1 मिनु नोले परमप्रभु यावेमी यहोसु कली 2 “गेम इस्राएली आन कली ‘प्रोक्‍शा बाक्‍तीक सहरपुकी वोइक्‍चा माल्‍नीनी’ दे देंचा माल्‍नेवे। गो मोसा रे पा इ कली देंशो खोदेंशो पा पावो। गन्‍ती ३५:९-२९ 3 मजोक्‍थु, मतुइक्‍थु सुइमी सुइ कली साइक्‍तु हना, मेको साइक्‍ब मुर प्रोक्‍शा, मेको सहर लल। मेको सहर क्‍येक्‍क लेप्‍ब रे पा ब्रोंइतीक सहर दुम्‍ब।

4 मिनु मेको मोदेंशो सहरमी मुर साइक्‍ब मुर प्रोक्‍त हना, मेको सहर ङा ठेयब लाप्‍चोमी राप्‍शा बाक्‍चा माल्‍ब। मिनु सहर ङा ठेयब मुर आन ङोंइती आं लोव़ नेंपदल। मिनु नोले मेकोपुकीमी मेको मुर कली सहर ओव़चा नु बाक्‍तीक खिं गेचा माल्‍नीम। मिनु मेको मुर मेकोपुकी नु बाक्‍चा माल्‍ब। 5 मिनु क्‍येक्‍क लेप्‍ब मुरुमी मेको मुर साइक्‍ब कली खेदा पाप्‍तु हना, मेको सहर ङा मुरुमी मेको मुर साइक्‍ब मुर कली जिम्‍मा गेचा मदुम्‍ब। मारदे हना मेकोमी मजोक्‍थु मतुइक्‍थु साइक्‍तु। 6 मिनु निसाफ दुम नोले नु मेकेर ङा नेल्‍ल क्‍येङा ठेयब चढ़ेब मबेक्‍म सम्‍म मेको मुर मेको सहरमीन बाक्‍चा माल्‍ब। नोले मेको मुर आंम सहर आंम खिंमी, ते रे प्रोक्‍शा जाक्‍मे, मेकेन लेन्‍ने चाप्‍ब।

7 मिनु मेकोपुकीमी नाप्‍ताली आ पहाड रागी गालील ङा केदेश सहर वोइक्‍तेक्‍म। एफ्राइम पहाड रागी ङा शेकेम नु यहूदा आ पहाड रागी ङा किरयथ-अरबा सहर वोइक्‍तेक्‍म। मेको कली हेब्रोन यो देंनीम। ग्रीक लोव़म गिल्‍गाल कली गालील देंब।यहोसु १९:३७; यहोसु १५:१३ 8 यर्दन नु यरीको आ पूर्ब गे रूबेन आ थर आन गोरशो रागीमी बाक्‍शो दिंम ङा बेसेर सहर वोइक्‍तेक्‍म। गाद आ थर ङा गिलाद रागीमी रामोथ सहर वोइक्‍तेक्‍म। मनस्‍से थर आन बाशानमी गोलान सहर वोइक्‍तेक्‍म। मेकोपुकी मोपा मुर बाक्‍तीक सेल्‍तेक्‍म। ब्‍यवस्‍था ४:४१-४३ 9 सुइ इस्राएली नु मेको आन दातेमी बाक्‍शो अर्को रागी ङा मुरुमी मतुइक्‍थु मुर साइक्‍तु हना, मेको मोदेंशो वोइश्‍शो सहरमी प्रोक्‍ने चाप्‍ब। निसाफ दुम्‍चा क्‍येङा ङोंइती क्‍येक्‍क लेप्‍ब मुर आन गुइ रे मेको मुर साइक्‍चा मपुंइसेक्‍ल” देंत।