Ebaruwa eya okuwiri eya
YOWAANA
Amangʼana ku owuimpi
Ebaruwa eya okuwiri eno yajojwa ni Yowaana omuntu omulala owajoja ebaruwa esookere kandi mu emiaka emilala (wona amangʼana ku owuimpi owua 1 Yowaana).
Ebaruwa eno yajojerwa Awakristo awa ekaniisa eya omujoji yawisa eriina yayo. Amiire ago Awakristo waanyaasiwuanga, kutio waaikumianga owuiwisi kugere watamanyika. Yowaana agieta ne eriina eria okugiwisa mbwe ‘omukazi omulowole’ na awantu awagirimo awaeta mbwe ‘awaana awa omukazi omulowole.’ Ne ekaniisa eri aa Yowaana ari enyinga ezia ajoja agieta mbwe ‘wamwawu omukazi omulowole.’ Namba iye omwene oona aieta mbwe ‘omugaaka omukulu’ kugere atamanyika.
Mu ebaruwa eno, Yowaana a-ambia awantu wano amaani mbwe wa-ande ku *ensikirra eya olugonzi eya Yesu yalanzia, kandi eya wamiire okumanya okuema owuire owua waawurra *injiili. Lwona awasiagizia mbwe wawe na amaingirizio amalootu kugere wagawule engerera eya kuwuene ne eya owuweeyi. Okwo kuuza okugera wataezania-wuezania ewintu wiawu ku omuntu owaazreko ni injiili ni watamumanyire, aeniki aguma okuwa omugerezi owa owuweeyi owa agamba-gambako mu ebaruwa esookere.
1
1 Inze omugaaka Yowaana, nkujojera ebaruwa eno, iwue omukazi omulowole kandi otiirwe, alala na awaana waao. Mbagonziizie mwona no olugonzi oluri kuwuene, kandi ngʼani inze owagonziizie otio nyengʼene, ni namba awantu woona awamanyire owuene, woona wawagonziizie. 3Yow 1 2 Ni kutio aeniki owuene owua tumenyeremo kandi owuuza okuwa ni ifwe amiire goona, niwuo owutu-aa owuesani owua okugonzia otio: 3 Owusiza, amasaasra alala no owuolu wiiza okuwa ni ifwe ku owuene no olugonzi, ni wituemera ku Katonda Ise ni Yesu *Kristo, Omuzia owa Soifu Katonda.
4 Kimiire okuwa ekisangaalo kiange ino, okutuukra awandi ku awaana waao ni wamenyere mu engira eri kuwuene, mala kiomo Soifu Katonda yatusikirra mbwe tumenye. 3Yow 3
5 Nyingeeno, iwue omukazi otiirwe kandi owa ngonziizie, inze ngʼankujojera ensikirra indi empia yaaya, ni mala enkulu eya tumiire okuwa nayo okuemera mu owutanikro. Nsawa mbwe, ifwe awari no okuganya ku Kristo, tugonzanie omuntu no omwina waae. 6 Kandi olugonzi olwene olwa ngamba-gambako luno, luri okulondokana ne ensikirra yaae. Ne ensikirra eene, ne eya mumiire okuwurra okuemera mu owutanikro, ewoola mbwe mumenye no olugonzi. 1Yow 4:11; 2:7 Yowa 14:15; 1Yow 2:5
7 Awantu awangi awasemerezia awantu kandi awalowa mbwe Yesu Kristo nakaaza ku ekialo mu omuwiri ogwa omuntu, wamiire okufuma enze waingira mu ekialo kiona. Omuntu ki oyo asemerezia awantu kandi ari omuzigu owa Kristo. 1Yow 2:18; 4:1–3 8 Wa amankaga kugere otateesia omugawo ogwa Katonda aaza okuesana, ogwa omiire okukorra emirimo na amaani, no ogutuukre gwona. 9 Omuntu otambuka engerera endamu kandi ota-ambre engerera eya Kristo, iye ngari ni Katonda. No omuntu-umuntu oambre engerera ezio, ari ni Katonda Ise alala no Omuzia waae oona. 1Yow 2:23 10 No omuntu akuuzreko ne engerera indi ensaasa egawuuke ne eno, otamuingizia mu enyumba yaao namba okumukeezia otamukeezia. Awaru 16:17 11 Okuingizia omuntu ki oyo, no okuizoga nae mu enkola embiiwi ezia akola.
12 Ndi na amangi aga okukujojera, ni nanyagala okukola ni itu ne einki, yaaya. Aa okukola otio, nindra okuuza okuwagenia, ngamba-gambe ni inywe omunwa no omunwa, kugere owusangaavu owua turi nawuo wuwe owuizuule du! 3Yow 13–14
13 Awaana awa waamwinyu owekiala omulowole, wakutumiire amakeezio.