3
मुर आन कली निसाफ पशो
1 परमप्रभु यावेमी “मेको नाक्ती गो यहूदा नु यरूसलेम आस रिम्शो दुम्तीक नाक्ती लेश्शा चाक्नुङ। होसे ७:१ 2 मिनु गो रागी रागी ङा मुर नेल्ल आन कली खुप्शा, येहो-शाफात आ दिंममी चाक्नुङमी। मिनु मेकेर मेको आन कली निसाफ पाइनुङ। मारदे हना मेकोपुकीमी आं मुर आन कली रागी रागी ङा मुर आन दातेमी ब्रपाइक्तेक्म। मिनु आं रागी भाग भाग सेल्तेक्म। 3 मेकोपुकीमी आं मुर आन पर्बम फेन्टे ग्यारतेक्म। मिनु वोंइश आल लेयशा, तेल्लेम नु लाम्तेक्म। मीश आल आन कली लेयशा, अङगुर शांबु तूतेक्म।
4 टायर, सीदोन नु पलिस्ती आन रागी ङा मुरपुकी आं कली मार पाइनीनी ङा? मार, आं पशो आ पर्बम आं कली क्येक्क लेत्नीनी? गेपुकीमी आं कली क्येक्क लेत्ताक्नी हना, गो मेको रीब पा इन पिया तार मोइक्नुङ। 5 मारदे हना गे आं सुन, चांदी नु थम रिम्शो थोव़क नेल्ल इन दरवारम लाइक्तीनी। 6 मिनु गे यहूदा नु यरूसलेम ङा मुर आन कली मेको आन रागी रे लाइश्शा, ग्रीस ङा मुर आन कली लेयतीनी। 7 मुल गो मेको आन कली लेयशो रागी रे ग्रुंइशा, चाक्नुङमी। मिनु गो इन श्येत गेशो लेंशा इन पिया तार मोइक्नुङ। 8 मुल गो इन तमी तौ आन कली यहूदा ङा मुर आन कली लेयनुङमी। मिनु मेकोपुकीमी मेको आन कली ङोन साबा रागी ङा मुर आन कली लेयनीम” दे परमप्रभु यावेमी देंशो बाक्ब।
9 मिनु परमप्रभुमी “एको लोव़ रागी रागी ङा मुर आन दातेम नेंपतीन। लडाइ पचा कली ठीक दुमीन। लडाइ पाइब आन कली ब्रेत्तीन। बुक्तीक आ नेक्था जाक्चा माल्नीम। 10 गे इन फाली शोल्शा, तुप्शा तरवार सेलीन। मिनु इन गुये तुप्शा, तूतीक भाला सेलीन। मिनु गे हिंब मुरपुकीमी ‘गो बोल्यो लडाइ पाइब नकी’ देनीन। यसैया २:४
11 एर ओंथ बाक्शो रागी रागी ङा मुर नेल्ल रीब पा जाक्कीन। गे नेल्ल मेकेर खुम्सीन। परमप्रभु यावे, इन बोल्यो लडाइ पाइब आन कली उइ यितीन। 12 मिनु रागी रागी ङा मुर नेल्ल जोंब बोक्शा, खुम्सीशा येहो-शाफात आ दिंममी लमल। मारदे हना गो एर ओंथ ङा रागी ङा मुर नेल्ल आन कली निसाफ पाइनुङ।
13 मिनु इन गुयेमी रिक्चा ठीक दुमीन। मारदे हना बाली नाली खुप्ची जाक्शो बाक्ब। मिनु ओव़शा अङगुर ख्राक्कीन। मारदे हना कोल ब्रीशो बाक्त। गर ब्रीशा क्युप्शो बाक्नीम। मेको खोदेंशो पा आन मरिम्शो पशो शुश दुम्त। प्रकाश १४:१५; यसैया ६३:३,६; प्रकाश १४:१८
14 मिनु निसाफ पतीक दिंममी शुश मुर जाक्स ङा जाक्स बाक्नीम। मारदे हना मेको दिंममी परमप्रभु यावे आ निसाफ पतीक नाक्ती जाक्चा चिक्शो बाक्ब। 15 नां नु तास्ला छिङछिङ दुम्नीस। मिनु सोरुलपुकीमी आन छेङछेङ मकोंइनीम” देंत। योएल २:१०; योएल ३:४
16 परमप्रभु यावेम सियोन रे ठेयब सेंदा पा लोव़ पाइब। यरूसलेम रे पा आ सेंदा नेंपाइक्ब। सरीङ नु रागी ख्रिंख्रि पाइनीस। तन्न परमप्रभु यावे आ मुर आन कली ख्रुइश्शा बाक्तीक नु इस्राएल ङा मुर आन कली बोल्यो ब्रोंइशा बाक्तीक दरवार दुम्ब। आमोस १:२
परमप्रभु सियोनम बाक्ब
17 “गो, परमप्रभु यावे, इन परमप्रभु आं डांडा सियोनम बाक्नुङ, दे गे तुइक्नीनी। मिनु यरूसलेम आं के दुम्ब। मिनु रागी रागी ङा मुर मेको सहर ङा लां रे पा मलाक्नीम। इजीकीएल ३४:३०
18 मेको नाक्ती डांडाम शुश अङगुर सित्नीम। मिनु पहाडम दूध शुश बाक्ब। यहूदा ङा खोला नेल्लेमी ब्वाक्कु शाइक्नीम। मिनु परमप्रभु यावे आ खिं रे पा ब्वाक्कु बुक्तीके शित्तीम ङा दिंम जिप्पाइक्ब। आमोस ९:१३; इजीकीएल ४७:१
19 मिनु यहूदा ङा दोस मताइब मुर आन कली मरिम्शो पतीके नु हुश ख्राक्श पोक्तीके इजीप्त रागी मुर मबाक्तीके दुम्ब। मिनु एदोम चहिं कोक्त रागी दुम्ब। 20 तन्न यहूदा रागीम गेना हना यो मुर बाक्नीम। मिनु यरूसलेम नेल्ल पाला ङा मुर आन कली दुम्ब। ओबदिया १०:- 21 गो मेको आन हुश ख्राक्श पोक्शो क्येक्क लेत्नुङमी। मिनु आन पाप मक्याम्नुङ” दे परमप्रभुमी देंत। परमप्रभु यावे सियोनम बाक्ब। ब्यवस्था ३२:४३; इजीकीएल ४८:३५