‍शो पा रुप्‍तक। गे यो परमप्रभु यावे आ साइ ङा लोव़ पाइब आन ब्रेक्‍शो लोव़ रुप्‍चा नु तुइक्‍चा कली छिङछिङमी ब्रशो बत्ती खोदेंशो पा होस पा बाक्‍कीन। मिनु नोले इन थुंमी सुक्‍कुर सोरुल खोदेंशो पा छेङछेङ दुम्‍नीनु, आन ब्रेक्‍शो नेल्‍ल रुप्‍नीनी। भजन संग्रह ११९:१०५ 20 गेपुकी ङोंइती मार रुप्‍चा माल्‍नीनी देंशा हना, परमप्रभु यावे आ साइ ङा लोव़ पाइब आन ब्रेक्‍शो लोव़ मुर आन मिम्‍शो लोव़ ममाइ, 21 मुर आन थुं रे मपीब। तन्‍न परमप्रभु यावे आ सोक्‍तीम आ मुर आन कली सुम्‍शा, परमप्रभु यावे आ लोव़ ब्रेक्‍पाइश्‍शो बाक्‍ब, दे रुप्‍चा माल्‍नीनी। १तिमोथी ३:१६-१७