Endagano Empia 2 TIMOTHEEO 1

Ebaruwa eya okuwiri eya Paulo yajojera

TIMOTHEEO

Amangʼana ku owuimpi

Ebaruwa eya okuwiri eno yajojwa enyinga ezia Paulo yawanga na ari mu owusiwe owutuukre Rooma, na asiwirwe ne eminyororo. Yajojwa amiire amatono ni Paulo akiari okuitwa no Omwami Niiro, owaigoga omwaka ogwa 68. Omwaka ogwa yajojerwamo ngagumanyiike yawa. Na awantu wangi wawoola mbwe Paulo yaitwa agati ya omwaka ogwa 67 ni 68. Ebaruwa eno yatumrwa Timotheeo na ari Efeeso.

Paulo yawanga na ari mu eminyako-nyaako emilulu. Kutio, yalaganga Timotheeo kiomo ari no omwoyo omululu kandi kiomo ari na amiiga nae alala na awiiko waae wandi woona. Kukawa mbwe yawonanga owuzito ino, kandi owulamu wuae wuafwananga ki owuwua, nikulondokana ne emidambo egia Omwami Niiro yamuingiziamo alala na Awakristo wandi woona, Paulo yawanga na akiari no omwoyo ogwa okuganya mbwe Katonda aaza okutuusia ewintu wiona geeza mu owulamu wuae owua ku ekialo kuno. Paulo a-ambia Timotheeo amaani mbwe atareka okuganya okwa ari nakwo ku *Kristo, kandi mbwe atatia okugalanzia kukawa mbwe awona emidambo. Amulaga mbwe awe na agaania awagerera engerera ezia owuweeyi aeniki owuene owua Katonda niwuo owuuza okusigala, ino-ino ku awantu awamuganyireko. Paulo awoola mu ebaruwa eno mbwe Awakristo paka wasikie emioyo enyinga ezia wawona eminyako-nyaako kiomo iye omwene amiire okuwa na akola.

Amakeezio agasookere

1-2 Ku Timotheeo omwana wange owa ngonziizie. Nkujojera kandi ebaruwa eno inze Paulo, *omutumwa owa Yesu *Kristo nikulondokana no okuagala okwa Katonda. Katonda yantuma, kugere ndanzizie awantu amangʼana aga owulamu owua yamala okuifuuwa okutu-aa ni kuwitra ku okuwa kwifu mu owulala ni Yesu Kristo. Katonda alala ni Kristo Yesu wawe awasiza ni iwue, wakuambre amagongi kandi waku-ee owuolu wuawu.

Paulo aikazia Katonda

3 Ni nkuingirizia enyinga ziona ni nsawa, nyirania otioo ino ku Katonda owa nsawa no omwoyo gwange gutankengera ekiina. Katonda ono nio owa waaguukwa wiifu waakorranga. 4 Nyagala okukuwona ino kugere omwoyo gwange guizule ne ekisangaalo, aeniki amiiga gandia ni iwue ino ni nyingiriizie amaziga gaao. 5 Lwona nyingirizia okuganya okuri kuwuene okwa ori nakwo ku Kristo, okwa guukwa waao Loisi ni ngʼinwao Yunia waawanga nakwo kandi manyire kuwuene mbwe ori nakwo na reero.

Paulo a-ambia Timotheeo amaani

6 Kutio nkuizurizia mbwe ogie emberi okukola ne empanwa eya Katonda yaku-aa olwa nyakutaako okukono, e-eeme ki omurro oguwutirrwa. 7 Aeniki Katonda ngakatu-aa omwoyo ogugera ni twawa awantu awati yaaya, ni yatu-aa omwoyo ogugera ni twawa na amaani, no olugonzi alala no okumenya owulamu owuirindre. 8 Kutio otasuuka okuwoola ewia omanyire ku Omwami iifu, lwona otasuuka okulagana mbwe ori mu owulala ni inze ori mu owusiwe ku okukola okuagala kwae. Ni toola oluwaala lwao mu okunyaka-nyaakra amangʼana gaae amalootu, no okola na amaani aga Katonda omwene aesana. 9 Katonda nio owatununula kandi atueta no owuesani owuitengeeke ku okuagala kwae omwene kandi ku owusiza wuae owua yatu-aa ni kuwitra ku Kristo Yesu, namba ne ekialo kikiari okuwaao, ni ngʼani ku enkola ziifu endootu, yaaya. 10 Owusiza wuno katio nyingeeno wutufumiire ni kuwitra ku okuuza okwa Omununuzi iifu Kristo Yesu, owakira olumbe. Yesu nio owatulaga ekia owulamu owutariwua wuri kuwuene, ni kuwitra ku amangʼana gaae amalootu.

11 Katonda yandowola okuwa omuyaazi, omutumwa kandi omugerezi owa amangʼana gaae amalootu gano, 12 kandi ekio nikio ekigera ni nyaka-nyaaka otino. Ni mbula ensuuko, aeniki manyire owa nganyreko kandi manyire kuwuene mbwe ari na amaani aga okurinda ewia muteriire mu amakono* nawuno owuire owua owutuuko. 13 Londokana na amangʼana agari kuwuene aga wawurra ni ngerera kandi isimbiizia mu okuganya no olugonzi, agari agiifu ku okuwa mu owulala ni Kristo Yesu. 14 Rinda geeza engerera eri kuwuene eya *Omwoyo Omweru otumenyeremo yakuteera mu amakono eno. 15 Omanyire mbwe Awakristo woona awa mu ekitemo ekia *Eesia, ekigingre waawu Fijeeli ni Amojeeni wansomooke. 16 Nsawa Katonda mbwe alage enyumba eya Onesporaasi owusiza wuae aeniki yaweerangako na anyambia amaani kusa kandi ngakasuuka mbwe ndi mu owusiwe, 17 no olwa yatuuka-utuuka Rooma otino, yaanyagala nawuno antuukra. 18 Nsawa mbwe Omwami amulage owusiza wuae owuire owua owutuuko. Kuwuene omanyire geeza mbwe yantunzia kuwungi ni nyawanga Efeeso.

1:3 1Kori 4:17; 1Thes 2:11

1:3 Awaru 11:1; 1Timo 1:5

1:5 Awat 16:1

1:6 1Timo 4:14

1:7 Awaru 8:15

1:8 Awaru 1:16; Efee 3:1; 2Timo 2:9

1:9 Efee 2:9

1:10 Tiit 3:6

1:11 Awaru 1:5

*1:12 Nakuwa ewia yanteera mu amakono.

1:13 2Timo 3:14

1:14 1Timo 6:20

1:15 2Timo 4:16

1:18 2Timo 4:19