1 इन दातेमी जिचा खे‍चा ते रे जाक्‍बा? गे इन दला दाक्‍स आ पर्बम जीनीनी, ममाइ? 2 गेपुकी मारेइ मारेइ माल्‍नीनी, तन्‍न मताइनीनी। मोपतीके मुर आन थुं जिक्‍शा, साइक्‍नीनी। मिनु अरु आन के मार मार तशा वाल्‍नीनी, तन्‍न मताइनीनी। मोपतीके जीनीनी। गेपुकी परमप्रभु यावे कली मपुंइनीनी। मोपतीके मताइनीनी। गलाती ५:१५ 3 गेपुकीमी पुंइतीनी हना यो, मारेइ मताइनीनी। मारदे हना आंम दला दाक्‍स पचा कली ला पुंइनीनी। मोपतीके इन पुंइशो मताइनीनी। 4 गे परमप्रभु यावे आ लां प्रोंइशा हेंथे गाक्‍बपुकी, गे थमा मसुइक्‍ब आन वारच बाक्‍तीनी हना, परमप्रभु यावे आ जोरी सत्रु दुम्‍नीनी। सु थमा मसुइक्‍ब आन वारच दुम्‍चा माल्‍बा, मेको परमप्रभु यावे नु जोरी सत्रु दुम्‍ब। लूका ६:२६; रोमी ८:७; १यूहन्‍ना २:१५

5 परमप्रभु यावेमी ब्रेक्‍पाइश्‍शो लोव़मी “परमप्रभु यावेमी आ सोक्‍त इं रांमी वोइक्‍तु। तन्‍न मुरुमी दला दाक्‍स पशो तशा, मेकोमी शुश रुश पाइब” दे यो ब्रेक्‍पाइश्‍शो बाक्‍ब। 6 तन्‍न परमप्रभु यावेमी मेको क्‍येङा शुश शिशी पाइब। मिनु “गो ठेयब लेश्‍शो मुर आन कली शिशी मपाइनुङ। ब्रेम्‍शो, ठेयब मलेश्‍शो मुर आन कली ला शिशी पाइनुङ” दे ब्रेक्‍पाइश्‍शो बाक्‍ब। अय्‍युब २२:२९; हितोपदेस ३:३४; मत्ती २३:१२; १पत्रुस ५:५

7 गेपुकी परमप्रभु यावेमी देंशो लोव़ टिने। सैतान रे ङोन बाक्‍कीन। मो पाइतीनी हना, सैतानमी इन कली प्रोंइब। मत्ती २३:१२; १पत्रुस ५:८-९ 8 परमप्रभु यावे आ नेक्‍था लने। मो पाइतीनी हना, मेको इन नेक्‍था जाक्‍ब। गे पापीपुकी “आंइ पाप क्‍याम्‍दीने” देंशा, माफ पुनीने। थुं निक्‍शी पाइश्‍शो मुरपुकी, इन थुं परमप्रभु यावे गे लेश्‍शा, थुं का दुमीने। जकरिया १:३; यसैया १:१६ 9 मिनु सुर्ता पने। रोंका पा ङाक्‍कीने। इन रित्‍चा आ पा ङा रोंका पने। इन ग्‍येरचा आ पा ङा सुर्ता पने। 10 प्रभु येसु आ ङोंइती आइक्‍च दुम्‍शा, ब्रेम्‍शो दुमीन। मिनु परमप्रभु यावेमी इन कली ठेयब सेल्‍ब।

11 आं लोक्‍बपुकी, शुक्‍शी लोव़ मपमुने। सुम लोक्‍ब आ पर्बम शुक्‍शी लोव़ पाइबा, दोस गेबा, मेकोमी परमप्रभु यावे आ अरेशो लोव़ मटीब। मेकोमी परमप्रभु यावे आ अरेशो लोव़ क्‍येङा “गो जोक्‍ब तुइक्‍ब नङ” दे मिम्‍शा, निसाफ पाइब खोदेंशो दुम्‍ब। “परमप्रभु यावे आ अरेशो लोव़ रिम्‍शो देय मरिम्‍शो” दे लोव़ पाइब यो दुम्‍ब। मोपा गे परमप्रभु यावे आ अरेशो लोव़ मपाइब दुम्‍शा, निसाफ पाइब दुम्‍तीनी। 12 परमप्रभु यावे अरेशो लोव़ गेब नु निसाफ पाइब बाक्‍ब। परमप्रभु यावेमी ला पाप रे प्रोंइने नु नरकम सोइक्‍ने चाप्‍ब। इन नेक्‍था बाक्‍ब आन कली मोपा नाक्‍ब, सु ननी ङा? मत्ती ७:१; रोमी १४:४ 13 गेपुकीमी मार लोव़ पाइनीनी देंशा हना “दीसा नित्‍थी सहरम लशा, बर्स का सम्‍म बाक्‍य। मिनु शुश क्‍येट चेम्‍य” दे मिम्‍शा लोव़ पाइनीनी। हितोपदेस २७:१ 14 दीसा नित्‍थी मार दुम्‍बा, ब्रोंइनीनी कों, बेक्‍नीनी कों मारेइ मतुइक्‍नीनी। इन गिंम मार में? मेको गोस्‍स खोदेंशो बाक्‍ब, इच्‍का का ला लीशा, जाम्‍ब। लूका १२:२० 15 गे मार देंचा माल्‍शो ननी देंशा हना “गोपुकी ब्रोंइतय हना, प्रभुम आंइ मिम्‍शो दाक्‍ताक्‍व हना, गो आंइ मिम्‍शो गेय पाइनय” दे लोव़ पचा माल्‍नीनी। प्रेरित १८:२१; १कोरिन्‍थी ४:१९ 16 गेपुकी चहिं ठेयब लेश्‍शा, आंम थुं ङा लोव़ पाइतीनी। मोदेंशो ठेयब लेश्‍शा बाक्‍चा मरिम्‍शो दुम्‍ब। 17 सु रिम्‍शो गेय पस जोक्‍बा तुइक्‍बा, तन्‍न मपाइबा, मेको कली मरिम्‍शो दुम्‍ब। लूका १२:४७