5
सुनी ङा पुंइशो लोव़
कुम्सो पपाइक्ब कली मुराली ताप्शा पतीके। दाऊद आ कुम्सो।
1 परमप्रभु यावे, आं देंशो लोव़ नेनीने। आं हुकयी पशो नेनीन। 2 आं पिप, परमप्रभु, आं ठेयब सेंदा नेनीने। मारदे हना गो इन कली लोव़ पा पुंइनुङ। 3 परमप्रभु यावे, गे सुनी कना आं सेंदा नेंनीनी। गो मार माल्नुङा, मेको इन कली पुंइशा, रिम्शा बाक्नुङ। 4 मिनु गे मरिम्शो पाइब आन कली मदाक्ब परमप्रभु बाक्नीनी। इन अरेशो मटीब काइ यो गे नु बाक्ने मचाप्नीम। 5 ठेयब लेश्शो मुरपुकी इन ङोंइती राप्ने मचाप्नीम। गे मरिम्शो पाइब आन कली मदाक्नीनी। 6 गे जोल पाइब आन कली खतम पाइनीनी। मिनु हुश ख्राक्श पोक्ब नु थमा मसुइक्ब मुर आन कली ग्रांग्रा दित्नीनी। 7 गो चहिं इन गेना हना यो ठेयब दाक्तीकेमी इन खिं ओव़चा ताइनुङ। मिनु गो इन कली मान पा हिंशा, इन खिं गे कोव़शा, पोक्च थेक्शा ठेयब सेल्नुङ। भजन संग्रह २६:८
8 आं जोरी सत्रु शुश बाक्नीमी। मोपतीके आं कली इन ठीक पतीके लां कोंइदीने। आं ङोंइती इन लां ठीक सेलीन।
9 आं जोरी सत्रुमी जोल ला पाइनीम। आन थुंमी “दोपा खतम सेल्नुङा” दे ला मिम्नीम। आन लकचा मुर थिम्तीके खोदेंशो बाक्ब। मेकोपुकी मिलो शिलो पाइब बाक्नीम। रोमी ३:१३ 10 परमप्रभु, मेको आन मरिम्शो पशो आंम आन कली दुम्ल। मेको आन शुश मरिम्शो पशो आ पर्बम मेको आन कली इन ङोंइती रे तिलीन। मारदे हना मेको इन कली मटीब बाक्तेक्म। 11 सुमी इन कली थमा सुइक्नीमी, मेको ग्येरसीनीम। मेकोपुकी गेना हना यो शुश ग्येरशा, इन खाल पतीकेमी ग्येरशा बाक्नीम। मिनु इन कली तुइश्शा, इन नें दाक्शा, ग्येरशा कुम्सो पाइनीम। 12 मिनु परमप्रभु यावे, गे मेको ठीक पाइब आन कली आसीक गेनीनी। इन दाक्तीके मेको आन कली एर ओंथ वोइश्शो तेक्तीक खोदेंशो बाक्ब।