Ebaruwa esookere eya Paulo yajojera
AWATHESALONIIKA
Amangʼana ku owuimpi
Ebaruwa esookere eyagiira awa ekaniisa eya Thesaloniika yajojwa no *Omutumwa Paulo na ari ku omugizi omunene ogwa Korintho omwaka ogwa 51. Ekaniisa eya Thesaloniika yatanikwa no Omutumwa Paulo mu olugendo lwae olwa okuwiri olwa okulanzia *injiili. Thesaloniika nigwo ogwawanga omugizi omunene ogwa ekialo ekia Makedoonia. Olwa *Awayaudi waareeta erioga ku omugizi ogwo, Paulo yafuma omwo wuangu-wuangu agia Berea. Lunyima, na ari Atheene, Paulo yatuma omwina waae Timotheeo okugia Thesaloniika okukalangusia awa ekaniisa eri eyo no okuwagerera amangi, ni iye ataao na agia Korintho. Timotheeo yamuiranako na ari Korintho amureetra amangʼana amalootu aga awa ekaniisa eya Thesaloniika: kiomo wari no okuganya okuisimbiire ku Katonda kukawa mbwe waawonanga eminyako-nyaako okuema ku awantu awaawalwanianga. Kutio, Paulo yawajojera ebaruwa eno okuwa-ambia amaani no okuirania embuuzia ziawu zindi, ino-ino ku amangʼana aga okuirana okwa Yesu *Kristo okwa okuwiri.
Paulo yajojera Awathesaloniika okuwakalangusia mu okuganya na awalaga mbwe wamuwone ki ekilago. Nikulondokana ne embuuzia yaawu ku ekiiza okuikorra Awakristo awamiire okufwa, Paulo yawairania mbwe awaafwa ni wari no okuganya woona wariwa alala na awalamu ni Yesu ari-irana okutoola awantu waae. Kutio, wasikie emioyo giawu namba ni wawita mu eminyako-nyaako emilulu, namba egia olumbe. Katonda ari nawo kandi waaza okuwa awakire mu owutuuko olwa Kristo ari-irana okuwatoola.
1
Amakeezio agasookere
1 Inze Paulo, ni ndi alala ni Siila* Eriina rindi eria Siila ni Silfaano. ni Timotheeo, mbajojera ebaruwa eno inywe awantu awa ekaniisa eya Katonda Ise no *Omwami Yesu *Kristo, eri Thesaloniika. Owusiza no owuolu owua Katonda wuwe ni inywe. Awat 15:22; 17:1; 1Kori 4:17; 2Kori 1:19; 2Thes 1:1; 1Pet 5:12
Paulo airania otioo ku okuganya okwa Awathesaloniika
2 Tuiranizia Katonda otioo enyinga ziona ni tuwasawira inywe mwona aa tutaluya, ni tuwaeta na amiina giinyu. 3 Amiire goona ni tusawa emberi wa Soifu Katonda, tukiari okulawira emirimo giinyu egiemera mu okuganya kwinyu ku Kristo, no okuinyaasia kwinyu ne emirimo emikalu okuema ku olugonzi olwa muri nalwo, alala no okusikia emioyo okureetwa no okuwa no okurindirra ku Omwami iifu Yesu Kristo.
4 Waamwifu awa Katonda agonziizie, tumanyire mbwe Katonda amiire okuwalowola, 5 aeniki amangʼana amalootu aga Katonda aga twawalanzizia ngagakawanga mala amangʼana masa, ni gaawanga na amaani aga *Omwoyo Omweru owagera ni muwa no owuene ku amangʼana ago. Mumanyire geeza kiomo twawanga ni tumenyere ni inywe kandi kiomo twawatunzianga. Awat 19:11; Awaru 1:16; 1Kori 2:4; 4:20; 1Thes 2:13 6 Kandi mwalonda olunyaafwa lwifu no olwa Omwami Yesu aeniki mwaganya muingizia amangʼana ago no owusangaavu owua Omwoyo Omweru yawa-aa, kukawa mbwe mwalwaniwuanga wukalu. 1Kori 4:16; Awat 13:52 7 Kutio, mwawa ekilago ekilootu ku awantu woona awari no okuganya ku Kristo awari mu ewialo ewia Makedoonia na Akaaya. 8 Aeniki ni kuemera ku inywe, amangʼana aga Omwami Yesu gamiire okuilanzia kandi gawurikana, ngʼani mala mu ekialo ekia Makedoonia na Akaaya engʼene, na amangʼana aga okuganya kwinyu ku Katonda ago gamiire okuilanzia asi-uasi, aa kiwulao ekintu kindi ekia tusugaane tusongeko kandi. Awaru 1:8 9 Aeniki iwo aweene walaga awantu kiomo mwatuingizia geeza ni kiomo mwagaluka mulaga katonda ensaasa omugongo, ni muganya okukorra Katonda omulamu kandi owa kuwuene. Yowa 17:3; Awat 14:15 10 Lwona wawoola kiomo murindirra okuuza okwa omuzia waae okuema ku igulu. Yesu nio Omuzia waae owa yaziusia okuema ku awafu kandi owatununula atutoola mu okusu okwa Katonda okuuza.