60
लडाइ ब्रुशा पुंइशो
कुम्सो पपाइक्ब कली कबल ङा फू आ लायो। दाऊद आ सेल्शो शेंतीक कुम्सो। मेकोमी अराम-नहाराइन नु अराम-सोबाह नु लडाइ पवानु, योआब लेश्शा, १२ हजार एदोमी कली हिक्सी दिंमम साइक्तु। २सामुएल ८:३,१३; २सामुएल १०:१३,१८
1 परमप्रभु, गे आंइ कली वारच पाइक्चा प्रोंइशो बाक्तीनी। गे आंइ लडाइ पतीके कली प्रोंइशो बाक्तीनी। गे आंइ पर्बम थाम्पा गाइक्ताक्नी। मुल आंइ कली ङोंइती ङा खोदेंशो पा रिम्शो सेलीन। 2 गे ख्रिनु कुपाइक्तीनी। मिनु रागी कली चेत्तीनी। मेको जेश्शो लेंशा सेलीन। मारदे हना हिम्सीन सीन बाक्ब। 3 परमप्रभु, गे इन मुर आन कली ठेयब श्येत जपाइक्तीनी। गे आंइ कली दिङ दाङ गोल्ब तूचा थोव़क तूपाइक्तीनी। भजन संग्रह ७५:९
4 मिनु इन क्येङा मान पा हिंब आन कली प्रोक्तीक लां कोंइचा कली चिन्ड का वोइक्तीनी। मेकेर लमानु, ब्राम मख्राइनीम। ठेयब सेंदा पा।प्रस्थान १७:१५
5 इन सक्तिमी आंइ कली प्रोनीन। मिनु इन दाक्शो मुरपुकी ब्रोंइचा तामेक्ल। भजन संग्रह १०८:७-१४ 6 परमप्रभुमी आ बाक्तीक रे “ग्येरपाइक्तीकेमी, गो शेकेम कली योक्नुङ। सुक्कोथ ङा दिंम पुक्नुङ। 7 गिलाद नु मनस्से आं के बाक्नीस। एफ्राइम आं पियाम गुप्तीक बाक्ब। यहूदा आं राज दन्ड बाक्ब। उत्पत्ती ४९:१० 8 मोआब आं चिक्तीके बोस बाक्ब। गो एदोम तार आं जुत्ता ब्वारनुङ। गो पलिस्ती आन कली ग्रानुङ।
9 सुम आं कली गारो हिरशो सहर सम्म चाक्दीप्बा? सुम आं कली लां कोंइशा, एदोम सम्म चाक्दीप्बा?” देंत। 10 परमप्रभु, गे आंइ क्येङा ङोन मलनी? गे आंइ कली प्रोंइतीनी। गे आंइ लडाइ पाइबपुकी नु मलाइनीनी।
11 मिनु आंइ जोरी सत्रु क्येङा ग्राचा कली आंइ कली वारच पने। मारदे हना मुर आन वारच पशो शोर गाक्शो बाक्ब। 12 गो परमप्रभु आ वारच पाइश्शोमी ग्रानीकी। मिनु मेकोमी आंइ जोरी सत्रु आन कली दिम्ब।