हबकुक
ब्रेक्‍ब मुर: एको किताब हबकुकमी ब्रेक्‍शो बाक्‍ब। हबकुक आ अर्थ “मुप्‍ब मुर”, “शुश दाक्‍ब मुर” बाक्‍ब। मेको परमप्रभु यावे आ लोव़ पाइब बाक्‍त।
गेना ब्रेक्‍शो: कल्‍दी आन लडाइ पाइबपुकी ६०५ बि. सी.म निनवे ग्राशा, बारना बारन लशो बाक्‍तेक्‍म। हबकुक १:६ हबकुकम एको किताब यहूदा ङा पिप योसीयाह आ पाला ६३९-६०९ बि. सी.म नु यहूदा ङा पिप योयाकीम ६०९-५९८ बि. सी.म आस सासन पचा क्‍येङा ङोंइती ब्रेक्‍शो बाक्‍त। हबकुक येरमीया आ लोव़ पची ना यो बाक्‍शो बाक्‍त।
मारदे ब्रेक्‍शो: परमप्रभु यावेमी इस्राएली आन कली निसाफ पाइब। इस्राएली आन कली श्‍येत गेब सजाइ गेचा पुंइसीनीम। ठीक पाइब आन थमा सुइक्‍तीके ब्रोंइनीम।
1
मरिम्‍शो दुम्‍तीके आ पर्बम लोव़
एको परमप्रभु यावे आ लोव़ पाइब हबकुकमी परमप्रभु यावे रे पा नोले दुम्‍ब ततीक तशो बाक्‍ब। मिनु हबकुकमी “परमप्रभु यावे, गो गेना सम्‍म इन कली ‘वारच पन’ दे पुंइनुङा? गे काइ मनेंनीनी? ‘हुश ख्राक्‍श पोक्‍नीम’ दे थोइनुङ। तन्‍न गे काइ मप्रोंइनीनी। गे मारदे आं कली मरिम्‍शो पशो तपाइक्‍नीनी? गे मारदे आं कली श्‍येत जशो तपाइक्‍नीनी? खतम सेल्‍तीके नु जिचा पोक्‍तीक आं ङोंइती बाक्‍नीस। तेइ तेइ राम्‍शी पचा नु जिचा ला पोक्‍नीम। मिनु इन अरेशो मपाइनीम। ठीक पाइबपुकीमी ग्राने मचाप्‍नीम। इन अरेशो मटीबपुकीमी ठीक पाइब आन कली पुम्‍नीम। मिनु निसाफ पतीके दूली दुम्‍ब” देंती।
कल्‍दी आन पर्बम लोव़ पशो
मिनु परमप्रभुमी आं कली “रागी रागी ङा मुर आन कली कोव़ङो। मेको आन कली कोव़शा, गे छक लाक्‍नेवे। मारदे हना इन ब्रोंइतीक नाक्‍तीमी गेय का पशो बाक्‍ब। मेको इ कली देंतेक्‍म हना यो, गे मेको थमा मसुइक्‍नेवे। प्रेरित १३:४१ गो कल्‍दी ङा मुर आन कली पोक्‍‍नुङमी। मेको हिंचा ङा नु शिशी मपाइक्ब बाक्‍नीम। मेकोपुकीमी रागी नेल्‍ल कली ग्राशा, मुर आन खिं नु बाक्‍तीके रोइक्‍नीम। मेकोपुकी श्‍येत गेब नु शुश हिंचा ङा बाक्‍नीम। मिनु ‘मार ठीक निसाफ पतीके बाक्‍बा? सु मान ताइब बाक्‍बा’ दे आंमान दें‍नीम। मेको आन शारा जोइ आन क्‍येङा रीब पा दोरब बाक्‍नीम। मिनु नाक्‍दो ग्रूब फर खोदेंशो पा साइक्‍ब बाक्‍नीम। मेको आन शारा बारनीम। मेको आन शारा ङोइक्‍ब ङोन रागी रे जाक्‍नीम। ककाकुली खोदेंशो पा बेरशा, रीब पा सिखार ग्‍याइक्‍नीम। सेफन्‍याह ३:३ मेकोपुकी ङोंइती बारशा, हुश ख्राक्‍श पोक्‍‍चा कली जाक्‍नीम। मिनु मुर आन कली बाल्‍वा खोदेंशो हिक्‍ने मचाप्‍चा ङा पा शुश ग्‍याइश्‍शा, खुप्‍नीम। 10 मिनु पिप आन पर्बम शुक्‍शी पाइनीम। हुकुम पाइब आन पर्बम तोक्‍शो लोव़ पा रित्‍नीम। मेकोपुकीमी बोल्‍यो दरवार आन पर्बम ‘गो ग्रानय’ दे खप तेल्‍शा ङोइश्‍शा लशा, आंम के सेल्‍नीम। 11 मेको फश खोदेंशो पा गाक्‍नीम। मिनु पाप पा दोस ताइब दुम्‍‍नीम। मेकोपुकीमी आंम सक्ति कली ला थमा सुइक्‍नीम” देंत।
हबकुकम परमप्रभु कली पुंइशो
12 मिनु हबकुकमी “परमप्रभु यावे, आं परमप्रभु, गे का ला आं परमप्रभु बाक्‍नीनी। गो मबेक्‍नीकी। परमप्रभु यावे, गे मेको आन कली निसाफ पचा कली योव़तीनी। गे, आं सेरथे फुल्‍लु, गे मेको आन कली सजाइ गेचा कली वोइक्‍तीनी। येरमीया १०:२४ 13 गे मरिम्‍शो पशो काइ तने मचाप्‍नीनी। मरिम्‍शो पशो फाल्‍ने मचाप्‍नीनी। मोदेंशो बाक्‍त हना यो, थम मरिम्‍शो पाइब आन कली तशा, मारदे मारेइ मदेंनीनी? इन अरेशो मटीबपुकीमी आंम क्‍येङा ठीक पाइब मुर आन कली सद‍मेनु, गे मारदे सिक्‍सी पा बाक्‍नीनी? 14 गे मुर आन कली समुन्‍द्र ङा ङांइ खोदेंशो सेल्‍तीनी। सासन पाइब मबाक्‍शो ग्रेशा गाक्‍ब आइक्‍च जन्‍तु खोदेंशो सेल्‍तीनी।
15 मिनु आन जोरी सत्रुमी नेल्‍ल आन कली बोल्‍सीमी खोदेंशो पा रेत्‍नीम। मेको आन कली ग्‍याइलीम पिक्‍शा, ग्रुंइनीम। आन ग्‍याइक्‍तीकेमी खुप्‍नीम। मिनु ङांइ रेश्‍शो खोदेंशो पा ग्‍येरशो बाक्‍नीम। 16 मोपतीके मेकोपुकीमी आन ग्‍याइल कली क्‍योरशा चढ़ेनीम। आन ग्‍याइक्‍तीके कली चोशा चढ़ेनीम। मारदे हना मेको ग्‍याइल नु ग्‍याइक्‍तीके रे पा शुश तशा, ब्रोव़शो जाइनीम। 17 मार, मेकोपुकीमी आन ग्‍याइलीम रेन्‍ना रेन्‍न, रागी रागी ङा मुर आन कली शिशी मपथु, खतम सेल्‍ना सेल्‍न बाक्‍चा गेनीनी?” दे हबकुकमी परमप्रभु कली देंत।