7
1 “गो इस्राएल ङा मुर आन कली सापाइक्चा मिम्ताक्ङ हना, एफ्राइम आ मरिम्शो पशो नु सामरीया आ पाप तांइसीब। मेकोपुकी जोल पना पन बाक्नीम। खुइपुकी खिं ओव़शा खुइ पाइनीम। रोइक्बपुकीम लांमी मुर आन कली रोइक्नीम। योएल ४:१ 2 गो मेको आन मरिम्शो पशो नेल्ल तुइश्शा मिम्नुङ। मेकोपुकीम मतुइक्नीम। मेकोपुकीमी मरिम्शो ला पाइनीम। मिनु मेको आन पाप गेना हना यो आं ङोंइती बाक्नीम” देंत।
नक पिप साइश्शो
3 परमप्रभुमी “मेको आन मरिम्शो पशोमी पिप कली ग्येरपाइक्नीम। मिनु आन जोल पतीकेमी सासन पाइब आन कली ग्येरपाइक्नीम। 4 मेको नेल्ल तेल्लेम बाक्नीम। मेकोपुकी शोब्ले चोचा कली होइश्शो चुप्लु खोदेंशो बाक्नीम। मेको शोब्ले चोइबमी फस निवा रे मबोरम सम्म मी थुक्चा ममाल्ब। 5 आंइ पिप आ भोजम आ सासन पाइब अङगुर शांबु तूशा दुक्नीम। मिनु पिपमी शुक्शी पाइबपुकी नु गुइ गारपाइक्ब। 6 मेको शुक्शी पाइब आन थुं मी खोदेंशो पा ब्रशो बाक्ब। मेकोपुकी नमो सिमो पा पिप आ नेक्था जाक्नीम। मेको आन थुंम बाक्शो पतीक नेल्ल नाक्दो मी पुम्शो खोदेंशो पा बाक्ब। मिनु मेको सुनी ठेयब मी खोदेंशो पा ब्राइब। 7 मेको नेल्ले मी खोदेंशो पा ब्रशो बाक्नीम। मिनु आन सासन पाइब आन कली साइक्नीम। मेको आन पिप नेल्ल आन कली साइक्तेक्म। मिनु मेकेर ङा सुइमी यो आं कली मथोइनीम” देंत।
इजीप्त कली ब्रेश्शो
8 “एफ्राइम थर ङा मुरपुकी रागी ङा मुर नु ब्वांइसीनीम। एफ्राइम मलोक्शो शोब्ले खोदेंशो बाक्ब। 9 अर्को रागी ङा मुरपुकीमी मेको आ बोल नुप्पाइक्नीम। तन्न मेकोमी मतुइक्ब। मेको आ चां का निक्शी बोइश्शो बाक्ब। तन्न मेकोमी मतुइक्ब। 10 इस्राएल आ ठेयब लेत्तीकेमी ‘मरिम्शो पाइब बाक्ब’ दे आन सांकछी बाक्ब। तन्न मेकोपुकी परमप्रभु यावे, आन परमप्रभु गे मलेत्नीम। मिनु मेको कली ममाल्नीम” देंत।
11 “एफ्राइम निप्स मपाइश्शो ढुकुर खोदेंशो बाक्ब। मेको कली निप्स मपाइश्शो आन कली खोदेंशो पा जोल पने चाम्सीब। मुल मेकोपुकीमी इजीप्त रागी कली ‘वारच पने’ दे ब्रेत्नीम। इच्का नोले मेकोपुकीमी अस्सुर रागी कली ब्रेत्नीम। होसे ५:१३ 12 मिनु मेकोपुकी लची ना, गो मेको आन तारी आं ग्याइल ब्वारनुङ। गो मेको आन कली सरीङ ङा चिक्ब आन कली खोदेंशो पा उइ तोक्नुङमी। गो मेको आन मरिम्शो पतीके कली सजाइ गेनुङ। 13 आबी आबी, मेकोपुकी गो रे पा ङोन लाम्तेक्म। मेकोपुकी खतम दुम्मल। मारदे हना मेकोपुकी आं कली मटीब दुम्शो बाक्नीम। गो मेको आन कली श्येत रे प्रोंइचा दाक्नुङ। तन्न मेकोपुकीमी आं पर्बम जोल पाइनीम। भजन संग्रह ८१:१४-१५
14 मेकोपुकीमी आन थुं नेल्लेमी आं कली मब्रेत्नीम। तन्न आन ब्राख्येमी रोंका पाइनीम। अन्न नु नक अङगुर शांबु आ पर्बम बुक्नीम। तन्न आं रे पा आन कुल हिरनीम। 15 गो मेको आन कली शेंशा, बोल्यो सेल्ता। तन्न मेकोपुकीमी आं कली मरिम्शो पचा मिम्नीम। 16 मेको नेल्ल क्येङा ठेयब गे मलेत्नीम। मेकोपुकी जिक्शो लिब्रा खोदेंशो बाक्नीम। मेको आन ठेयब मुर आन मरिम्शो पशो लोव़ आ पर्बम तरवारमी साइक्चा पुंइसीनीम। इजीप्त रागीमी मेको आन पर्बम शुक्शी पाइनीम” देंत। भजन संग्रह ७८:५७