1 सरीङमी परमप्रभु आ छेङछेङ आ पर्बम लोव़ पाइब। सरीङ आ ठेयब दुम्‍तीकेमी परमप्रभु आ गेय आ पर्बम लोव़ पाइब। रोमी १:१९-२० 2 नाक्‍त कामी अर्को नाक्‍त कली शेंब। नाक्‍दो कामी अर्को नाक्‍दो कली देंब। 3 मारेइ लोव़ मबाक्‍ब। ब्‍वाक्‍शो यो मनेंसीब। 4 मो हना यो रागी नेल्‍लेम तुइक्‍नीम। मेकोमी सरीङम नां कली बाक्‍तीक सेल्‍तु। रोमी १०:१८

5 मेको नां ग्‍युंबे पचा चिक्‍शो ग्‍युम्‍ले खोदेंशो बाक्‍ब। मेको ग्‍येरसीशा आ लां गाक्‍ब। 6 मेको पूर्ब रे दाप्‍शा, तेइ तेइ हिरसीब। मेको आ नाप्‍शो रे मारेइ ख्रुइश्‍शा लीने मचाप्‍नीम।

7 परमप्रभु यावे आ अरेशो लोव़ नेल्‍ल आन कली गारब। मेकोमी लेंशा ब्रोंइपाइक्‍ब। परमप्रभु यावे आ देंतीके थमा लोव़ बाक्‍ब। मेकोमी मतुइक्‍ब आन कली तुइक्‍ब सेल्‍ब। 8 परमप्रभु यावे आ ब्रेक्‍शा अरेशो लोव़ ठीक बाक्‍शा, मुर आन थुं ग्‍येरपाइक्‍ब। परमप्रभु यावे आ शेंशोमी मुर मिक्‍च ताइब दुम्‍नीम। 9 परमप्रभु यावे कली मान पा हिंचा रिम्‍शो दुम्‍शा, गेना हना यो लीब। परमप्रभु यावे आ निसाफ पतीक लोव़ थमा नु गेना हना यो ठीक बाक्‍नीम। 10 मेको सुन क्‍येङा यो शुश माल्‍चा ङा, क्‍येख सुन क्‍येङा यो क्‍येट लाइब खोदेंशो बाक्‍ब। मेको चाका रे याप्‍शो खुदो क्‍येङा यो जिज बाक्‍ब।

11 मेकोमी इन गेय पाइब कली होस पा बाक्‍पाइक्‍ब। मेको लोव़ टीबपुकीम ठेयब इनाम ताइनीम। 12 आ मतुइक्‍थु दूली पशो, सुम तुइक्‍बा ङा? आं मतुइक्‍थु मरिम्‍शो पशो माफ गेयीनी। अय्‍युब ४२:३-६ 13 इन गेय पाइब कली ठेयब लेश्‍शो दुम्‍तीक रे तेक्‍कीन। ठेयब लेश्‍शो दुम्‍तीकेमी आं कली हुकुम मपवल। मोपा गो दोस नु हेंथे पतीक रे ब्रोंइनुङ।

14 परमप्रभु यावे, आं सेरथे फुल्‍लु नु आं कली श्‍येत रे प्रोंइब, आं पशो लोव़ नु आं मिम्‍शो ब्रने।