Ebaruwa eya Paulo yajojera
TIITO
Amangʼana ku owuimpi
Ebaruwa eno yajojwa no *Omutumwa Paulo na ari Korintho mu omwaka ogwa 66, amiire amatono ni yamala okujoja ebaruwa esookere eyagiira Timotheeo. Yagijoja na alaga Tiito mbwe aniine emeeli agie ku omugizi ogwa Nikapooli oguri ku omwalo ogwa ekialo ekia Ewugiriiki. Ebaruwa eno yairwa ni Zeena na Apolo.
Tiito yawanga omulala ku Awagiriiki awaasooka okuganya ku *Kristo olwa Paulo yawalanzizia amangʼana aga Kristo mu ekitemo ekia Antioki. Yalowolwa ni Paulo ki owamutunzianga mu engendo ziae, kandi yagia nae namba mu ekiina ekia awatumwa Yerusaleemu mu omwaka ogwa 49. Tiito yatunzia Paulo ni waawanga Efeeso mu olugendo lwae olwa okusatu nikwo Paulo yamutuma okugia okulanzizia ekaniisa eya Korintho. Ni yamala okufuma mu owusiwe ku omugizi ogwa Rooma, Paulo kandi yatoola Tiito wagenda-agenda nae mu olugendo lwae olwa okune, kandi waatanika ekaniisa ku ekizinga ekia Kireete. Paulo yareka Tiito ao okuwarra ekaniisa eyo, iye omwene na agia emberi no olugendo olwa okulanzia.
Paulo aizurizia Tiito mbwe ne ekintu ekinene ino awakangasi awa ekaniisa alala na awa ekaniisa woona ni wamenyere owulamu owuwula ne ekiwi ekia wakawoolwako, aeniki amiire ago omugizi ogwa Kireete gwawanga ni guizuule no okuinyonkoonia. Awoola mbwe Awakristo paka wagawukane na awandi, ni walonda engerera eri kuwuene. Wasugaane wawe ne enkola endootu kandi eya owuti ni wawa mu owusiza owua Katonda kandi ni wamenyere owulamu owua Katonda aagala. Owulamu owufwana wutio, wulagana owa Kristo ari geeza okukira amangʼana amangi aga owusa.
1
Amakeezio agasookere
1 Ebaruwa eno eema ku inze Paulo, *omukurumu owa Katonda kandi *omutumwa owa Yesu *Kristo. Emirimo egia Katonda andoworiire no okutunzia awalowole waae okugia emberi mu okuganya kandi mu okumanya owuene owuri ku Yesu Kristo. Engerera eno eira awantu mu okumenya owulamu owusugre emberi wa Katonda, 2 ni turindirra okumenya nae owulamu owutariwua, owua Katonda otaweeya yaifuuwa kale mbwe awantu waae warimenya.Gala 3:6, 17–18; 1Pet 1:3–5 3 Kandi yamanyisia awantu waae owulamu owuo mu amangʼana gaae mu amiire aga iye omwene yamala okutaao. Yakola otio ni okuwitra ku emirimo giange egia okulanzia amangʼana amalootu ku Yesu Kristo, nikulondokana ne *ensikirra eya Katonda Omununuzi iifu yampa.1Timo 2:6–7 4 Ebaruwa eno nkujojera iwue Tiito, ori omwana wange kuwuene mu okuganya okwa turi nakwo. Nsawa mbwe Katonda Soifu alala ni Yesu Kristo Omununuzi iifu waku-ee owuolu kandi wawe awasiza ni iwue.2Kori 2:13; 1Thes 2:11
Owulowozi owua awakangasi awa ekaniisa
(1Timo 3:1–7)
5 Nyakusawa mbwe osigale Kireete kugere omariizie emirimo egiasigala kandi olowole *awagaaka awakangatra amakaniisa mu emigizi giona kiomo nyakulagirizia.Awat 14:23 6 Omukangasi owa ekaniisa paka awe omuntu omuigolovu, owulamo owuwiiwi. Asugaane awe omuntu ori no omukazi omulala, owa awaana waae wari no okuganya ku Yesu Kristo kandi awa omuntu-umuntu ngaesa yatuukrako enkola embiiwi ezia ensuuko namba aga amiiso amakalu emberi wa awakangasi nakuwa awantu wakulu.
7 Aeniki omukangasi owarra owulala owua Awakristo akola emirimo egia okurinda awantu awa Katonda. Omukangasi oyo paka amenye mu owulamu owuigoloole owuwulamo owuwiiwi. Ataaza yawa omuntu ori no omutwe omukalu, namba omuntu owa enda yaae eyia wuangu. Atawa omuntu omunywi, namba omuntu omulwani, lwona atawa omuntu oagala okutuukra mala ekiae omwene enyinga ziona mu engira etawurikaane. 8 Na asugaane awe omuntu oingizia awageni kandi ogonziizie owulootu. Lwona oirindre mu enkola ziae kandi oigoloole. Paka awe omuntu oifumiizie okukola ewintu ewisangaazia Katonda enyinga ziona kandi omanyire okugawula amangʼana geeza. 9 Paka awe omuntu oambre wukalu engerera endootu emiire okugererwa kugere oona a-ambie awandi amaani ku okugerera engerera eri kuwuene, kandi ate awantu awalwania engerera eya kuwuene mu owueru.1Timo 3:2–71Timo 1:10
Engerera eya owuweeyi
(1Timo 1:3–11; 4:1–7)
10 Mboola otio aeniki wario awantu awangi Kireete ao awawula no owuti, awafwa okuwoola-uwoola amangʼana kandi awasemerezia awandi. Owungi wuawu na awantu awagerera mbwe omuntu paka airwe *enyangu**Awayaudi niwo awaairanga awaana waawu awekizia enyangu ki ekilago mbwe niwo awantu awalowole awa Katonda. Awandi ku Awayaudi awaagaluka waawa Awakristo woona waagereranga mbwe paka omuntu akewue enyangu mbwe nikwo anunulwe. nikwo atuukre owuinunuzi. 11 Otaaza wawaganyira okugerera Awakristo aeniki waona emigizi emingi no okugerera ewintu ewia watasugaane wagerere, mala mbwe watuukre amasendi ku awantu. 12 Namba omulala ku *awagambi waawu aweene oona yawawoolako otino, “Awa Kireete na awantu awaweeyi enyinga ziona, awadoowerwa, awa oguriira awataiguta kandi awawi ki entiangʼi ezia mu isaka.” 13 Ekia omugambi ono yawoola kiri kuwuene. Kutio paka owasiagizie wukalu kugere wawe no okuganya okulamu, 14 aa watatega amatwi ku eminayo egia *Awayaudi walukre. Lwona wasiagizie watawurra ensikirra eziteerweo na awantu awalowa okulonda engerera endootu eri kuwuene.1Timo 1:4 15 Ku awantu awigolovu emberi wa Katonda, kuwulao okuria okusugaane kuzirwe mbwe ngakuri okweru, ni ku awaoneeke kandi awawula no okuganya ku Katonda, kiwulao ekintu ekieru. Kuwuene, waingirizia mala engira ezia owuoni kandi emioyo giawu egia okugawula amawi na amalootu gioneeke.Mari 7:15; Awaru 14:14, 20; 1Timo 1:5 16 Walaga awantu mbwe kuwuene wamanyire Katonda, ne engira eya owulamu wuawu elagana geeza mbwe ngawamumanyire. Lwona ngawalonda engira ziae yaaya. Wari awantu awooni awawiiwi, awatalonda endagirra ezia Katonda kandi awataesa okukola ekintu ekilootu.1Timo 1:3–71Timo 6:20; 2Timo 3:5
1:2 Gala 3:6, 17–18; 1Pet 1:3–5
1:3 1Timo 2:6–7
1:4 2Kori 2:13; 1Thes 2:11
1:5 Awat 14:23
1:9 1Timo 3:2–7
1:9 1Timo 1:10
*1:10 *Awayaudi niwo awaairanga awaana waawu awekizia enyangu ki ekilago mbwe niwo awantu awalowole awa Katonda. Awandi ku Awayaudi awaagaluka waawa Awakristo woona waagereranga mbwe paka omuntu akewue enyangu mbwe nikwo anunulwe.
1:14 1Timo 1:4
1:15 Mari 7:15; Awaru 14:14, 20; 1Timo 1:5
1:16 1Timo 1:3–7
1:16 1Timo 6:20; 2Timo 3:5