Sug Bekna Sulat ni
PEDRO
Begudiin, su dini pa lumbang si Isukristu, sala nu nga miktuꞌun dini Isus, si Pedro. Si Pedro kini, mibaal peneligan ni Isus. Benaꞌ pilentu si Isus ditug langit, iin sug duma nu nga peneligan ni Kristu megukit Gempia Petenday ditug lunsud Jerusalem mukaꞌ meguit tu nga samasakup nilan dia. Iin dademaig bekna megukit di Gempia Petenday tu nga kanaꞌ getaw Judea.
Naa, duuni melaun mikpetuud dini Isus begudiin mipelak di nga melayuꞌ benwa sabaꞌ nu kepeleget dinilan. Ki nga mikpetuud kini, iini pilegetan ilan dun, puꞌ laung dun nu nga sama kilawan nilan, mikesayep mailan. Su saanan nilan dia ngag lain benwa, taang dun, pilegetan dailan dema, kaas mikpuit si Pedro dinilan sulat, adun pekemuꞌenen ilan mukaꞌ penguliksegenen su kesakup nilan dini Isus. Tinituluꞌ ni Pedro puꞌ subay leliagen ilan dun su kegleget dinilan, puꞌ mikpuun tu kesakup nilan dini Isus. Piktuꞌunen dinilan puꞌ ndiꞌ ilan mbelengan ni Kristu. Pidag pa tanan, ditug binayaꞌ gebii buꞌ gendaw, sugdaan ilan nu Gamaꞌ nilan Megbebayaꞌ, saꞌ ndiꞌ nilan iin teliudan. Tinituluꞌen ilan puꞌ subay pegbetaden nilan su melengas da. Tinituluꞌen dailan dema puꞌ subay meksalabuuk ilan, mekpinetailay ilan sampay mektinebangay ilan sekat tu tinawan bigay dinilan nug Balakat nu Megbebayaꞌ. Subay pegliaun nilan sungkin su melaaten, saꞌitada ndiꞌ ilan megbanta, kanaꞌ ilan mesaku, ndiꞌ ilan meksudiꞌ di samataw nilan mukaꞌ ndiꞌ ilan megdusa. Puꞌ ilani pimiliꞌ nu Megbebayaꞌ daniin gupia sakup, binaalen ilan ngag belian mektamuy dini Kristu sampay pinaasen ilan di ngag lain getaw nga piglegetawanen gupia.
Naa, mbasa niu mekatag di ngag lain mipenggulaula ni Pedro dia nga Gempia Petenday sinulat ni Mateo, sinulat ni Marcos, sinulat ni Lucas, sinulat ni Juan sampay dia Nga Pinggulaula nu nga Peneligan ni Isukristu, mukaꞌ misugat gupia dia Lucas 5:1-11; 9:18-36; Juan 21:1-19; Ki nga Pinggulaula 2:14-42 mukaꞌ 10:1-48.
1
1 Diniu nga getaw mipemiliꞌ sakup nu Megbebayaꞌ,
Naan si Pedro, peneligan ni Isukristu, piwitan ku amu sulat kini, yamu nga minguliꞌan tu ngag lain benwa, mipelak na tu nga prubinsya Ponto, Galacia, Capadocia, Asia, mukaꞌ Bitinia. 2 Puꞌ puun tug daansamaꞌ delendeman nu Gamaꞌ ta Megbebayaꞌ, pimiliꞌ amu niin mpaas amu nug Balakat nu Megbebayaꞌ. Iini mpaas amu dun, puꞌ adun mbaal amu tantu piglegetawanen mukaꞌ adun mekpetuud amu pagid dini Isukristu sampay maugasan amu nug duguꞌen.
Naa, penenebiin ku tu Megbebayaꞌ megiseg gusayi tulungen mukaꞌ pianan ginaa mbianan niu.
Su Pedetengen Kegawen
3 Naa, mekpaladpalad ita ditu Megbebayaꞌ, su pektemuyen nu Kaunutan ta si Isukristu mukaꞌ su Gamaꞌen dadema, puꞌ su Megbebayaꞌi migbegay dinita begu ketubuꞌ pibian di kepetubuꞌen puliꞌ dini Isukristu miksekat di gembagel lelaaten. Bigayen dinita puꞌ adun duuni pedetengen ta gembageli gatagen. 4 Pedetengen ta puꞌ mpeduunan ita kepianan penenggiꞌan duni pusakaꞌ ginandamen tuꞌu ditug langit, ki ndiꞌ melapuk, ndiꞌ melemuꞌan mukaꞌ ndiꞌ mbeleng. 5 Yamuig bigayan dun, pegingaten amu nu Megbebayaꞌ pibian di ginuungen sabaꞌ nu kesalig niu, puꞌ adun megawen amu. Saꞌ sungu na melengkebig benwa, mbuasan na gupia ki kegawen dinita nu Megbebayaꞌ.
6 Kaas, ki pedetengen niu kini, dedialay niu, pia pasiꞌ maubaꞌi ginaa niu nemun ndiꞌ maiben, sabaꞌ nu nga mbianan pa niu gininisan kengindan. 7 Iini pengindanan amu dun, adun peksimaꞌen su kesalig niu, saꞌ gempagen ba, saꞌ gembabaw ba. Su kengindan di kesalig niu, maaꞌ nu keksimaꞌ dig bulawan, puꞌ sug bulawan, saꞌ peksimaꞌen pebianen di gapuy adun mesuunan saꞌ tantu, saꞌ kanaꞌen. Laak melagaꞌ pa dig bulawani kesalig niu, puꞌ sug bulawan, mpupus da. Yamu, saꞌ mekebian amu di nga kengindan diniu, iinig deksuꞌanen, penalan amu, megdedengeg amu mukaꞌ pegbesaan amu, saꞌ metuaꞌ puliꞌ dini si Isukristu. 8 Puꞌ iin, pia ndaꞌ niu siben maitaꞌ, petailen niu. Pia ndiꞌ na niu melabet, mituudan amu diniin. Kaas liliag amu dun gupia dig leliag ndaiꞌ tamanen, 9 puꞌ mekpalas tuꞌui kesalig niu, saꞌitada megawen amu.
10 Mendadi, ki nga getaw pimuunan nu Megbebayaꞌ dengantu, pinemalan nilan penilungay ki keglegawen kini di getaw tu nga salaꞌ, adun metukawan nilan sug bian nu Megbebayaꞌ menggulaula dun. Pisuun nilan dayun tu nga getaw su ketulung diniu nu Megbebayaꞌ nemun. 11 Sigi nilan tukaway saꞌ nanu mbuasay ki keglegawen mukaꞌ kendutaꞌi kebianen. Puꞌ su nga kelegenay mbianan pa ni Kristu mukaꞌ su kegdedengegen gupia dayun, pisuun pedaan dinilan nug Balakat ni Kristu mingapuꞌ dinilan. 12 Mibuasan dadema dinilan puꞌ saꞌ tinaluꞌ nilan pedaan ki pisuun diniu nemun, kanaꞌ gabang dinilan. Sinangkaliꞌ pa tanan, iini miktaluꞌ ilan dun pedaan, adun ebangan amu. Iin nai mektaluꞌ dun diniu, su nga megukit Gempia Petenday, kig bigayan ginuung nug Balakat nu Megbebayaꞌ pilusad dinilan nu Megbebayaꞌ. Pia su nga sesuguꞌen nu Megbebayaꞌ getaw langit, mauyaꞌan nilan gupia mesabut nilan su nga pisuun diniu nemun kini mekatag di kegawen ta.
Inggat ita nu Megbebayaꞌ Pegbetaden ta sug Diniwata
13 Kaas sangkap na niuig delendeman niu, adun baalen niu su mauyaꞌan nu Megbebayaꞌ. Guut niu pa pagidig delendeman niu, sampay pepenggengeten niui pedetengen niu tu kepia diniu saꞌ lumusad puliꞌ si Isukristu. 14 Pekpetuud amu gupia tu Megbebayaꞌ, mukaꞌ ndiꞌ niu begay su gayak niu meguit tug delendeman niu kinilawan, su gayak niu saꞌ ndaꞌ pa niu mesabut su metuud. 15 Segaga pegbetaden niu su ndaꞌi melamug dun melaat di tibaꞌan penggulaulaan niu, maaꞌ da nu Megbebayaꞌ, ndaꞌi melamug dun melaat, su migenggat diniu sumakup diniin. 16 Puꞌ ndaꞌ ba mesulat di Misulat Taluꞌ nu Megbebayaꞌ, “Subay ndiꞌ niu begay melamug di pigbetad niu ki melaaten, puꞌ naan, ndaꞌig betadu melaaten.”
17 Naa su Megbebayaꞌ, kagina ingelanan niu iin Amaꞌ saꞌ menenabi amu tu niin, subay pegbesaan niu iin gupia sinegay niu megbebenwa pa dinig dibabaw lumbang. Puꞌ gebii gendaw peglepengenen da ukumay su tibaꞌan getaw mbantang tu gulaula nilan, puꞌ ndaꞌig lingken petailenen. 18 Keduaꞌen, pegbesaay niu iin, puꞌ misuunan niu saꞌ likat amu niin di pigbetad niu ndaꞌi gatagen pingumbilin diniu nu nga ginepuꞌay, kanaꞌ nu selapiꞌ atawaka bulawani piglekat dun, puꞌ kia, mpapas da. 19 Iin pasiꞌi piglegawenen diniu, su melagaꞌ duguꞌ ni Kristu, sug binaal betang maaꞌ nati karniru ndaꞌi melaat dig lawasen. 20 Puꞌ su ndaꞌ pa mbaali gekleb langit buꞌ lupaꞌ, daan na pigdelendem nu Megbebayaꞌ si Kristu meglegawen dinita. Dayun nemun mibuasan na, adun mpianan amu. Mibuasan nemun kini, ki tampusan gebii buꞌ gendaw kini. 21 Pebian dini Kristu mikpetuud namu ditu Megbebayaꞌ, su mikpetubuꞌ puliꞌ dini Kristu mukaꞌ pitaasen sampay ndaꞌig lumabaw tug dengeganen. Kaas suminalig amu gupia tu Megbebayaꞌ, mukaꞌ pedetengen niu tuꞌu puꞌ penuudenen su nga pinasaden.
22 Naa, kagina dinunutan niu su metuud tituluꞌan, miugasan namu di melaat pigbetad niu, kaas kanaꞌ na duaꞌduaꞌig lelaat niu di nga samasakup niu. Maꞌantu, subay gelaꞌ niui ginaa niu di kekpinetailay niu. 23 Puꞌ migigetaw namu puliꞌ pibian di taluꞌ nu Megbebayaꞌ, ki taluꞌ ndaꞌi kepupusen mukaꞌ mekegbegay ketubuꞌ. Kanaꞌ namu bataꞌ nu getaw gasalen matay, puꞌ bataꞌ namu nu ndiꞌ matay. 24 Maꞌantu, ndaꞌ ba mesulat di Misulat Taluꞌ nu Megbebayaꞌ,
“Kig launan kilawan, maaꞌ ilan laak nu sigbet,
maaꞌ da nug bulakbulak sigbeti kelengas nilan.
Su sigbet, melawes, mukaꞌ sug bulaken, melugdas.
25 Laak dagid, ki taluꞌ nu Kaunutan, ndaꞌ nai kebelengen.”
Ki taluꞌen kini, iin su Gempia Petenday miukit na diniu.