1 गे निसाफ पाइबपुकी, ठीक लोव़ पाइनीनी? गे मुर आन कली ठीक निसाफ पाइब बाक्‍नीनी? 2 ममाइ, गे इन थुंमी ठीक ममिम्‍नीनी। मिनु गे रागीम हुश ख्राक्‍श पोक्‍नीनी। 3 परमप्रभु आ अरेशो मटीबपुकी जरमेसमा रेन मरिम्‍शो पाइनीम। कोव़ज रेन मरिम्‍शो पाइब दुम्‍शो बाक्‍नीम। मिनु जोल पाइनीम। 4 मेको आन बीस बुस्‍स आन बीस खोदेंशो बाक्‍ब। मेको थम ठेयब बुस्‍स आन नोफा सुशो खोदेंशो बाक्‍नीम। 5 मिनु मन्‍तर तन्‍तर पाइब नु नु टुना मुना पाइब आन लोव़ मनेंनीम।

6 परमप्रभु, मेको आन ख्रुइ जिक्‍तीन। परमप्रभु यावे, गुप्‍स आन ख्रुइ तुल्‍दीन। 7 मेकोपुकी शाइश्‍‍शो ब्‍वाक्‍कु खोदेंशो पा जाम्‍शा, लमल। मेकोपुकीमी लिब्राम ब्रा आप्‍मेनु, मेको आन ब्रा हेंथे लमल। 8 मेकोपुकी गाक्‍ना गाक्‍न यशा, दे खोदेंशो दुम्‍मल। मेकोपुकीमी शाम्‍शो आलपुकीम खोदेंशो पा नां मतामेक्‍ल।

9 इन ग्‍योंबपुकी सोव़शो चूमी ब्रशो मीम होचा क्‍येङा ङोंइती, मरिम्‍शो पाइबपुकी जाम्‍शा लाइनीम। 10 मिनु ठीक पाइबपुकी मरिम्‍शो पाइब आन कली क्‍येक्‍क लेश्‍शो तशा, ग्‍येरसीनीम। मिनु मेको आन हुशेम गाक्‍नीम। 11 मिनु मुरपुकीमी “ठीक पाइबपुकीमी थमा पा इनाम ताइनीम। थमा पा, परमप्रभु रागीम निसाफ पाइब बाक्‍ब” देंनीम।