PAULO ENA URIURI KOLOSI ENADI
1
Paulo Iesu Keriso ena Aposotolo, Eaubada ena nuatu debana eai, maegu eda tau Timoteo,
Hetabu tataodi, eo eda tataoyao taumiatahitahi Keriso boeana eai, Kolosi eai: Ainauia enamiu, eo nuataru hinage, Eaubada Tamada arinai i laoma, eo eda Guiau Iesu Keriso.
Eaubada, eda Guiau Iesu Keriso Tamana, ai lautoiei, enamiu ai laulau‐uura huia gamagamagari, paana emi sunuma Keriso Iesu boeana eai wasana ai ataiei, eo emi gadosisi hetabu tataodi gamagaridi aridi eai. Sunuma wa enamiu se torenonohaiyao galewa eai, iaede nabada wa ribamamohoina ribana eai au ataiei, evanelia eai; i lagema arimiu eai, doha hinage ie lage tanoubu tupo gamagari, eo aiaina ie tore, doha hinage arimiu eai, asubenana eai wa au ataieibagunaei, i laoma e huia ta, Eaubada ena ainauia au hearo mamohoiei, doha heleda‐taupaisoa lolona Epapara i heatamiu wa, ia Keriso ena heaheari taunuaadidirina esau, ai debamai eai, hinage emi gadosisi Earua boeana eai, ia tauheribamai ede.
Paana ede nei asubenana eai wa wasana ai ataiei, i laoma e huia ta, nige ai uura lautom enamiu, ai henua ariri bena Eaubada ena nuatu italobaina eai au monau, sonoga gamagari eai, eo sibasiba earua ena tupo eai. 10 Bena au laulau doha mamohoi omi Guiau enanayao, tatao au henualolodi, hari paisoa hari paisoa lolo aridi eai, eo aiaimiu au tore, Eaubada nuanuatuna au hemotula. 11 Adidiri gamagamagari eai se headidirimiu, ena gigibori namanamarina eai, nuamiu se paipai, au taubiga‐daoi, makodemiu; 12 Tamana arinai au aiaitoi, ia ede i hetoroda, hetabu‐tataodi marana boeana eai edi gogo lailai, ita enada tupona ta abi. 13 Ia masigiri gigiborina eai i girihaida, i torelaeda Natu‐eogoeogoina ena basileia eai, 14 ia debana eai se hemaurida wa, osinana eai, baaea ribagigirina ede.
15 Eaubada ana ao nige tauitana, ia tautauna ede, ginauri maumauridi gamagaridi ealahouna; 16 paana ia nimana eai ginauri gamagaridi se hetubudi, galewa eai e tanoubu eai, matada eai ta itaitaidi e matada eai nige ta itaitaidi, hari terona, e hari basileia, e hari tanuaga, e hari gigibori: ginauri gamagaridi ia tauhetubudi, eo se hetubudi ia enana. 17 Eo ia ginauri gamagaridi i bagubagunaedi, eo ia debana eai ginauri gamagaridi se laulau. 18 Ia uruna ede, ekalesia tauna ede; ia ealahouna, mate eai tautorouio‐baguna; bena ginauri gamagamagaridi aridi eai ia i toro baguna. 19 Paana Tamana ena nualolo bena abihemonau maudoina ia arinai i ota. 20 Ia enada i laubiri, ena satauro osinana eai, ia debana eai ginauri gamagaridi i helabiniedi; ena tanoubu eai ginaurina, e galewa eai.
21 Na omi, nabada wa au tausuara, nuamiu eai omi waiunu, emi paipaisoa baaea debadi eai, 22 huia ta i helabiniemiu, ia tauna bulumana eai, ena mate debana eai, bena i hetoromiu omi tabuna, nige edi aba‐hegirumiu, e edi aba‐ribasuuimiu ia matana eai: 23 ena au heesegaimiu, sunuma eai ta au laulau, emi paa adiadidirina arinai au toro‐tahitahi, evanelia sunumana arinai taba nige se oihesuaramiu, iaede au ataieyao eo tatao gamagaridi galewa ubuna eai se guguiaidio, arinai eau Paulo se hetorogu ena heaheari eai ea lau.
24 Amamna ea hearodi omi debamiu eai, se hekodeaririegu, eo Keriso ena amamna tupona ea abi eau bulumagu eai, ia tauna debana eai, iaede ekalesia. 25 Arinai ede se hetorogu eau tauheaheari, Eaubada i tauribaegu ena nuatu i leama omi debamiu eai, bena Eaubada ena riba ea hemamohoiei; 26 riba eamuyamui wa mumuga ariri eai, hari huia hari isi eai, se toreyamui i laoma e huia ta se hemasarahayao ia ena hetabu‐tataodi aridi eai. 27 Isi aridi eai gogo lailaina, namanamarina, ginauri eamuyamuina wa enana, Eaubada bena i hemasaraha, bena i soe Murimuri‐tataodi aridi eai; iaede Keriso boeamiu eai, galewa namanamarina ta sunusunumaei wa. 28 Ia ai guguiaei, hari tau eo hari tau ai ribahesanapuei, hari tau eo hari tau ai heata, sonoga gamagamagari eai; bena hari tau eo hari tau ai woeai e i lolodumaduma, Keriso Iesu boeana eai. 29 Arinai hinage ea paisoa, ea heasaasa, ia ana paisoa debana eai, iaede boeagu eai i paipaisoa ma‐gigiborina.