Ebaruwa esookere eya
YOWAANA
Amangʼana ku owuimpi
Omujoji owa ebaruwa isatu ezia Yowaana ari *Omutumwa Yowaana, owawanga omulala ku awiiko wasatu Yakoobo ni Petro awaawanga ampi ni Yesu ino. Iye nio owajoja ebuuki ezia Owusasuko ni *injiili eya Yowaana. Ngʼinwawu Yowaana yaetwanga Saloome kandi yawanga wamwawu Maaria ngʼinwawu Yesu. Ebaruwa isatu zino (1 Yowaana, 2 Yowaana ni 3 Yowaana) ziajojwa ampi-ampi mu emiaka egituukre mu owulamu owua Yowaana, agati ya emiaka egia 85 ni 95. Yowaana yajoja ebaruwa zino alala ni injiili eya Yowaana andi na ari ku omugizi ogwa Efeeso, mu ekialo ekia *Eesia Ekitono, aa yawanga ki omukangasi omunene otiirwe ino owa ekaniisa mu emiaka giae egituukre.
Ebaruwa esookere eno yajojerwa Awakristo awaawanga mu ewitemo ewigawuke-gawuuke. Yowaana yawaizurizianga okuwa no owuiko agati yaawu ni Katonda, kandi agati yaawu aweene. Awasiagizia ku okulonda engerera ezia owuweeyi ezialowanga mbwe Yesu yaiwulwa kandi afwa ki omuntu. Awagerezi awaweeyi awo waagereranga mbwe Yesu yawanga mala no omufwano ogwa omuntu, ni yawanga mala omwoyo omusa, kandi mbwe yawulanga mu omuwiri olwa yaitwa ku *omusalaaba. Lwona awasiagizia ku engerera embiiwi ewoola mbwe owulamu owua Owukristo wuri mala ku okumanya ekilootu ni ngʼani ku ekia okola no omuwiri gwao. Yowaana awagaania mbwe okumanya okusugre kuema ku *Omwoyo Omweru ogwa Katonda kandi mbwe Yesu *Kristo Omuzia owa Katonda, yawanga omuntu kuwuene. Awalaga mbwe ekineene okukira wiona no okuwa no olugonzi, okurekerana amawi, okuwa mu okuikumia okwa Awakristo, okukira owuoni, okuwa no owuene mu owuinunuzi, owueru alala no owulamu owutariwua.
1
Ingʼana erireeta owulamu
1 Tuwajojera ku ingʼana erireeta*Ingʼana erigamba-gambwako ano ni Yesu *Kristo. owulamu erimiire okuweerao okuemera mu owutanikro. Ifwe tumiire okuriwurra, kandi okuriwona na amiiso giifu aweene. Ee, tumiire okuriwarra geeza kandi turiamba no okuriamba na amakono. 2 Owulamu wuno wualaganiwua. Twawuwona kandi tuwugamba-gambako ni tuwalaga amangʼana ku owulamu owutariwua, owuawanga ni Katonda kandi owumiire okulaganiwua ku ifwe.Yowa 1:1–2, 14; 4:14; 6:35; 8:12; 11:25; 15:27 3 Tuwalanzizia ekia tumiire okuwurra kandi tuwona, kugere mwona muwe ni ifwe mu owulala. Kandi turi mu owulala ni Katonda alala no omuzia waae Yesu *Kristo. 4 Tuwajojera amangʼana gano kugere emioyo giifu giizule du no owusangaavu.Yowa 15:11
Okuwa mu owueru
5 Owutumwa owua Katonda amiire okutu-aa mbwe tuwalanzizie ni mbwe, Katonda no owueru kandi ekierema kimuwulamo namba wutono.1Timo 6:16 6 Kutio ni tuwoola mbwe turi mu owulala nae, ni kandi tukiagenda-genda mu ekierema, ao otio tuweeya kandi owuene wuwula mu owulamu wuifu.1Yow 2:4 7 Ni, ni tugenda-genda mu owueru, mala kiomo iye omwene ari mu owueru, ifwe awari no okuganya ku Katonda, tuwa no owulala omuntu no omwina waae, kandi amasaai aga Yesu omuzia waae gatueruyia ku owuoni wuifu.Isaa 2:5; Yowa 12:35; Efee 5:8; Awaib 9:12; Owus 1:5; 7:14
8 Ni tuwoola mbwe tuwula no owuoni, ao tuisemerezia aweene kandi owuene wutuwulamo, yaaya. 9 Ni, ni tuwoorre owuoni wuifu, Katonda aaza okuturekera owuoni wuifu wuona kandi aaza okutueruyia mu owuoni owua tumiire okukola wuona, aeniki ari omulongoole kandi arindre okuifuuwa kwae.Zabu 32:3–5; Awaib 10:22 10 Ni tuwoola mbwe tukiari okukola owuoni, tugera Katonda yawa omuweeyi kandi amangʼana gaae gawula ni iwaga mu owulamu wuifu.