42
ठेयब श्येतम परमप्रभु कली मिम्शो
कुम्सो पपाइक्ब कली शेंतीक कुम्सो। कोराह आ तौ आन कुम्सो। १इतिहास ६:१६,२२; २इतिहास २०:१९
1 दोपा रोकोशेमी खोला ङा ब्वाक्कु तूतू दाक्शा ब्वाक्कु मिम्बा, मोपा आं थुंमी यो परमप्रभु, इन कली मिम्ब। 2 मोपा आं थुं ब्रोंइशा बाक्ब परमप्रभु आ नेक्था बाक्चा दाक्ब। गो गेना परमप्रभु आ ङोंइती बाक्चा ताइनुङा? भजन संग्रह ६३:२; भजन संग्रह ८४:३; भजन संग्रह १४३:६ 3 आं प्रेक्कु नाक्दो नाक्ती आं जचा थोव़क दुम्शो बाक्ब। मारदे हना मुरपुकीमी नाक्त किंत किंत “इ परमप्रभु ते बाक्मे?” दे शुक्शी पा हिल्लो पस ङा पस बाक्नीम। भजन संग्रह ७९:१० 4 मिनु गो मेको नेल्ल मिम्शा, परमप्रभु, इन खिं लाइब शुश मुर आन कली लां कोंइशा, मेकोपुकी नु लना लन बाक्ङानु, ग्येरसीशा “गे रिम्शो पाइब बाक्नीनी” दे गो नेल्लेमी कुम्सो पा चाड मानेतक। भजन संग्रह २७:४
5 आं थुं, गे मारदे लुक्च लाइनेवे? मारदे ग्येत्थ लुक्च दुम्नेवे? परमप्रभुमी मार पाइबा, मेको रिम्दो। मिनु नोले मेकोमी आं कली श्येत रे प्रोंइशो तशा, गो परमप्रभु कली ठेयब सेल्नुङ। मारदे हना मेको आं कली श्येत रे प्रोंइब नु आं परमप्रभु बाक्ब। 6 आं परमप्रभु, आं थुं, ग्येत्थ लुक्च दुम्त। गो यर्दन ङा दिंम नु हेरमोन ङा मिसार डांडा रे इन कली मिम्नुङ। 7 मिनु इन बारशो ब्वाक्कु आ ग्रीशोमी अर्को ब्वाक्कु कली ब्रेप्ब। मेको इन ब्वाक्कु आ छालमी आं कली सुम्शो बाक्ब।
8 मिनु गो नाक्ती परमप्रभु यावे आ गेना हना यो दाक्तीके तुइक्नुङ। मिनु नाक्दो आ कुम्सो आं थुंमी बाक्ब। मेको आं कली ब्रोंइचा गेब परमप्रभु नु लोव़ पतीके बाक्ब।
9 गो परमप्रभु, आं सेरथे फुल्लु कली “गे मारदे आं कली प्रेंदीनी? गो मारदे आं जोरी सत्रु रे पा खेदा पचा पुंइसीशा, थुं ग्येत्थ लुक्च दुम्शा, गाक्चा माल्ङा?” देंती। ब्यवस्था ३२:४ 10 आं कली दिप्बपुकीमी आं रुश जिक्शो खोदेंशो पा शुक्शी पाइनीम। मिनु मेकोपुकीमी गेना हना यो “इ परमप्रभु ते बाक्मे” दे शुक्शी पा, हिल्लो पस ङा पस बाक्नीम।
11 आं थुं, गे मारदे लुक्च लाइनेवे? मारदे ग्येत्थ लुक्च दुम्नेवे? परमप्रभुमी मार पाइबा, मेको रिम्दो। मिनु नोले आं कली श्येत रे प्रोंइशो तशा, गो परमप्रभु कली ठेयब सेल्नुङ। मारदे हना मेको आं कली श्येत रे प्रोंइब नु आं परमप्रभु बाक्ब।