1 मिनु काबु शेंसीबपुकीमी येसु कली “स्‍वर्ग ङा राज्‍यमी नेल्‍ल क्‍येङा ठेयब सु बाक्‍बा?” दे हिल्‍लो पाम्‍तेक्‍म। 2 मिनु येसुमी आल का कली ब्रेश्‍शा, आन दातेमी राप्‍पाइश्‍शा 3 “नोफा दाइश्‍शा नेनीने, गेपुकीमी दोपा ठेयब दुम्‍चा, दे मिम्‍चा प्रोंइशा, आल खोदेंशो मदुम्‍तीनी हना, स्‍वर्ग ङा राज्‍य दोपा यो ओव़चा मताइनीनी। मत्ती १९:१४ 4 एको आल खोदेंशो ब्रेम्‍शोपुकी स्‍वर्ग ङा राज्‍यमी नेल्‍ल क्‍येङा ठेयब बाक्‍नीम। 5 सुमी आं नेंम ओदेंशो आल कली ब्राइबा, मेकोमी आं कली ब्राइब। मत्ती १०:४०

6 सुमी आं कली थमा सुइक्‍ब आल कली पाप पपाइक्‍बा, मेको आ शुरम यात क्‍युक्‍शा, समुन्‍द्रमी ख्रुम्‍शा साइक्‍चा अरु सजाइ क्‍येङा रिम्‍शो बाक्‍‍ब। लूका १७:१-२ 7 पाप पपाइक्‍ब आन पर्बम, आबी आबी। एको रागीमी पाप पपाइक्‍ब शुश जाक्‍‍नीम। तन्‍न सुमी अरु आन कली पाप पपाइक्‍बा, मेको आन कली आबी आबी। 8 इ गुइ खोइलीमी इ कली पाप पपाइक्‍तु हना, ख्रोइश्‍शा ताइक्‍तो। मारदे हना गुइ खोइल निम्‍फा बाक्‍शा, नरकम ख्रुम्‍चा पुंइसीचा क्‍येङा डुंडे खोरन्‍डे दुम्‍शा, स्‍वर्ग ङा राज्‍यम ओव़चा तचा रिम्‍शो दुम्‍ब। मत्ती ५:२९-३० 9 इ मिक्‍चीमी इ कली पाप पपाइक्‍तु हना, मिक्‍च फेश्‍शा ताइक्‍तो। मारदे हना मिक्‍च निम्‍फा पाइश्‍शा, नरकम ख्रुम्‍चा पुंइसीचा क्‍येङा काना दुम्‍शा, स्‍वर्ग ङा राज्‍यमी ओव़चा तचा रिम्‍शो दुम्‍ब।

10 होस पांइसीने, आल आन कली आइक्‍च मसेलीने। नोफा दाइश्‍शा नेनीने, आल आन कली कोव़ब परमप्रभु यावे आ स्‍वर्ग ङा गेय पाइबपुकी स्‍वर्गम बाक्‍ब आं आफ आ ङोंइती बाक्‍नीम। 11 रागीम जरमेशो जाम्‍शो आन कली माल्‍थ जाक्‍शो बाक्‍ब। हिब्रू १:१४ 12 मुर का के सहे का भेडामी का जाम्‍त हना, मेकोमी ९९ भेडा आन कली प्रोंइशा वोइश्‍शा, जाम्‍शो का कली मथिदा सम्‍म माल्‍ना माल्‍न मगाक्‍बा ङा? 13 नोफा दाइश्‍शा नेनीने, थिदानु, मजाम्‍शो ९९ भेडा क्‍येङा मेको थिशो का आ पर्बम शुश ग्‍येरसीब। 14 मेको बुदी स्‍वर्ग ङा इन आफोमी आइक्‍च का यो मजाम्‍मल, दे मिम्‍ब।

15 इ लोक्‍बमी इ कली मरिम्‍शो पाप्‍तु हना, गे निक्‍शी बाक्‍सीनु, एको ओदेंशो मरिम्‍शो पाप्‍तीवी, दे तुइक्‍पतो। इ लोव़ बीसाक्‍व हना, मेको कली आम के सेल्‍नेवे। लेवी १९:१७; लूका १७:३; गलाती ६:१ 16 इ लोव़ मबिस्‍साक्‍व हना चहिं, मुर निक्‍शी सां दुम्‍शा लशा, सांकछी वोइश्‍शा लोव़ पावो। ब्‍यवस्‍था १९:१५ 17 मेको आन लोव़ यो मबिस्‍साक्‍व हना, मुर पुक्‍शा लोव़ पावो। मिनु मेको आन लोव़ यो मबिस्‍साक्‍व हना, अर्को रागी ङा मुर खोदेंशो बाक्‍माक्‍त, दे तिल्‍शा सोइक्‍तो। १कोरिन्‍थी ५:१३; २ थिस्‍सलोनिकी ३:६; तीतस ३:१० 18 नोफा दाइश्‍शा नेनीने, रागीमी मार पाइश्‍शा वोइक्‍नीनी, मेको स्‍वर्गम यो पाइश्‍शो बाक्‍ब। रागीमी मार प्रोंइनीनी, मेको स्‍वर्गम यो प्रोंइशो बाक्‍ब। मत्ती १६:१९; यूहन्‍ना २०:२३ 19 मिनु रागीमी मुर निक्‍शी गारशा, थुं का पा मारेइ पुंइताक्‍स हना, स्‍वर्गमी बाक्‍ब आं आफ रे पा आस पुंइशो ताइनीस, दे इन कली देंनुङ। मर्कूस ११:२४; मत्ती २८:२० 20 मारदे हना तेकेर आं नेंमी निक्‍शी सां खुम्‍सीनीमी, मेकेर गो यो बाक्‍नुङ” दे येसुमी देंत।

21 मिनु पत्रुसमी “प्रभु, आं लोक्‍बमी आं कली मरिम्‍शो पना पन बाक्‍त हना, गिश खेयप सम्‍म माफ गेचा माल्‍नुङा? मार ७ खेयप सम्‍म गेचा माल्‍नुङा?” देंमेनु, 22 येसुमी “गो माइक्‍नन, ७ खेयप ला ममाइ। ७ कली ७० खेयप हिक्‍शो क्‍येङा यो शुश माफ गेचा माल्‍नेवे। उत्‍पत्ती ४:२४; लूका १७:४; एफिसी ४:३२

23 मोपतीके स्‍वर्ग ङा राज्‍य ओदेंशो बाक्‍ब, पिप कामी आं जेर लाइब आन के हिसाब ताक्‍चा, दे मिम्‍ता बाक्‍त। 24 मिनु हिसाब ताक्‍गानु, मुर कामी १० हजार टलेन्‍ट शुश जेर थुइश्‍शो बाक्‍माक्‍त। टालेन्ट का ६ हजार द्राक्‍मे कि ३४ किलो खोदेंशो बाक्‍त। 25 मिनु मेको जेर थाम्‍ने मचबानु, पिपीमी ‘गे, गे नु बाक्‍शो थोव़की, इ खिं रू, इ मीश तमी तौ, लेयशा, जेर थाप्‍ती’ दे मदा बाक्‍त। नेहेम्‍याह ५:५ 26 मो देंमेनु ‘हे पिप, गो इच्‍चीन थाम्‍ने मचाप्‍नुङ। दीसा नित्‍थी दोपा हना यो थाप्‍नुङ’ दे खुम्‍की पा बाप्‍शा सेउ पवा बाक्‍त। 27 मिनु पिपमी शिशी पा ‘इ लाइश्‍शो जेर मुलाक्‍त ङा मेरे थाप्‍चा ममाल्‍नेवे। एको हिसाब नेल्‍ल क्‍याम्‍शा गेनन’ दे आ जेर नेल्‍ल क्‍याम्‍दा बाक्‍त। 28 मेको जेर क्‍याम्‍चा पुंइसीब मेकेर रे लशा, आ वारच का कली ग्रुमा बाक्‍त। मेको आ वारचमी मेको के सहे का देनार जेर लाइश्‍शो बाक्‍माक्‍त। मिनु ग्रुम्‍सानु, ग्‍याइश्‍शा आ क्रोक्‍क्रो निप्‍शा ‘साइ लाइश्‍शो क्‍येट मुलन थाप्‍ती’ दे मप्रोना बाक्‍त। देनार का रोमी आन चांदी के क्‍येट बाक्‍त। ग्रीक लोव़मी द्राक्‍मे देंशो बाक्‍त। 29 मिनु मेकोमी ‘ए वारच, मुल मचाप्‍नुङ, दीसा नित्‍थी दोपा हना यो, थाप्‍नुङ’ दे खुम्‍की पा बाप्‍शा सेउ पवानु 30 ‘मुलाक्‍त मथाप्‍ताक्‍यी हना, इ कली प्रोंइसीन मप्रोंइनन’ दे लाइश्‍शा, जेर नेल्‍ल थाम्‍ने मथुमा सम्‍म जेल्‍खानम चोक्‍पा वोदा बाक्‍त। 31 मोपा चोक्‍पाइश्‍शो तशा, आ वारचपुकीमी आन थुं खाइश्‍शा, पिप कली मेको लोव़ नेल्‍ल तुइक्‍पदमे बाक्‍त। 32 मिनु पिपीमी चोक्‍पाइक्‍ब कली ब्रेश्‍शा ‘हिंचा ङा बाक्‍ङे बाक्‍त। गेम आं कली खुम्‍की पा बाप्‍शा सेउ पाप्‍तीवी। मिनु गो इ जेर नेल्‍ल क्‍याम्‍शा गेतन। लूका ६:३६ 33 दोपा इ कली शिशी पाइना, मोपा गेमी यो इ वारच कली पचा ममाल्‍नेवे ङा?’ दे गाइश्‍शा मदा बाक्‍त। १यूहन्‍ना ४:११ 34 मिनु मेको आ जेर नेल्‍ल मथाप्‍ता सम्‍म जेल्‍खान ङा पुलीस आन गुइमी जिम्‍मा गेवा बाक्‍त। मत्ती ५:२६ 35 मोपतीके होस पांइसीने। मारदे हना इन लोक्‍ब कली इन थुं गा रे पा माफ मगेतीनी हना, स्‍वर्गम बाक्‍ब आं आफोमी यो इन कली मोदेंशोन पाइब” दे शेंताक्‍मी। मत्ती ६:१४-१५; याकूब २:१३