88
“वारच पाइय्यीनी” दे पुंइशो
कुम्सो पपाइक्ब कली महलेथ आ कुम्सो। कोराह आ तौ आन कुम्सो। एज्राह आ मुर हेमान आ सेल्शो शेंतीक कुम्सो।
१इतिहास ६:१८ 1 परमप्रभु यावे, आं परमप्रभु, गे आं कली श्येत रे प्रोंइब बाक्नीनी। नाक्दो नाक्त गो इन ङोंइती पुंइशो बाक्नुङ। 2 आं पुंइशो लोव़ इन ङोंइती जाक्ल। आं लोव़ नेनीन।
3 मारदे हना आं थुं श्येतम ब्रीशो बाक्ब। मिनु गो बेक्चा चिक्शो बाक्नुङ। 4 गो बेक्शा लाइब मुर नु हिक्सीशो दुम्ती। गो सक्ति मपाइश्शो मुर खोदेंशो दुम्ती। 5 गो बेक्शो मुरपुकी नु तिल्चा पुंइसीशो बाक्नुङ। तुरसुम बाक्शो साइक्चा पुंइसीशो मुर खोदेंशो दुम्ती। मोपा इन क्येङा ङोन बाक्शो इन मफ्रुक्शो मुर खोदेंशो दुम्ती। 6 गे आं कली बेक्शो मुर आन बाक्तीके छिङछिङ ङा नेल्ल क्येङा आगा ङा बाक्तीकेमी वोइक्तीनी। 7 इन गाइक्तीकेमी आं कली दिप्शो बाक्ब। मिनु इन छालम आं कली सुम्तीनी। ठेयब सेंदा पा।
8 गे आं वारच आन कली गो नु ग्रुम्चा हिंपाइक्तीनी। गो आं वारच आन कली हिंचा ङा दुम्ती। गो चोक्सीशो, श्येत रे ब्रोंइशा, प्रोक्ने मचाप्नुङ। भजन संग्रह ३८:१२ 9 सुर्ता पतीके आं मिक्च ब्रा ब्रा दुम्ती। परमप्रभु यावे, गो नाक्त किंत किंत इन कली पुंइना पुंइन बाक्नुङ। मिनु इन नेंमी आं गुइ पोक्नुङ। 10 मार, गे बेक्शो मुर आन कली छक लाक्चा ङा गेय पाइनीनी? मार, मेको बेक्शो मुरपुकीम बोक्शा, इन कली ठेयब सेल्नीमी? ठेयब सेंदा पा।भजन संग्रह ६:६; यसैया ३८:१८
11 मार, गे इन गेना हना यो दाक्तीके आ पर्बम बेक्शो मुर आन बाक्तीकेमी लोव़ पाइनीमी? इन दाक्शा मप्रोंइतीके आ पर्बम तुरसुम शेंनीमी? 12 मार, इन छक लाक्चा ङा गेय छिङछिङमी तुइक्नीमी? इन श्येत रे प्रोंइतीके बेक्शो मुर आन दातेमी तुइक्नीमी ङा?
13 परमप्रभु यावे, गो चहिं सुनी कना इन कली लोव़ पाइनुङ। 14 परमप्रभु यावे, गे आं कली मारदे प्रोंइयीनी? मारदे इन कुल ख्रुइक्तीनी? 15 गो ठिटा रेन श्येत जशा, बेक्चा चिक्शो बाक्नुङ। इन हिंच कोंइशोमी गो श्येत जशो बाक्नुङ। मिनु आं थुं लुक्च लशो बाक्ब। 16 गे आं पर्बम गाइक्ताक्नी। इन हिंच कोंइशोमी आं कली खतम पोक्शो बाक्ब। 17 मेकोपुकीम नाक्त रे ब्वाक्कु खोदेंशो पा आं एर ओंथ नेल्ल हिरशो बाक्नीम। मेकोपुकीम आं कली पुम्शा हिंच कोंइताक्यीमी। 18 गे आं कली दाक्ब नु आं वारच आन कली आं कली तशा हिंपाइक्तीनी। मिनु छिङछिङ आं नेक्था ङा वारच दुम्शो बाक्ब।