1 गो परमप्रभु यावे कली रिम्‍स ङा रिम्‍स बाक्‍ती। मेकोमी आं गे कोव़शा, आं वाइ ब्रेश्‍शा, पुंइशो लोव़ नेंतु। 2 मेकोमी आं कली ग्रांग्रा दिचा ङा हिलोम बिक्‍शा बेक्‍तीक रे ग्रुंइताक्‍यी। मिनु आं कली सेरथे फुल्‍लु का तार राप्‍पाइक्‍ती। मिनु महिम्‍सीचा ङा पा नाइक्‍पाइक्‍ती। 3 मेकोमी आं कली नक कुम्‍सो का पपाइक्‍ती। आंइ परमप्रभु कली ठेयब सेल्‍तीक कुम्‍सो पपाइक्‍ती। मिनु शुश मुरुम एको तशा, नेंशा, परमप्रभु यावे कली मान पा हिंशा, मेको कली थमा सुइक्‍नीम। भजन संग्रह ३३:३ 4 सु सुमी परमप्रभु यावे कली थमा सुइक्‍नीमी, मेको ग्‍येरसीशो मुर बाक्‍नीमी। मेकोपुकी ठेयब लेश्‍शो नु जोल ङा सक्ति पाइश्‍शो देवी देवता गे लाइब नु मबाक्‍नीम।

5 मिनु गो “परमप्रभु यावे, आं परमप्रभु, गे आंइ पर्बम पशो छक लाक्‍चा ङा गेय नु इन मिम्‍शो कोंइताक्‍की। मेको शुश बाक्‍नीम। इन खोदेंशो सुइ मबाक्‍नीम। गो मेको आन कली शेंशें दाक्‍ती, देंती हना यो, नेल्‍ल शेंने मचबु। मारदे हना मेको शुश बाक्‍नीम। भजन संग्रह १३९:१७-१८ 6 गे मार मार क्‍योरशा चढ़ेशो नु जचा चढ़ेशो तशा मग्‍येरसीनी। तन्‍न इन अरेशो लोव़ नेंचा कली नोफा दाइक्‍ब सेल्‍तीनी, चोशा चढ़ेशो नु पाप आ पर्बम चढ़ेशो मपुंइनी। भजन संग्रह ५०:८-१३; भजन संग्रह ५१:१८; १सामुएल १५:२२; हिब्रू १०:५-१० 7 मिनु गो ‘गो एक बाक्‍ती, दे परमप्रभु यावे आ लोव़मी आं पर्बम ब्रेक्‍शो बाक्‍ब’ देंती। 8 परमप्रभु, गो इन दाक्‍शो पशोमी आं कली ग्‍येरपाइक्‍ब। इन अरेशो लोव़ आं थुंम बाक्‍ब। 9 गो ठेयब ग्रुम्‍तीकेमी इन रिम्‍शो ब्रोंइतीक लोव़ आ पर्बम लोव़ पाइनुङ। परमप्रभु यावे, गो सिक्‍सी पा मबाक्‍नुङ। मेको गे तुइक्‍नीनी। 10 गो इन मुर आन कली श्‍येत रे प्रोंइतीके आं थुंम ख्रुइश्‍शा मवोइक्‍थु, इन दाक्‍शा मप्रोंइतीके नु मुर आन कली श्‍येत रे प्रोंइतीके आ पर्बम लोव़ पाता। गो इन गेना हना यो दाक्‍तीके नु दाक्‍शा मप्रोंइतीके आ पर्बम मख्रुइक्‍थु, ठेयब ग्रुम्‍तीकेमी शेंताक्‍ङमी। 11 परमप्रभु यावे, गे इन शिशी पतीके मतेक्‍कीन। इन गेना हना यो दाक्‍तीक नु दाक्‍शा गेनायो मप्रोंइतीकेम आं कली गेना हना यो खाल पयीसील। 12 मारदे हना हिक्‍ने मचाप्‍चा ङा श्‍येतपुकीमी आं कली पुम्‍शो बाक्‍नीम। आं मरिम्‍शो पतीकेम आं पिया खुक्‍शो बाक्‍ती। मेकोपुकी आं पिया ङा चां क्‍येङा यो शुश बाक्‍नीम। मोपा आं थुं लुक्‍च लशो बाक्‍ब। 13 परमप्रभु यावे, श्‍येत रे प्रोंइयीनी। परमप्रभु यावे, आं कली वारच पाइक्‍चा कली रीब पा जाक्‍कीन। भजन संग्रह ७०:- 14 आं कली साइक्‍चा माल्‍ब नेल्‍ले मुने दोक्‍शा, ग्‍येत्‍थ लुक्‍च दुम्‍मल। आं कली श्‍येत जशो दाक्‍ब नेल्‍ल लेश्‍शा लशा, खतम दुम्‍मल। 15 आं कली शुक्‍शी पाइबपुकीमी ‘आहा, आहा’ देंशो, नेल्‍ल रे मुने दोक्‍मल। 16 तन्‍न सु सुमी इन कली माल्‍नीमी, मेको नेल्‍ले इन पर्बम शुश ग्‍येरसमल। आन श्‍येत रे प्रोंइचा पुंइसीब नेल्‍लेमी गेना हना यो ‘परमप्रभु यावे ठेयब बाक्‍ब’ देंमल। 17 गो प्रुङग नु श्‍येत जाइब बाक्‍ती हना यो, परमप्रभुम आं कली मिम्‍ब। गे आं कली वारच पाइब नु आं कली श्‍येत रे प्रोंइब बाक्‍नीनी। आं परमप्रभु देश मपने” दे लोव़ पाता।