1 आं बाक्‍तीके सेल्‍चा कली रिम्‍शो पा किरशो सुती श्‍येले के १० ओटा ताम्‍बु साप्‍तीके प्रोव़पाइक्‍चा माल्‍नेवे। मेको सुती श्‍येले नीलो, प्‍याजी नु लल रङम नुप्‍शो बाक्‍चा माल्‍ब। मिनु मेको वामी करूब बुटा आप्‍शा, थाम्‍पा रिम्‍शो प्रोव़स जोक्‍ब मुर आन कली प्रोव़पाइक्‍चा माल्‍नेवे। 2 वा का आ लाइश्‍शो २८ कुबीत नु आ ब्रेम्‍शो ४ कुबीत दुम्‍चा माल्‍ब। मेको १० ओटा वा नेल्‍ल मोदेंशोन दुम्‍चा माल्‍नीम। कुबीत का ०.५ मिटर, खोदेंशो बाक्‍ब। 3 मिनु ५ ओटा वा बोइश्‍शा, का सेल्‍पाइक्‍चा माल्‍नेवे। मिनु अर्को ५ ओटा वा यो बोइश्‍शा, का सेल्‍पाइक्‍चा माल्‍नेवे। 4 मिनु वा आ सुर कली नीलो रङ ङा श्‍येले के बोइक्‍तीके यो सेल्‍पाइक्‍चा माल्‍नेवे। मोपा वा निक्‍शी बोइश्‍शा का सेल्‍पाइक्‍चा माल्‍ब। 5 मिनु गे का का पा ताम्‍बु साप्‍तीके ५० ओटा सेल्‍पाइक्‍चा माल्‍नेवे। मेकोपुकी गारपाइक्‍चा कली सेल्‍पाइक्‍चा माल्‍नेवे। 6 मिनु ५० ओटा सुन के ग्‍याइक्‍पाइक्‍तीके सेल्‍पतो। मोपा मेको वापुकी बोइश्‍शा, आं बाक्‍तीक ताम्‍बु आगा साप्‍तीक कान दुम्‍ब।

7 मिनु आं बाक्‍तीक ताम्‍बु साप्‍चा कली क्‍यारश आ चां के ११ ओटा टुक्रा सेल्‍पाइक्‍चा माल्‍नेवे। 8 का आ लाइश्‍शो ३० कुबीत नु आ ब्रेम्‍शो ४ कुबीत दुम्‍चा माल्‍ब। मिनु मेको ११ ओटा टुक्रा नेल्‍ल खाल का ङा दुम्‍चा माल्‍नीम। कुबीत का ०.५ मिटर खोदेंशो बाक्‍ब। 9 गे ५ ओटा टुक्रा बोइश्‍शा का नु ६ ओटा बोइश्‍शा, अर्को का सेल्‍पाइक्‍चा माल्‍नेवे। ६ ओटा बोइश्‍शो टुक्रा ताम्‍बु आ ङोंइती आ सुर तोक्‍तीके फेके का मुक्‍शा तोक्‍चा माल्‍ब। 10 मेको टुक्रा का आ सुरमी ५० ओटा बोइक्‍तीक सेल्‍पाइक्‍चा माल्‍नेवे। मिनु अर्को टुक्रा आ सुरमी यो ५० ओटा बोइक्‍तीक सेल्‍पाइक्‍चा माल्‍नेवे।

11 मिनु गे कांसा के ५० ओटा ग्‍याइक्‍पाइक्‍तीके सेल्‍पतो। मेको ग्‍याइक्‍पाइक्‍तीक बोइक्‍तीकेमी वोइश्‍शा, टुक्रा निक्‍शी के का दुम्‍चा माल्‍ब। मोपा टुक्रापुकी बोइश्‍शा, ताम्‍बु साप्‍तीक का दुम्‍ब। 12 ताम्‍बु आ साप्‍तीके आ दी गे आइदी सम्‍म तोक्‍चा ङा पा साप्‍पाइक्‍चा माल्‍नेवे। 13 निम्‍फा पटटी साप्‍पाइक्‍चा कली कुबीत का का आइदी सम्‍म तोक्‍चा ङा पा साप्‍पाइक्‍चा माल्‍नेवे। कुबीत का ०.५ मिटर खोदेंशो बाक्‍ब। 14 ताम्‍बु आ साप्‍तीके निक्‍शी आस तारी लल रङम नुप्‍शो बोका आ कुशुल के सेल्‍पाइक्‍चा माल्‍नेवे। मिनु मेको आ तार अर्को साप्‍तीके नेल्‍ल क्‍येङा रिम्‍शो कुशुल के सेल्‍पाइक्‍चा माल्‍नेवे।

15 गे आं बाक्‍तीक ताम्‍बु आ एर ओंथ थारचा कली फलेक सेल्‍पाइक्‍चा माल्‍नेवे। मेको फलेकपुकी बोल्‍यो शी के सेल्‍पाइक्‍चा माल्‍नेवे। 16 फलेक नेल्‍ल १० कुबीत ग्‍येत्‍थ लाइश्‍शो नु कुबीत का नु आधा ब्रेम्‍शो दुम्‍चा माल्‍नीम। कुबीत का ०.५ मिटर खोदेंशो बाक्‍ब। 17 फलेक नेल्‍लेमी ग्रुक्‍तीक निक्‍‍निक्‍शी आ पुं गे एर ओंथ पा सेल्‍पतो। आं बाक्‍तीक ङा फलेक नेल्‍ल मोदेंशो पा सेल्‍पाइक्‍चा माल्‍नेवे। 18 आं बाक्‍तीक कली मोदेंशो फलेक सेल्‍पाइक्‍चा माल्‍नेवे। २० ओटा फलेक दक्‍खिन गे थारचा कली सेल्‍पाइक्‍चा माल्‍नेवे। 19 मिनु गे २० ओटा फलेक आन कली ४० ओटा चांदी के राप्‍पाइक्‍तीके सेल्‍पाइक्‍चा माल्‍नेवे। फलेक का कली ग्रुक्‍तीक निक्‍शी गारचा ङा पा ग्‍याइक्‍पाइक्‍तीक निक्‍शी माल्‍ब। अर्को फलेक आन कली यो गारचा ङा पा ग्रुक्‍तीक नु राप्‍पाइक्‍तीके निक्‍‍निक्‍शी सेल्‍पाइक्‍चा माल्‍नेवे। 20 मोदेंशो पा उत्तर गे यो २० ओटा फलेक बाक्‍चा माल्‍नीम। 21 मिनु ४० ओटा राप्‍पाइक्‍तीक सेल्‍शा, फलेक कामी राप्‍पाइक्‍तीक निक्‍शी ग्रुक्‍पाइक्‍चा माल्‍नेवे। फलेक नेल्‍ल मोदेंशो पा सेल्‍चा माल्‍नेवे। 22 मिनु आं बाक्‍तीक ताम्‍बु आ नोले पटटी, पच्‍छिम गे ६ ओटा फलेक सेल्‍पाइक्‍चा माल्‍नेवे। 23 नोले पटटी ङा सुर निक्‍शी कली फलेक निक्‍शी सेल्‍पाइक्‍चा माल्‍नेवे। 24 मेको सुर ङा फलेक आइक्‍था नु उइ अर्को फलेक नु गारचा ङा दुम्‍चा माल्‍नीस। 25 नोले पटटी ङा फलेक नु सुर ङा फलेक नेल्‍ल पा ८ ओटा दुम्‍नीम। मेको फलेक नेल्‍ल आन कली १६ ओटा चांदी के राप्‍पाइक्‍तीके सेल्‍पाइक्‍चा माल्‍नेवे। फलेक का कली निक्‍शी माल्‍ब। फलेक नेल्‍ल मोदेंशो पा सेल्‍चा माल्‍नेवे।

26 मिनु का पटटी ङा फलेक आन कली बोल्‍यो शी के ५ ओटा लाइश्‍शो कोक्‍के, 27 अर्को पटटी कली यो ५ ओटा लाइश्‍शो कोक्‍के सेल्‍पाइक्‍चा माल्‍नेवे। मिनु पच्‍छिम गे नोले पटटी कली ५ ओटा लाइश्‍शो कोक्‍के सेल्‍पाइक्‍चा माल्‍नेवे। 28 मिनु फलेक ग्‍येत्‍थ आ दातेमी सुर का रे अर्को सुर सम्‍म लाइश्‍शो कोक्‍के बाक्‍चा माल्‍नीम। 29 मिनु गे मेको फलेकपुकी सुनम गिल्‍पाइक्‍चा माल्‍नेवे। मेको कोक्‍के शुइक्‍तीक मुन्‍द्रा सुन के सेल्‍पाइक्‍चा माल्‍नेवे। मेको लाइश्‍शो कोक्‍केपुकी यो सुनमी गिल्‍पाइक्‍चा माल्‍नेवे। 30 गो इ कली डांडामी कोंइशो खोदेंशो पा आं बाक्‍तीक ताम्‍बु सेल्‍पाइक्‍चा माल्‍नेवे। प्रस्‍थान २५:९

31 मिनु गे फारतीक सेल्‍चा कली नीलो प्‍याजी नु लल रङ ङा श्‍येले नु रिम्‍शो पा किरशो सुती श्‍येले के वा प्रोव़पाइक्‍चा माल्‍नेवे। मेको वा करूब बुटा आप्‍शा थाम्‍पा रिम्‍शो प्रोव़स जोक्‍ब मुर आन कली प्रोव़पाइक्‍चा माल्‍नेवे। २इतिहास ३:१४ 32 मेको फारतीके बोल्‍यो शी के सेल्‍शो सुनम गिल्‍शो सुन के हेक्‍तीक पाइश्‍शो नु चांदी के राप्‍पाइक्‍तीक पाइश्‍शो ४ ओटा थामम क्‍युक्‍पाइक्‍चा माल्‍नेवे। 33 मिनु मेको फारतीके हेक्‍तीकेम हेक्‍पाइक्‍चा माल्‍नेवे। मिनु गे मेको आं अरेशो लोव़ आगाम वोइश्‍शो सन्‍दोस मेको फारतीके आगा गे वोइक्‍पाइक्‍चा माल्‍नेवे। मोपा मेको फारतीके चोव़खो नु नेल्‍ल क्‍येङा चोव़खो बाक्‍तीक कली फारब दुम्‍ब। मत्ती २७:५१; हिब्रू ९:३; प्रस्‍थान २६:६,११ 34 मिनु गे मेको सुम्‍तीक अरेशो लोव़ आगाम वोइश्‍शो सन्‍दोस तारी वोइश्‍शा, मेको फारतीक आ आगा गे नेल्‍ल क्‍येङा चोव़खो बाक्‍तीकेमी वोइक्‍पाइक्‍चा माल्‍नेवे। प्रस्‍थान २५:२१ 35 कोंइतीक शोब्‍ले वोइक्‍तीक टेबल चोव़खो बाक्‍तीके उत्तर गे वोइक्‍पाइक्‍चा माल्‍नेवे। बत्ती दातीक चहिं दक्‍खिन गे वोइक्‍पाइक्‍चा माल्‍नेवे। प्रस्‍थान २५:२३-३०; प्रस्‍थान ४०:४२

36 मिनु ताम्‍बु ओव़तीक कली नीलो प्‍याजी नु लल रङ ङा श्‍येले नु रिम्‍शो पा किरशो सुती श्‍येले के प्रोव़शो वा, बुटा आप्‍शा ठेयब फारतीक सेल्‍पाइक्‍चा माल्‍नेवे। 37 मेको फारतीके हेक्‍चा कली ५ ओटा बोल्‍यो शी के थाम सेल्‍पाइक्‍चा माल्‍नेवे। मेको थाम सुनम गिल्‍पाइक्‍चा माल्‍नेवे। मेको थामम सुन के हेक्‍तीके यो सेल्‍पाइक्‍चा माल्‍नेवे। मेको थाम राप्‍पाइक्‍तीके ५ ओटा कांसा के सेल्‍पाइक्‍चा माल्‍नेवे।