1 जात जात ङा मुर नेल्‍लेमी इन गुइ फ्रोक्‍तीन। गे ग्‍येरशा, परमप्रभु कली कुम्‍सो पने। 2 मारदे हना परमप्रभु यावे, नेल्‍ल क्‍येङा ठेयब नु हिंचा ङा बाक्‍ब। मेको रागी नेल्‍ल ङा ठेयब पिप बाक्‍ब। 3 मेकोमी रागी आन कली आंइ के सेल्‍शा, शुश मुर आन कली आंइ कली हुकुम पचा गेप्‍तु। 4 मेकोमी आंइ कली शोंप योव़शा गेप्‍तु। मेको याकूब आ दाक्‍शो रागी बाक्‍त। मारदे हना परमप्रभुमी याकूब कली शुश दाक्‍ताक्‍व।ठेयब सेंदा पा।ब्‍यवस्‍था ३२:९

5 मुरपुकी शुश ग्‍येरसमानु, परमप्रभु आ नित्‍तीकेम लाइब। परमप्रभु यावे तुराही ताप्‍शो नेंशा लाइब। 6 परमप्रभु कली ठेयब सेल्‍तीक कुम्‍सो पने। लेंशा ठेयब सेल्‍तीक कुम्‍सो पने। आंइ पिप कली ठेयब सेल्‍तीक कुम्‍सो पने। लेंशा ठेयब सेल्‍तीक कुम्‍सो पने। 7 मारदे हना परमप्रभु रागी नेल्‍ल ङा पिप बाक्‍ब। मेको कली ठेयब सेल्‍तीक कुम्‍सो का पने। भजन संग्रह ९३:१ 8 परमप्रभुमी रागी रागी नेल्‍ल आन कली सासन पाइब। मिनु परमप्रभु आंम आ ठेयब नित्‍तीकेमी निप्‍ब। 9 मिनु जात जात ङा सासन पाइबपुकी नु अब्राहाम आ परमप्रभु आ मुर नेल्‍ल मेकेर ग्रुम्‍शो बाक्‍नीम। मारदे हना रागी रागी ङा पिपपुकी परमप्रभु आ गुइमी बाक्‍नीम। मेको थम ठेयब बाक्‍ब।