27
परमप्रभु यावे नु थुं का दुम्शो
दाऊद आ कुम्सो।
1 परमप्रभु यावे आं छेङछेङ नु आं कली श्येत रे प्रोंइब बाक्ब। गो सु नु हिंचा माल्नुङा ङा? परमप्रभु यावे आं ब्रोंइतीक सक्ति नु आं ख्रुइक्तीक बाक्ब। आं कली सुम हिंच कोंइने चाप्बा ङा? मीका ७:८; भजन संग्रह ५६:५ 2 मरिम्शो मुरपुकी आं श्ये ब्वचा कली आं नेक्था जाक्मानु, आं कली खेदा पाइब नु आं जोरी सत्रु दाइल पपाइश्शा खोल्चा पुंइसाक्म। 3 मिनु ठेयब लडाइ पाइब हुलम पुम्ताक्यीमी हना यो, गो महिंनुङ। जिचा पोक्तेक्म हना यो “परमप्रभुमी आं कली प्रोंइब” दे थमा सुइश्शा बाक्नुङ। भजन संग्रह ३:७
4 गो परमप्रभु यावे नु लोव़ का पुंइनुङ। मिनु मेको माल्ना माल्न बाक्नुङ। मेको मार बाक्ब देंशा हना “गो मबेक्ङा सम्म परमप्रभु यावे आ बाक्तीकेमी बाक्शा, परमप्रभु यावे आ रिम्शो पतीके तचा नु आ खिंम मेको कली माल्शा तुइक्चा दाक्नुङ। भजन संग्रह २६:८; भजन संग्रह ४२:५; भजन संग्रह ६३:३; भजन संग्रह ८४:४,५,११ 5 मारदे हना श्येत दुम नाक्ती, मेकोमी आं कली आ बाक्तीकेमी ख्रुइश्शा वोइक्ब। मिनु आं कली सेरथे फुल्लु तारी वोइक्ब। भजन संग्रह ३१:२१ 6 मोपा आं एर ओंथ बाक्शो जोरी सत्रु आन ङोंइती आं पिया पोक्ब। मिनु गो ग्येरशा ठेयब सेंदामी परमप्रभु यावे कली चढ़ेशा, कुम्सो पाइनुङ।
7 परमप्रभु यावे, गो इन कली ब्रेङङानु, गे आं लोव़ नेंशा, शिशी पा आं पुंइशो गेयीनी। 8 परमप्रभु यावे, इन लोव़मी ‘आं कली मालीन’ दे ब्रेक्शो खोदेंशो पा, आं थुंमी इन कली माल्नुङ। ब्यवस्था ४:२९ 9 इन कुल आं क्येङा मख्रुइक्तीन। इन गाइक्तीकेमी इन गेय पाइब, आं कली, मतिल्यीनी। गे आं कली वारच पाइब बाक्नीनी। गो नु बाक्शा, मप्रोंइयीनी। गे आं कली श्येत रे प्रोंइब बाक्नीनी। 10 आं आम आफोमी आं कली प्रोंइतीसी हना यो, परमप्रभु यावेमी आं कली कोव़ब। 11 परमप्रभु यावे, आं कली इन लां शेंदीनी। मिनु आं जोरी सत्रु आन पर्बमी आं कली ठीक लां कोंइदीनी। भजन संग्रह ८६:११; भजन संग्रह १३९:२४ 12 आं कली खेदा पाइब आन गुइमी मगेयीनी। मारदे हना मेको जोल पा सांकछी बाक्शो बाक्नीम। मेकोपुकी हुश ख्राक्श पोक्ब बाक्नीम। 13 गो ब्रोंइशा बाक्ब आन बाक्तीकेमी, परमप्रभु यावे आ रिम्शो पतीके ताइनुङ, दे थमा सुइक्नुङ” दे लोव़ पाता। यसैया ३८:११ 14 गो इ कली “परमप्रभु यावे आ वारच पतीके रिम्दो। बोल्यो दुमो। इ थुं बारपतो। मिनु परमप्रभु यावे आ वारच पतीके रिम्दो” दे कुम्सो पाता।