Ebaruwa eya Paulo yajojera
AWAKOLOSAAI
Amangʼana ku owuimpi
Ebaruwa eya Awakolosaai yajojwa ni Paulo na akiari mu owusiwe ku omugizi ogwa Rooma mu omwaka ogwa 60. Ewonekana eyajojwa mu enyinga emfwanani ne ebaruwa eya Awaefeeso, ni ne eya Awafiliipi ekiariko wutono, aeniki ebaruwa iwiri eziasooka zino ziairrwa aweenezio no omutunzi owa Paulo oetwa Tukiiko. Epafraasi, omuwuuka owaganya ku *Kristo mu okulanzia okwa Paulo Efeeso, nio owareeta amangʼana aga Yesu Kristo ku omugizi gwawu ogwa Kolosaai.
Epafraasi yagia Rooma ku Paulo amulaga mbwe awagerezi awa owuweeyi waingiire mu ekaniisa eya Kolosaai kandi wagerera awantu mbwe okuganya okwa Awakristo ngakutuukre yawa. Waagereranga awantu okusawa *enyankoi no okulonda endagirra ne emigomo gindi. Paulo yajoja ebaruwa eno okulowa awagerezi awa owuweeyi awo kandi okugaania Awakolosaai mbwe watalonda engerera ziawu ezilwania okuganya kwawu ku Kristo. Awaizurizia mbwe Kristo nio omunene ku ewintu wiona kandi mbwe ni kuwitra ku olumbe lwae, ifwe twona twanunulwa okuema ku owuoni wuifu, kandi mbwe ni kuwitra ku iye, turi owuyanga ku endagirra ezia tuteeriire na awantu.
Ebaruwa eno ne ekilagirizio ku Awakristo ku engira endamu eya okulonda Kristo mu okuganya kwawu. Paulo alaga awaganyire mbwe Kristo nio olagana owa Katonda ari: nio omulusi, nio oambaanie ewintu wiona alala, nio Omwami owa ekaniisa, kandi iye nio Omununuzi owareeta empurizanio agati ya omuntu ni Katonda. Iye engʼene nio owa tutuukrako owuinunuzi. Paulo alagana kiomo okuganya ku Kristo kuri ne emirimo mu owulamu owua omuntu oganyire.
1
Amakeezio agasookere
1 Ebaruwa eno eema ku inze Paulo, *omutumwa owa Yesu *Kristo ku okuagala okwa Katonda, ni ndi alala ni wamwifu Timotheeo. 2 Mbajojera inywe awantu awa Katonda kandi waamwifu awari Kolosaai awa okuganya kwawu kuisimbiire wukalu ku Kristo. Owusiza no owuolu owua Katonda Soifu wuwe ni inywe.
Paulo aikazia Katonda na asawira Awakolosaai
3 Enyinga ziona ni tuwasawira, tuiranizia Katonda swawu *Omwami iifu Yesu Kristo otioo ino, 4 aeniki tumiire okuwurra okuganya okwa muri nakwo ku Yesu Kristo no olugonzi olwa muri nalwo na awantu awa Katonda. Efee 1:15 5 Mukola otio aeniki muteere emioyo giinyu ku ekintu ekilootu ekia Katonda awawikiire ku igulu mala kiomo mwamiire okuganya okuemera olwa mwawurra owuene owua amangʼana amalootu aga Katonda aga twawalanzizia. Efee 1:13; 1Pet 1:3–4
6 Amangʼana amalootu agaawaazra gano, gagia emberi okuilanzia mu ekialo kiona. Gagalusia emioyo egia awantu wandi kiomo mwona gaawagalusia okuemerra olwa mwasooka okuwurra kandi mumanya ekia owusiza owua Katonda ku awooni wuri. 7 Mwagawurra okuema ku Epafraasi owemirimo omwina iifu owa tugonziizie kandi ori *omukurumu owa Yesu Kristo orindre endagano owaaza eyo ku iwaga riifu. Kolo 4:12; Filem 23 8 Iye nio owatulaga olugonzi lwinyu ku Awakristo, olwa *Omwoyo Omweru ogwa Katonda yawa-aa.
9 Amangʼana agatwawurra ku inywe gano gamiire okugera ni tuwasawira amiire goona okuemera tugawurre. Ni tusawa Katonda mbwe awaizuzie na amagezi no okuwurra okwa Omwoyo Omweru aesana mu engira ziona kugere mumanye okuagala kwae. 10 Kuno kuuza okugera mumenye owulamu owusugre emberi wa Katonda kandi owumusangaazia. Ee, no owulamu wuinyu wuuza okuwa ne enkola endootu mu engira ziona kandi muuza okusonga okumanya Katonda geeza owukirre. Filiip 1:9 Filiip 1:27 11 Tusawa mbwe Katonda awe na awakalangusia na amaani goona nikulondokana na amaani aga owunene wuae kugere musikie emioyo giinyu mu eminyako-nyaako giona kandi muwe ne emioyo egirindirra no owusangaavu. 12 Amiire goona muwe ni muikazia ino Katonda Ise omiire okugera ni muwa awantu awasugre okutuukra omugawo ogwa awantu waae awamenyere mu owueru. Efee 1:18 13 Yatusiwula atutoola mu amaani aga owukire owua ekikeeno, mala atureeta mu owuami owua Omuzia waae owa agonziizie, Awat 26:18; Efee 2:2; 1:21 14 owa ni kuwitrako, Katonda yatuta owuyanga na aturekera amawi giifu. Efee 1:7
Kristo munene okukira wiona
15 Yesu afwanana ni Katonda otawonwa na amiiso ndiki-ndiki, kandi ari omukulu ku ewintu wiona ewialukwa. 2Kori 4:4; 1Timo 6:16; Awaib 1:3 16 Ni kuwitra ku iye, Katonda yaluka ewintu wiona ewiri ku igulu ne ewiri ku ekialo, ewiwonekana ne ewitawonekana, wakaawa awantu awari na amaani aga owukangasi na aga owuami, gikaawa emioyo emiwi egiri na amaani aga owukangasi na aga owukire. Ewintu wiona wialukwa ni kuwitra ku iye kandi wialukrwa iye. Yowa 1:3 17 Kristo yasookera ewintu wiona okuwaao kandi iye nio ogera ewintu wiona ni wiwa alala. 18 Iye nio omutwe ogwa owulala owua awantu awamuganyireko kandi owulala owua awamuganyireko nigwo omuwiri gwae. Iye nio omuzia owa kuluweri owasooka okuziuka okuema ku awafu. Kutio ari na amaani ku ewintu wiona. Awat 4:2; 1Kori 6:14; Efee 1:22–23; Owus 1:5 19 Kwaomerezia Katonda okulagana owa ari ni kuwitra ku owulamu owua Kristo Efee 1:23; Kolo 2:9 20 kandi okureeta empurizanio agati yaae ne ewintu wiona ewiri ku igulu ne ewiri ku ekialo kuno ni kuwitra ku omuzia waae. Katonda yareeta owuolu agati yaae ne ewintu wiona ni kuwitra ku amasaai aga Kristo agaasulula na afwa ku *omusalaaba. 2Kori 5:19; Efee 1:7, 22; 2:14
21 Kale mwawanga ale ni Katonda kandi enkola na amaingirizio giinyu amawi wiagera ni muwa awazigu waae. 22 Ni nyingeeno, ni kuwitra ku omuwiri ogwa Yesu Kristo *ogwawambwa ku omusalaaba, Katonda amiire okuwairania mu empurizanio nae. Kutio muesa okuwa emberi waae ni muri awantu aweeru kandi awawula owuwiiwi — Efee 2:12–13 Awaru 5:10; Efee 5:27 23 ni mugiire emberi okuwa no okuganya ku owuene wuno kandi ni muisimbiire wukalu mu okuganya, aa mutaiyunzia ni muema ku okurindirra okwa mwatuukra mu amangʼana amalootu aga mwawurra, kandi agamiire okulanziwua ku awantu woona mu ekialo kiona. Okulanzia amangʼana amalootu gano nigio emirimo egia inze Paulo, nyaetwa okukola. Gala 1:16
Emirimo emikalu egia Paulo yakorra Awakristo
24 Ndi no owusangaavu namba ni mbanyaka-nyaakra otino. Lwona ntoola iwaga ilootu eria okumariizia no omuwiri gwange ekiasigala ku emidambo ne eminyako-nyaako egia Yesu Kristo yatuukra. Nkola otio ni manyire mbwe nyaka-nyaakra awantu awa Katonda awari omuwiri ogwa Yesu Kristo. 2Kori 4:10–12; Efee 3:13; 2Timo 2:10 25 Katonda yandowola kandi antuma okukorra awantu waae emirimo egia okulanzia amangʼana amalootu, ni ntuusia okuagala kwae kwona ku inywe awatari *Awayaudi. 26 Okuagala okwa Katonda kuno kwaiwisira awantu awa amakula goona agaawita ku emiaka ne emiaka, ni nyingeeno akusasuriire awantu waae. 27 Katonda yaagalanga okusasurra awantu waae okuagala kwae okuluguulwa okuri okwa awantu woona namba awatari Awayaudi. Wuno niwuo owutumwa owunene mbwe Kristo awamenyeremo kandi okwo kugera ni muwa no okurindirra okwa mu emioyo mbwe muuza okutuukra owunene owua Katonda. Efee 3:6; Kolo 2:2; 4:4
28 Kristo ono nio ifwe tulanzia amangʼana gaae ku awantu woona ni tuwasiagizia kandi ni tuwagerera na amagezi goona kugere tuwaire emberi wa Katonda ni wari awakomere mu owulamu wuawu ku Kristo. Efee 4:13 29 Kino nikio ekigera ni nkalawana wukalu na amaani amangi aga Kristo ondimo, a-ampa. Awat 19:11; Efee 3:7
1:4 Efee 1:15
1:5 Efee 1:13; 1Pet 1:3–4
1:7 Kolo 4:12; Filem 23
1:10 Filiip 1:9
1:10 Filiip 1:27
1:12 Efee 1:18
1:13 Awat 26:18; Efee 2:2; 1:21
1:14 Efee 1:7
1:15 2Kori 4:4; 1Timo 6:16; Awaib 1:3
1:16 Yowa 1:3
1:18 Awat 4:2; 1Kori 6:14; Efee 1:22–23; Owus 1:5
1:19 Efee 1:23; Kolo 2:9
1:20 2Kori 5:19; Efee 1:7, 22; 2:14
1:22 Efee 2:12–13
1:22 Awaru 5:10; Efee 5:27
1:23 Gala 1:16
1:24 2Kori 4:10–12; Efee 3:13; 2Timo 2:10
1:27 Efee 3:6; Kolo 2:2; 4:4
1:28 Efee 4:13
1:29 Awat 19:11; Efee 3:7