1 ए रागी ङा मुर नेल्‍ले, ग्‍येरशा परमप्रभु कली कुम्‍सो पने। 2 गे परमप्रभु कली “इन नें ठेयब बाक्‍ब” दे कुम्‍सो पने। मेको कली रिम्‍शो कुम्‍सो पने। 3 मिनु परमप्रभु कली “इन गेय ठेयब नु हिंचा ङा बाक्‍नीमी। इन जोरी सत्रु इन ङोंइती हिंशा, ख्रिंख्रि पा बाप्‍नीम। मारदे हना इन सक्ति थम ठेयब बाक्‍ब” देनीन। 4 रागी ङा मुर नेल्‍ल इन ङोंइती बाप्‍नीम। मेकोपुकीमी इन कली ठेयब सेल्‍शा, कुम्‍सो पाइनीम। मिनु इन नें कली ठेयब सेल्‍शा, कुम्‍सो पाइनीम। ठेयब सेंदा पा।

5 जाक्‍कीन, परमप्रभु आ गेय कोव़ङीन। मेकोमी मुर आन दातेमी ठेयब नु हिंचा ङा गेय पाप्‍तु। 6 मेकोमी समुन्‍द्रम सोव़शो लां सेल्‍तु। मुरपुकी सोव़शो लांम गाक्‍शा, खोला शोक्‍साक्‍म। मेकेर गो मेको आ पर्बम ग्‍येरसाक्‍क। प्रस्‍थान १४:२१-२२; यहोसु ३:१६-१७ 7 मेकोमी आ सक्तिमी गेना हना यो सासन पाइब। मेकोमी रागी रागी आन कली कोव़ब। मेको कली मटीब ठेयब मलेम्‍मल। ठेयब सेंदा पा।

8 जात जात ङा मुरपुकी, आंइ परमप्रभु कली ठेयब सेलीन। मेको कली ठेयब सेल्‍शो लोव़ नेंसेक्‍ल। 9 मेकोमी आंइ कली बेक्‍चा रे प्रोंइतु। आंइ कली ग्रेक्‍चा मगेव। 10 मारदे हना परमप्रभु, गे आंइ कली नाक्‍ताक्‍नी। गे आंइ कली चांदी यपाइश्‍शो खोदेंशो पा यपाइक्‍तीनी। हितोपदेस १७:३ 11 गे आंइ कली जेल्‍खानम चोक्‍पाइक्‍तीनी। मिनु हेल्‍शो भारी कुरपाइक्‍तीनी। 12 गे मुर आन कली आंइ पियाम थेक्‍पाइक्‍तीनी। गो मी नु ब्‍वाक्‍कुम गाक्‍तक। तन्‍न गे आंइ कली ठेयब रागीम चाक्‍तीनी। यसैया ४३:२

13 गो इन खिंमी चोशा चढ़ेचा कली जाक्‍नुङ। मिनु आं पशो कसम खाप्‍नुङ। 14 गो श्‍येत जङानु, कसम जाता। मिनु मुल खाप्‍नुङ। 15 गो इन कली दोम्‍शो बस्‍तु चढ़ेनुङ। गो बोका चढ़ेनुङ। गो ब्‍यफपुकी नु क्‍यारश चढ़ेनुङ। ठेयब सेंदा पा।

16 परमप्रभु कली मान पा हिंबपुकी, नेल्‍ल जाक्‍शा नेनीन। मेकोमी आं पर्बम मार पवा, मेको गो इन कली शेंनुङ। 17 गो मेको कली ठेयब सेंदा पा पुंइता। गो मेको कली ठेयब सेल्‍ता। 18 आं थुंमी पाप बाक्‍शो हना, परमप्रभुमी आं लोव़ मनेन वा। हितोपदेस २८:९ 19 तन्‍न परमप्रभुमी आं लोव़ थमा पा नेंतु। मेकोमी आं पुंइशो लोव़ नेंतु। 20 परमप्रभु ठेयब बाक्‍ल। मारदे हना मेकोमी आं पुंइशो लोव़ गेती। मिनु आं कली गेना हना यो दाक्‍ब।