1 परमप्रभु यावेमी खिं मसेल्‍शो हना, खिं सेल्‍ब आन गेय मोशा दुम वा। परमप्रभु यावेम सहर खाल मपशो हना, खाल पाइब आन खाल पशो मोशा दुम वा। 2 गे सुनी कना बोक्‍शा, नाक्‍दो सम्‍म शुश गेय पाइनीनी। मिनु इन शोब्‍ले सुर्ता पा जाइनीनी। मेको मोशा बाक्‍ब। मारदे हना परमप्रभुमी आ दाक्‍शो मुर आन कली इप्‍ची ना आन माल्‍शो गेब। हितोपदेस १०:२२

3 तमी तौ परमप्रभु यावे आ गेशो बाक्‍नीम। आलपुकी मेको आ गेशो इनाम बाक्‍नीम। भजन संग्रह १२८ ३-४; उत्‍पत्ती ३०:२; उत्‍पत्ती ३३:५ 4 मिनु ठिटा ना थिशो तौपुकी लडाइ पाइब आन गुइम बाक्‍शो ब्रा खोदेंशो बाक्‍नीम। 5 सु सु आन ब्रा कुरतीके मेकोमी ब्रीशो बाक्‍नीमी, मेको मुर ग्‍येरसीशो बाक्‍नीम। मिनु मेकोपुकी ठेयब लाप्‍चोमी आन जोरी सत्रुमी लोव़ पा जिचा पोक्‍गमेनु, मुने मदोक्‍नीम।