48
इस्राएली आन कली रागी योक्शो
1 मिनु “मेको आन थर आन नें मार बाक्नीम देंशा हना, उत्तर गे ङा सांद हेथ्लोन ङा लां रे पा लेबो-हमाथ रे हासर-एनोन सम्म बाक्ब। हासर-एनान दमस्कस आ सांदम बाक्ब। मिनु हमाथ मेको आ उत्तर गे बाक्ब। मिनु मेको पूर्ब रे पच्छिम सम्म बाक्ब। मेको दान आ थेरशो रू दुम्ब। इजीकीएल ४७:१५-१७ 2 मिनु पूर्ब रे पच्छिम दान आ सांद थिशो रू आशेर आ थेरशो रू दुम्ब। 3 मिनु पूर्ब रे पच्छिम आशेर आ सांद थिशो रू नाप्ताली आ थेरशो रू दुम्ब। 4 मिनु पूर्ब रे पच्छिम नाप्ताली आ सांद थिशो रू मनस्से आ थेरशो रू दुम्ब। 5 मिनु पूर्ब रे पच्छिम मनस्से आ सांद थिशो रू एफ्राइम आ थेरशो रू दुम्ब। 6 मिनु पूर्ब रे पच्छिम एफ्राइम आ सांद थिशो रू रूबेन आ थेरशो रू दुम्ब। 7 मिनु पूर्ब रे पच्छिम रूबेन आ सांद थिशो रू यहूदा आ थेरशो रू दुम्ब।
8 मिनु पूर्ब रे पच्छिम गे यहूदा आ सांद सम्म थिशो भाग का तिल्चा माल्नीनी। मेको २५ हजार कुबीत ब्रेम्शो नु आ लाइश्शो पूर्ब रे पच्छिम सम्म थर थर आन कली गेशो थेरशो रू खोदेंशो लाइश्शो दुम्चा माल्ब। मिनु परमप्रभु यावे आ बाक्तीक मेको आ दातेम दुम्चा माल्ब। कुबीत का ०.५ मिटर बाक्ब। इजीकीएल ४५:१-८ 9 परमप्रभु यावे कली गेशो तिल्शो भाग चहिं २५ हजार कुबीत लाइश्शो नु २० हजार कुबीत ब्रेम्शो दुम्चा माल्ब। 10 मिनु मेको परमप्रभु यावे कली गेशो तिल्शो भाग चढ़ेब आन कली दुम्ब। मेको भाग उत्तर गे २५ हजार कुबीत लाइश्शो, पच्छिम गे १० हजार कुबीत ब्रेम्शो, पूर्ब गे १० हजार कुबीत ब्रेम्शो नु दक्खिन गे २५ हजार कुबीत लाइश्शो दुम्चा माल्ब। मिनु परमप्रभु यावे आ बाक्तीक मेको आ दातेम दुम्चा माल्ब। 11 मिनु मेको परमप्रभु यावे कली चढ़ेब आन भाग दुम्चा माल्ब। आं गेय पाइब सादोक आ चच युइ आन के दुम्ब। मेकोपुकी इस्राएली नु लेवीपुकी हेंथे गाक्तेक्म हना यो, मेकोपुकी हेंथे मगाक्थु, आं गेय पाम्तेक्म। इजीकीएल ४०:४६ 12 मिनु मेको आन कली परमप्रभु यावे कली तिल्शो रागी रे आन भाग दुम्ब। मेको आन नेल्ल क्येङा चोव़खो बाक्तीक भाग, लेवी आन थेरशो रू थिशो बाक्ब। 13 चढ़ेब आन थेरशो रू आ नेक्था लेवी आन थेरशो रू दुम्चा माल्ब। मेको २५ हजार कुबीत लाइश्शो नु २० हजार कुबीत ब्रेम्शो दुम्चा माल्ब। मेको आ लाइश्शो नेल्ल २५ हजार कुबीत नु आ ब्रेम्शो नेल्ल १० हजार कुबीत दुम्चा माल्ब। 14 मिनु मेकोपुकीमी मेको थेरशो रू लेयचा नु फाइक्चा मदुम्नीम। मेको रू नेल्ल क्येङा रिम्शो बाक्ब। मिनु मेको सुइ आन कली गेने मचाप्नीम। मारदे हना मेको परमप्रभु यावे आ रू बाक्ब।
15 मिनु मेको लीशो ५ हजार कुबीत ब्रेम्शो नु २५ हजार कुबीत लाइश्शो रू सहर कली बाक्ब। मेको मुर बाक्तीके नु सहर आ दाते ङा रू दुम्चा माल्ब। 16 मेको लीशो रू उत्तर गे ४ हजार ५ सहे कुबीत, दक्खिन गे ४ हजार ५ सहे कुबीत, पूर्ब गे ४ हजार ५ सहे कुबीत नु पच्छिम गे ४ हजार ५ सहे कुबीत दुम्चा माल्ब। प्रकाश २१:१६ 17 मिनु मेको सहर ङा रू दुम्चा माल्ब। मिनु मेको लीशो सहर ङा रू उत्तर गे सहे निक्शी ५० कुबीत, दक्खिन गे सहे निक्शी ५० कुबीत, पूर्ब गे सहे निक्शी ५० कुबीत नु पच्छिम गे सहे निक्शी ५० कुबीत दुम्चा माल्ब। 18 मेको परमप्रभु यावे आ बाक्तीक आ सांद थिशा लीशो रू पूर्ब गे १० हजार कुबीत नु पच्छिम गे १० हजार कुबीत दुम्चा माल्ब। मेको परमप्रभु यावे आ खिं आ का पटटी गे बाक्चा माल्ब। मेकेर सहरम गेय पाइब आन कली जचा थोव़क लेयतीक दुम्चा माल्ब। 19 सहरम गेय पाइब इस्राएल आ थर ङा मुर नेल्लेमी मेकेर बाक्शा, गेय पाइनीम। 20 गेपुकीमी तिल्शो बाक्तीक रू नेल्ल २५ हजार कुबीत ब्रेम्शो नु २५ हजार कुबीत लाइश्शो दुम्चा माल्ब। मेको ४ पाटे दुम्ब। मेको परमप्रभु आ भाग नु सहर ङा बाक्तीके बाक्ब।
21 मेको परमप्रभु यावे आ भाग नु सहर ङा का पटटी गे लीत हना, सासन पाइब के दुम्चा माल्ब। मेको पूर्ब गे परमप्रभु यावे कली तिल्शो २५ हजार कुबीत पूर्ब ङा सांद गे नु पच्छिम गे बाक्शो २५ हजार कुबीत पच्छिम ङा सांद गे बाक्ब। मेको आ लाइश्शो थर थर आन रू रू गे लाइब। मेको सासन पाइब के दुम्ब। मिनु परमप्रभु यावे आ खिं मेको आ दातेम बाक्ब। इजीकीएल ४५:७ 22 मिनु लेवी आन रू नु सहर ङा रू आन दातेमी मेको सासन पाइब आन रू बाक्ब। यहूदा नु बेन्यामीन आस दातेमी बाक्शो रू यो सासन पाइब आन के बाक्ब।
अरु थर आन थेरशो रू
23 मिनु लीशो थर आन कली पूर्ब रे पच्छिम सम्म बेन्यामीन आ थेरशो रू, 24 पूर्ब रे पच्छिम सम्म बेन्यामीन आ सांद थिशो सिमियोन आ थेरशो रू, 25 पूर्ब रे पच्छिम सम्म सिमियोन आ सांद थिशो इस्साकार आ थेरशो रू, 26 पूर्ब रे पच्छिम सम्म इस्साकार आ सांद थिशो जबूलून आ थेरशो रू, 27 पूर्ब रे पच्छिम सम्म जबूलून आ सांद थिशो गाद आ थेरशो रू, 28 मिनु दक्खिन गे गाद आ थेरशो रू ङा सांद तामार रे मेरीबाथ-कादेश ङा ब्वाक्कु बाक्तीक सम्म नु इजीप्त ङा खोल्सा आ नेक्था रे पा ठेयब समुन्द्र सम्म दुम्चा माल्ब। इजीकीएल ४७:१९ 29 गेपुकीम मेको रागी ङा रू इस्राएल आ थर ङा मुर आन कली आन थेरशो रू दुम्पाइश्शा योक्शा गेचा माल्नीनी। मिनु मेकोन मेको आन भाग दुम्ब” दे परमप्रभु, परमप्रभु यावेमी देंत।
यरूसलेम सहर ङा ठेयब लाप्चो
30 परमप्रभु यावेमी “सहर ङा गारो रे लाङगा ग्रूतीक ते दुम्चा माल्नीम देंशा हना, उत्तर गे ङा गारो पुक्शा ४ हजार ५ सहे कुबीत लाइश्शो दुम्चा माल्ब। कुबीत का ०.५ मिटर बाक्ब। 31 ठेयब लाप्चो आन नें इस्राएल आ थर आन नें खोदेंशो दुम्चा माल्नीम। उत्तर गे ङा गारो ङा ठेयब लाप्चो सां, रूबेन आ लाप्चो, यहूदा आ लाप्चो नु लेवी आ लाप्चो दुम्नीम। 32 मिनु पूर्ब गे ङा गारो ४ हजार ५ सहे कुबीत लाइश्शो दुम्चा माल्ब। पूर्ब गे ङा गारो ङा ठेयब लाप्चो सां, योसेफ आ लाप्चो, बेन्यामीन आ लाप्चो नु दान आ लाप्चो दुम्नीम। 33 मेको दक्खिन गे ङा गारो ४ हजार ५ सहे कुबीत लाइश्शो दुम्चा माल्ब। दक्खिन गे ङा गारो ङा ठेयब लाप्चो सां, सिमियोन आ लाप्चो, इस्साकार आ लाप्चो नु जबूलून आ लाप्चो दुम्नीम। 34 मेको पच्छिम गे ङा गारो ४ हजार ५ सहे कुबीत लाइश्शो दुम्चा माल्ब। पच्छिम गे ङा गारो ङा ठेयब लाप्चो सां, गाद आ लाप्चो, आशेर आ लाप्चो नु नाप्ताली आ लाप्चो दुम्नीम। 35 मिनु सहर आ एर ओंथ हिरशो गारो १८ हजार कुबीत दुम्ब। मेना रे मेको सहर आ नें ‘परमप्रभु यावे मेकेर बाक्ब’ देंशो नें वोइक्चा माल्ब” दे परमप्रभु यावेमी देंत। इजीकीएल ४३:७; यसैया ६०:१४; प्रकाश २१:३