Endagano Empia LUUKA 9

Yesu atumre awatumwa waae ikumi ni wawiri

(Math 10:5–15; Mari 6:6b–13)

1 Ni Yesu yamala okueta awalonzi waae ikumi ni wawiri alala, yawa-aa amaani no owukire owua okufumia *ewikeeno wiona no okulamia amalwire. 2 Lwona yawatuma okugia okulanzia *Owuami owua Katonda no okulamia awalwire. 3 Yawalaga otino, “Mutaginga ekintu-ukintu ni mugia olugendo olwo; ewintu kiomo ensimbo, ensawo eya olugendo, omukaati na amasendi; lwona mutawa ne enguwo eya okugalusia. 4 Mumenye mu enyumba-unyumba eya muingiziiwuemo, nawuno mueme ku omugizi ogwo. 5 Ni, aa awantu watawaingiizie, mukukumule egunduusi eeme ku amagulu giinyu enyinga ezia mufuma ku omugizi ogwo ki ekisiagizio ku iwo.”* 6 Kutio waafuma wagia kandi waagenda-genda mu emigizi giona, ni walanzia *injiili kandi ni walamia awalwire asi-uasi.

Eroode aluguula owa Yesu ari

(Math 14:1–2; Mari 6:14–16)

7 Omwami *Eroode yawurra ewintu wiona ewia Yesu yakolanga kandi yaluguula ino, aeniki awandi waawoolanga mbwe Yowaana Omubatiisi nio oziukre aemere ku awafu. 8 Awandi waawoolanga mbwe Eliija nio ofumre owuyia, na wandi woona mbwe omulala ku *awagambi awakulu nio oziukre. 9 Ne Eroode yawoola otino, “Yowaana nyamala okumukenga omutwe afwa, ni ono naanu owa mpurrako amangʼana gano?” Kandi yaagala mbwe amuwone.

Yesu aeere awantu awakirre elufu witaanu okuria

(Math 14:13–21; Mari 6:30–44; Yowa 6:1–13)

10 Olwa *awatumwa waairana, waalaga Yesu ewintu ewia waakola. Yawatoola aingira nawo mu owuato wawalama wagia ku omugizi ogwa Bethsaida okuwa eyo aweene. 11 Olwa omurima ogwa awantu waagia wamanya mbwe wamiire okusiawala wagiire, waamulonda ni wawitra enze. Yesu yawaingizia atanika okugamba-gamba nawo ku Owuami owua Katonda, kandi alamia awaagalanga okulamiwua.

12 Iguulo ne enyanga yawanga ne emiire okugwamo, awalonzi waae ikumi ni wawiri waamuuzako wamulaga watino, “Laga omurima ogwa awantu wano wagie mu emigizi ne ewitemo ewiri ampi ano, wagie waagale okuria no owugono, aeniki asi aa turi ano emigizi giwulao.”

13 Yesu yawalaga otino, “Inywe aweene muwa-ee okuria warie.”

Waamuirania watino, “Turi mala ne emikaati itaanu ne emvwa iwiri ziengʼene. Kusi owoola mbwe tugie tugule okuria okukasuga awantu wano woona?” 14 Awantu awekisaaza wengʼene awaawanga ao waesanga okusuga elufu witaanu.

Yalaga awalonzi waae otino, “Muwate waikale ansi mu ewifuwo ewia awantu amakumi ataanu-ataanu.” 15 Awalonzi awo waakola watio kandi omuntu ki omuntu yaikala ansi. 16 Yatoola emikaati itaanu ne emvwa iwiri ziria. Yaginga amiiso gaae ku igulu, airanizia Katonda otioo nikwo agigenyula agi-aa awalonzi waae kugere wagigawre awantu awo. 17 Woona waaria waiguta du, kandi awalonzi waae waakunza ewimega ewia ewiokuria ewiasigala mala wiizula ewidida ikumi ni wiwiri.

Petro awoorre mbwe Yesu nio Meesia

(Math 16:13–20; Mari 8:27–30)

18 Nyanga ni Yesu yawanga na asawa na awalonzi waae ni wari aweene, yawawuuzia otino, “Awantu wawoola mbwe ni inze anu?” 19 Waamuirania watino, “Awandi wawoola mbwe ori Yowaana Omubatiisi, na awandi mbwe ori Eliija, na awandi woona mbwe ori omulala ku awagambi awakulu oziukre.” 20 Yawawuuzia kandi otino, “Ni inywe muwoola mbwe ni inze anu?” Petro yamuirania otino, “Iwue ni *Meesia oemere ku Katonda.” 21 Ni Yesu yawagaania na awasikirra mbwe watalaga omuntu wundi ekingʼana ekio.

Yesu agamba-gambre ku okufwa kwae

(Math 16:21–23; Mari 8:31–33)

22 Yesu yalaga awalonzi waae kandi otino, “*Omuzia owa Omuntu paka awone eminyako-nyaako mu engira enyingi, kandi aaza okulowua na *awagaaka awa ediini eya *Awayaudi, awakangasi awa *awoozia, alala na *awagerezi awa endagirra. Lwona aaza okuitwa, no owuire owua okusatu ariziuka.”

Oagala okuwa omulonzi wa Yesu paka aganye okufumia owulamu wuae

(Math 16:24–28; Mari 8:34—9:1)

23 Nikuemao yalaga awaamulondanga woona otino, “Omuntu oagala okundonda, paka asooke ailowe iye omwene kandi atoole *omusalaaba gwae owuire ki owuire andonde.† 24 Aeniki omuntu-umuntu oagala okununula owulamu wuae iye omwene, aaza okuwurigiza. No omuntu origiize owulamu wuae ku amangʼana gange, iye aaza okutuukra owulamu. 25 No owulootuuki owua omuntu akawona na ari no owunyazi owua ku ekialo kiona, na ateesie owulamu wuae? 26 Aeniki omuntu osuuka ni inze kandi na amangʼana gange, Omuzia owa Omuntu oona arisuuka nae olwa ariiza mu owunene wuae, no owua Swae, kandi no owua *enyankoi aweeru. 27 Mbalaga kuwuene mbwe awandi ku awantu awari ano ngawarifwa ni wakiari okuwona Owuami owua Katonda.”

Embonekano eya Yesu egaluuke enzeru zerre

(Math 17:1–8; Mari 9:2–8)

28 Na amiire munaane gamiire okuwita okuemera yawoola ewintu wino, yatoola Petro, Yowaana ni Yakoobo aniina nawo ku ekigiri okugia okusawa. 29 Ni yawanga na asawa, embonekano eya owueni wuae wuagaluka, kandi enguwo ziae ziawa enzeru zerre ezingʼena-ngʼena. 30 Mu enyinga ezio, awantu wawiri, Muusa ne Eliija, 31 waawafumira ao ni wari no owunene owua ku igulu, ni wagamba-gamba ni Yesu. Waawoolanga kiomo Yesu yagianga okutuusia okuagala okwa Katonda, ku okufwa okwa yagianga okufwa Yerusaleemu. 32 Petro na awiina waae waawanga ni wagona, no olwa waazamuka, waawona owunene owua Yesu na awantu awawiri awaawanga ni waimeriire ao nae awo waawanga nawuo. 33 Olwa awantu wano waareka Yesu ni wagia, Petro yalaga Yesu otino, “Omugerezi, kuri kulootu mbwe turi ano. Reka tuomboke ewigiti wisatu, ekilala kiwe ekiao, ekindi ekia Muusa ne ekindi ekia Eliija.” Ni ngakamanya ekia yawoolanga.

34 Ni yawanga na akiawoola amangʼana gano, ire riaza riwasanikizia, kandi owuti wuawa-amba olwa waingira mu ire erio. 35 Omwoyo gwaema mu ire erio ni guwoola gutino, “Ono no Omuzia wange, Omulowole. Mumuwurre!” 36 Olwa omwoyo ogwo gwamala okugamba-gamba waaizukirra ni Yesu asigaale omwene. Awalonzi awo waasagira kiri, kandi ngawakalaga omuntu wundi ekia waawona ekio mu amiire ago.

Yesu alamiizie omuzia owawanga ne ekikeeno

(Math 17:14–18; Mari 9:14–27)

37 Owuire owualondako, ni waamala okuiika waema ku ekigiri, omurima ogwa awantu awangi waamuagaana. 38 Nikuemao omuntu owawanga mu omurima ogwa awantu awo, yaeterezia wukalu otino, “Omugerezi, nkuiyembere mbwe okawariireko omuzia wange, aeniki nio omwana wange omulala engʼene. 39 Ekikeeno kimuamba mala yarra wukalu nikwo kimugwisia ansi na aitaza-taza ifulo ni rimufumako mu omunwa. Kimuvulunga uwiiwi kandi ngakimureka yawuluuka. 40 Nyiiyembre awalonzi waao mbwe wakifumie, no okukifumia kuwakirre.” 41 Yesu yawalaga otino, “Oo inywe ikula erioneeke kandi eriwula no okuganya rino! Nyiza okuwa ni inywe ni nsikiizie omwoyo ku amangʼana giinyu kutuuka ri? Reeta omuzia waao oyo ano.” 42 No omuzia oyo yaazanga ampi nae, ekikeeno ekio kiamugwisia ansi kandi, atanika okuitaza-taza. Ni Yesu yasiagizia ekikeeno ekiwiiwi ekio kandi alamia omuzia oyo, nikwo amuirania ku swae. 43 Kandi awantu woona waaluguula owunene owua Katonda.

Yesu agamba-gambre kandi ku okufwa kwae

(Math 17:22–23; Mari 9:30–32)

Na awantu woona waaluguulanga ewintu wiona ewia Yesu yakolanga, yalaga awalonzi waae otino, 44 “Mutegerezie ewintu wino geeza, aeniki Omuzia owa Omuntu aaza okuguziwua, ateewue mu amakono aga awantu.” 45 Ni ngawakawurra ekia yawalaganga ekio, lwona gaawaiwisra kugera wareka okumanya isina riago. Ni waatia okumuwuuzia ekia ekingʼana ekio kilagana.

Omunene okukira awandi mu Owuami owua Katonda

(Math 18:1–5; Mari 9:33–37)

46 Awalonzi waatanika okuikululana mu amangʼana ni wagala okumanya omunene okukira awandi, agati yaawu. 47 No olwa Yesu yamanya ekia emioyo giawu giaingirizianga ekio, yatoola omwana omuto amuimerezia ampi nae. 48 Nikuemao yawalaga otino, “Omuntu-umuntu oingiizie omwana omuto ki ono, ku eriina riange, anyingiizie inze. No omuntu onyingiizie, aingiizie kugia Katonda owantuma. Aeniki omuntu ori omutono ino agati iinyu, nio omuntu omunene okukira awandi woona.”

Omuntu otawalwania ari oluwega lwinyu

(Mari 9:38–40)

49 Yowaana yamulaga otino, “Omugerezi, tuwuine omuntu wundi na afumia ewikeeno ku eriina riao, ni ifwe tumugaaniizie, aeniki iye ngakawanga omulala ku ifwe.” 50 Ni Yesu yamuirania otino, “Yawa, mutaaza mwamuemerezia okukola otio, aeniki omuntu-umuntu otawalwania ari oluwega lwinyu.”

Awasamaria walowere okuingizia Yesu

51 Ne enyinga ezia Yesu okugia ku igulu ziatuuka ampi, yakenga mu omwoyo gwae okufuma okugia Yerusaleemu. 52 Kutio, yatuma awantu wakangate emberi okugia okuta ewintu alala okuikagra okuuza kwae. Awantu awo waagia waingira ku omugizi omulala ogwa *Awasamaria, 53 na Awasamaria awo ngawakawaingizia aeniki waawurra mbwe Yesu yagianga Yerusaleemu.‡ 54 Olwa awalonzi wawiri, Yowaana ni Yakoobo, waawona watio waawuuzia Yesu watino, “Omwami, ngoreka tuete omurro gueme ku igulu guuze guwasambe wawue chwe?”§ 55 Ni Yesu yagaluka awawarra kandi awagaania wukalu.* 56 Nikuemao, waafuma wagia ku omugizi gundi.

Ekia paka okole no oagala okulonda Yesu

(Math 8:19–22)

57 Ni waagenda-gendanga ku engira ni wagia, omuntu wundi yamulaga otino, “Nyiza okukulonda asi-uasi aa ogia.” 58 Yesu yamuirania otino, “Endenya ziri na amiina ziago, kandi enyonyi ziri ne entalala. No Omuzia owa Omuntu, iye awula ni aa yakaingizia omutwe.” 59 Nikuemao yalaga owundi otino, “Ndonde.” No omuntu oyo yairania otino, “Omwami, owusookere reka nsooke ngie nyawire soifu.” 60 Ni Yesu yamulaga otino, “Reka awafu waawire awafu awiina waawu. Ni ku iwue, gia olanzie Owuami owua Katonda.” 61 Kandi owundi oona yamulaga otino, “Omwami, nyiza okukulonda, ni sooka oreke ngie nkubre awange ekurinde.” 62 Ni Yesu yamuiraia otino, “Omuntu oambre embago eya engʼombe erimira ni kandi akiawarra enyima aa aema, ngasugre no Owuami owua Katonda.”

LUUKA
<
9
>

9:3 Luuk 22:35

*9:5 *Awayaudi waakukumulanga egunduusi eri ku amagulu gaawu ni wafuma ku omugizi ogwa awatari Awayaudi aeniki ngawakaagala okuginga owumwamu owua emigizi egio wagie nawuo.

9:5 Awat 13:51

9:6 Luuk 10:1–12

9:8 Mari 8:28

9:8 Math 16:14

9:9 Luuk 23:8

9:10 Luuk 6:13; 10:17

9:17 Luuk 15:32–39

9:18 Luuk 5:16

9:19 Math 14:1–2; Mari 6:14–15; Luuk 9:7–8

9:20 Luuk 22:67; Yowa 6:68–69

9:21 Mari 9:9

9:22 Luuk 17:25; 24:6–7

†9:23 Okuginga *omusalaaba kulagana mbwe omuntu aganyire okufwira okuganya okwa ari nakwo ku Katonda.

9:23 1Pet 2:21

9:24 Math 10:38–39; Luuk 14:27

9:26 Luuk 12:9; 2Timo 1:8; 2:12

9:29 Luuk 5:16

9:31 Luuk 24:25–27, 44–46; Awat 26:22–23

9:32 Yowa 1:14

9:35 Owuiz 18:15; Isaa 42:1; Math 3:17; 12:18; Mari 1:11; Luuk 3:22

9:36 2Pet 1:16–18

9:36 Luuk 9:21

9:45 Luuk 9:21–22

9:45 Luuk 18:34

9:48 Luuk 22:24–26

9:48 Math 10:40; 22:26

9:50 Math 12:30; Luuk 11:23

9:51 Mari 10:1; Luuk 9:31; 24:50–51; Awat 9:1, 22

9:52 Luuk 10:33

‡9:53 *Awasamaria na Awayaudi ngawakawurzanianga, kutio waalowa aeniki waawurra mbwe Yesu yagalanga okuwita mu ekialo kiawu okugia okusawa mu *ekaalu Yerusaleemu.

§9:54 Amatu gandi gasonga ano mbwe kiomo Eliija yakola.

9:54 2Awaam 1:9–16

*9:55 Amatu gandi gasonga ano mbwe awalaga otino, “Ngamumanyire omwoyo oguwarimo, aeniki Omuzia owa Omuntu ngakaaza okuona owulamu owua awantu yawa, ni yaaza okuwanunula.”

9:60 Math 8:21–22

9:62 Filiip 3:13